మనోజ్ తివారి అంటే భారత క్రికెట్ ప్రేమికులకు పెద్దగా పరిచయం లేని పేరు. అంతర్జాతీయ క్రికెట్ లో ఇలా వచ్చి అలా వెళ్ళిపోయాడు. ఐపీఎల్ లోనూ ఆశించిన స్థాయిలో రాణించలేదు. అయితే ఫస్ట్ క్లాస్ క్రికెట్ లో మాత్రం ఈ బెంగాల్ క్రీడా మంత్రికి అపార అనుభవం ఉంది. 30 సెంచరీలతో పాటు 45 హాఫ్ సెంచరీలు చేశాడు. 38 ఏళ్ల తివారి 2011లో వెస్టిండీస్‌తో జరిగిన వన్డే మ్యాచ్‌లో 126 బంతుల్లో అజేయంగా 104 పరుగులు చేసి తన తొలి అంతర్జాతీయ సెంచరీని నమోదు చేశాడు. తివారీ తన ప్రదర్శనకు ప్లేయర్ ఆఫ్ ద మ్యాచ్‌గా ఎంపికయ్యాడు. అయితే సెంచరీ చేసినా తివారీకి ఆ తర్వాత భారత జట్టుకు ఎంపిక చేయకుండా పక్కన పెట్టారు.
అప్పుడు భారత జట్టు కెప్టెన్ గా ధోనీ ఉన్నాడు. 2011లో తొలి వన్డే సెంచరీ చేసినప్పటికీ కెప్టెన్ ధోనీ తనను భారత జట్టులో నుంచి తొలగించాడని మనోజ్ తివారీ పలుమార్లు చెప్పుకొచ్చాడు. భారత జట్టు నుండి ధోని తనను తొలగించకపోతే రోహిత్ శర్మ, విరాట్ కోహ్లీలా అత్యుత్తమ బ్యాటర్‌గా తాను అయ్యేవాడని గతంలో తన అసంతృప్తి వ్యక్తం చేశాడు. 2012లో ఆస్ట్రేలియా పర్యటనలో రోహిత్, కోహ్లి, సురేశ్ రైనా పరుగులేమీ చేయలేదని గుర్తు చేశాడు. తాజాగా మనోజ్ తివారీ మరోసారి ఈ విషయాన్ని గుర్తు చేసుకొని ధోనీని మరోసారి టార్గెట్ చేశాడు.
మనోజ్ తివారీ మాట్లాడుతూ.. "భవిష్యత్ లో ధోనీని కలిసినప్పుడల్లా 100 పరుగులు చేసినా కూడా నాకు ఎందుకు ఛాన్స్ ఇవ్వలేదని ఖచ్చితంగా అడుగుతాను. నేను ఇంతకు ముందే చెప్పాను. ఏం తప్పు జరిగిందో ఆ సమయంలో వారి ఆలోచన విధానం ఏమిటో నాకు తెలియదు. ఆ నిర్ణయం తీసుకున్న వారిని.. ఆ సమయంలో నిర్ణయాలు తీసుకుంటున్న వారిని అడగవలసిన ప్రశ్న ఇది. క్రికెట్‌లో ప్రతిచోటా ఇష్టాలు, అయిష్టాలు ఉంటాయి. నన్ను ఎవరూ ఇష్టపడకపోవచ్చు". అని తివారీ చెప్పుకొచ్చాడు.
►ALSO READ | Commonwealth Championships: కంబ్యాక్ అదిరింది: కామన్వెల్త్ ఛాంపియన్‌షిప్‌లో మీరాబాయి చానుకు గోల్డ్ మెడల్
మనోజ్ తివారీ టీమిండియా తరఫున 12 వన్డేల్లో 26.09 సగటుతో ఒక సెంచరీతో సహా 287 పరుగులు చేశాడు. 3 టీ20 మ్యాచ్ ల్లో ఒక ఇన్నింగ్స్ మాత్రమే ఆడి 15 పరుగులు చేశాడు. భారత జట్టు తరఫున చివ‌రిసారి 2015లో జింబాబ్వేపై వన్డే ఆడిన తివారీ.. ఆ మ్యాచ్ లో 10 పరుగులు చేశాడు.41 ఫస్ట్ క్లాస్ మ్యాచ్‌లు ఆడాడు. ఇందులో 30 సెంచరీలు, 45 హాఫ్ సెంచరీలు చేశాడు. తివారీ.. ఐపీఎల్‌లోనూ పలు జట్లకు ప్రాతినిథ్యం వహించాడు. ఢిల్లీ డేర్‌డెవిల్స్, కోల్‌క‌తా నైట్ రైడ‌ర్స్‌, కింగ్స్ ఎలెవ‌న్ పంజాబ్, రైసింగ్ పూణే సూప‌ర్ జెయింట్స్‌ ఫ్రాంచైజీల తరుపున ఆడాడు.
