అనాథలైన చిన్నారులు
సిరిసిల్ల టౌన్(ఎల్లారెడ్డిపేట), వెలుగు : క్షణికావేశంలో ఓ వివాహిత ఆత్మహత్య చేసుకుంది. కేసైతే జైలు పాలవుతానని భయపడిన భర్త పిల్లలను వదిలేసి పరారయ్యాడు. దీంతో పిల్లలు రోడ్డున పడ్డారు. అమ్మమ్మ, తాతయ్య వద్ద ఆశ్రయం పొందుతూ ఆపన్న హస్తం కోసం ఎదురుచూస్తున్నారు. వివరాలు.. ఎల్లారెడ్డిపేటకు చెందిన ద్యాగం రాజయ్య, మణేవ్వ ల కూతురు పద్మను కామారెడ్డి జిల్లా మాచారెడ్డి మండలం లచ్చపేటకు చెందిన పడకంటి నారాయణతో15ఏళ్ల కింద వివాహమైంది. వీరికి ప్రవళిక (దివ్యాంగురాలు), పవన్కుమార్పిల్లలు జన్మించారు.
కొద్దిరోజుల తర్వాత వీరిద్దరి మధ్య కలహాలు జరిగి విడాకులకు దారి తీసింది. విడాకుల అనంతరం పద్మను సిద్దిపేట జిల్లా చిన్నకోడూర్ మండలం రామంచకు చెందిన కొమురవెల్లి ముత్యాలు తో వివాహమైంది. అయితే పద్మ తన ఇద్దరు పిల్లలతో అత్తారింటికి వెళ్లింది. ముత్యాలు కొద్ది రోజుల కాపురం బాగానే చేసిన తర్వాత అదనపు కట్నం కోసం వేధించాడు. దీంతో వీరిద్దరి మధ్య కలహాలు రావడంతో ఈ నెల 1న పద్మ ఇంట్లో ఎవరూలేని టైంలో కిరోసిన్ పోసుకుని ఆత్మహత్య చేసుకుంది. మృత్యువుతో పోరాడి ఈ నెల 7న మరణించింది. పద్మ భర్త ముత్యాలు జైలు కెళ్లాల్సి వస్తందేమోనని భయపడి పరారయ్యారు. పద్మ అమ్మానాన్న ఇద్దరు పిల్లలను సాకుతూ ఆపన్న హస్తం కోసం ఎదురుచూస్తున్నారు. ఎల్లారెడ్డిపేట సర్పంచ్ వెంకట్రెడ్డి, ఉప సర్పంచ్ రజిత బాల్రాజు వీరిని ఆదుకోవడానికి ముందుకు రావాలని కోరుతున్నారు.
