నందమూరి అభిమానులు ఎంతో ఆసక్తిగా ఎదురుచూస్తున్న చిత్రం 'అఖండ 2: తాండవం'. ఈ సినిమా గురించి రోజుకో అప్డేట్ బయటకు వస్తోంది. లేటెస్ట్ గా వచ్చిన అప్డేట్ అభిమానుల్లో మరింత ఉత్సాహాన్ని నింపుతోంది. 2021లో సంచలన విజయం సాధించిన 'అఖండ'కు సీక్వెల్‌గా వస్తున్న ఈ చిత్రంపై అంచనాలు భారీగా ఉన్నాయి. ఈసారి నందమూరి బాలకృష్ణ, దర్శకుడు బోయపాటి శ్రీను కాంబినేషన్ యాక్షన్, ఆధ్యాత్మికతను మరింత రంగరించి ఉన్నత స్థాయికి తీసుకెళ్లేందుకు సిద్ధమవుతోంది.
'అఖండ 2' తాండవం రిలీజ్ డేట్ ఫిక్స్!
వాస్తవానికి ఈ భారీ యాక్షన్ ఎంటర్‌టైనర్‌ను దసరా కానుకగా సెప్టెంబర్ 25, 2025న విడుదల చేయాలని ప్లాన్ చేశారు. అయితే, పవర్ స్టార్ పవన్ కల్యాణ్ 'ఓజీ' విడుదల తేదీ కూడా అదే కావడంతో నిర్మాతలు తమ చిత్రాన్ని వాయిదా వేసింది. దీంతో అభిమానులు కొంత నిరాశ చెందారు. ఈ నేపథ్యంలో, ఇటీవల జరిగిన ఒక బహిరంగ సభలో బాలకృష్ణ స్వయంగా 'అఖండ 2: తాండవం' కొత్త విడుదల తేదీని ప్రకటించారు.
'అఖండ 2' ప్రపంచవ్యాప్తంగా డిసెంబర్ 5, 2025న విడుదల కానుంది. వాయిదాకు కారణం కేవలం క్లాష్ మాత్రమే కాదని, సినిమా గ్రాండియర్‌ను పెంచడానికి అవసరమైన వీఎఫ్‌ఎక్స్ (VFX), రీ-రికార్డింగ్ పనుల కోసం మరికొంత సమయం కావాలని సంగీత దర్శకుడు ఎస్. థమన్ అడిగినట్లుగా బాలకృష్ణ వెల్లడించారు. అంతేకాకుండా, ఈసారి సినిమా ప్రమోషన్లను త్వరలో ప్రారంభించి, హిందీలో కూడా భారీ స్థాయిలో విడుదల చేయాలని చిత్ర బృందం యోచిస్తోంది. దీని ద్వారా మొదటి భాగం కంటే పెద్ద మార్కెట్‌ను టార్గెట్ చేయాలని మూవీ మేకర్స్ గట్టిగానే ప్లాన్ చేశారు.
బాలయ్య 'మాస్ ఫెస్టివల్'
'అఖండ 2' కోసం బోయపాటి శ్రీను, బాలకృష్ణ కాంబినేషన్ తిరిగి రావడంతో, ఈ సినిమా అంచనాలను మించిపోయేలా ఉంటుందని చిత్ర యూనిట్ చెబుతోంది. 14 రీల్స్ ప్లస్ పతాకంపై రామ్ ఆచంట మరియు గోపీనాథ్ ఆచంట ఈ చిత్రాన్ని నిర్మిస్తున్నారు. ఎం. తేజస్విని నందమూరి సమర్పకురాలిగా వ్యవహరిస్తున్నారు. "అఖండ 2 కేవలం ఒక సినిమా కాదు, సినిమా పండుగ అవుతుంది. ప్రేక్షకుల అంచనాలను మించిపోయే విధంగా ఒక థియేట్రికల్ అనుభవాన్ని అందించడానికి మేము కట్టుబడి ఉన్నాము" అని ఇటీవల నిర్మాణ సంస్థ వెల్లడించింది. ఇది కేవలం సినిమా కాదు, తెలుగు సినీ చరిత్రలో మరో 'మాస్ ఫెస్టివల్' కాబోతుందని మేకర్స్ ధీమా వ్యక్తం చేస్తున్నారు.
కథా నేపథ్యం
ఈ మూవీలో హింసను నిరోధించే ఉగ్ర అఘోరాగా, అలాగే ఆధ్యాత్మిక యోధుడిగా బాలయ్య డ్యూయల్ రోల్‌లో తన నటనా విశ్వరూపాన్ని చూపించనున్నారు. కీలకమైన కథానాయిక పాత్రలో సంయుక్త మీనన్ నటించారు. ప్రధాన విలన్ పాత్రలో ఆది పినిశెట్టి నటించారు. బాలకృష్ణకు ధీటైన విలనిజంతో సినిమాపై ఆసక్తిని పెంచనుంది. టాలీవుడ్‌కు పరిచయం అవుతున్న బాలనటి హర్షాలీ మల్హోత్రా పాత్ర కూడా కథనంలో కీలకమవుతుందని సమాచారం. మాస్ ఎలివేషన్లకు పెట్టింది పేరైన బోయపాటి శ్రీను దర్శకత్వం వహిస్తున్నారు. మొదటి భాగం విజయానికి కారణమైన ఎస్. తమన్ మళ్లీ ఈ చిత్రానికి సంగీతం అందిస్తున్నారు. తమన్ బీజీఎమ్ మరోసారి థియేటర్లలో రచ్చ చేయడం ఖాయం అని ఇప్పటికే టాక్ వినిపిస్తోంది.
►ALSO READ | Pawan Kalyan: 'ఓజీ'కి ఊరట: టికెట్ ధరల పెంపునకు వెసులుబాటు.. హైకోర్టులో నాటకీయ మలుపు!
'అఖండ 2' కథాంశం అఘోరా యోధుడి గాథను కొనసాగిస్తూ, ఆధ్యాత్మికత, న్యాయం, మంచి-చెడు మధ్య పోరాటం వంటి ఇతివృత్తాలను లోతుగా అన్వేషించనుంది. బాలకృష్ణ పుట్టినరోజు సందర్భంగా విడుదల చేసిన టీజర్, త్రిశూలంతో కూడిన ఆయన ఉగ్ర రూపాన్ని, హై-ఇంటెన్స్ యాక్షన్ సీక్వెన్స్‌లను చూపించింది. ఈ సినిమా ముఖ్యంగా "పిల్లల అమాయకత్వం, ప్రకృతి మరియు ఆధ్యాత్మిక విశ్వాసం మధ్య ఉన్న సంబంధాన్ని ఆవిష్కరిస్తుంది. పురోగతి కోసం సమాజాలు చేసే కృషిని చిత్రిస్తుంది. మొత్తానికి, గ్రాండ్ స్కేల్, పవర్‌ఫుల్ యాక్షన్, బలమైన ఆధ్యాత్మిక నేపథ్యంతో 'అఖండ 2' 2025లో తెలుగు సినిమా చరిత్రలో ఒక మైలురాయిగా నిలవడానికి సిద్ధమవుతోందని సినీ వర్గాలు అంచనాలు వేస్తున్నారు.
