హైదరాబాద్, వెలుగు: నకిలీవిగా పేర్కొంటూ జీహెచ్ఎంసీ ఇటీవల 25 వేల బర్త్, డెత్ సర్టిఫికెట్లను రద్దు చేసిన విషయం తెలిసిందే. మీసేవా కేంద్రాల నిర్లక్ష్యంతోనే ఈ సర్టిఫికెట్లు జారీ అయినట్లు జీహెచ్ఎంసీ అధికారులు గుర్తించారు. ఆర్డీవో ప్రొసీడింగ్లు ఆలస్యమవుతుండటంతో బల్దియా సిబ్బంది సహకారంతో మీసేవా కేంద్రాల నిర్వాహకులు ఇలా అడ్డదారిలో సర్టిఫికెట్లను పొందారు. అయితే ఈ అంశంపై ఇప్పటికే మూడు సార్లు మీసేవా కమిషనర్కు జీహెచ్ఎంసీ కమిషనర్ లెటర్లు రాసినా పెద్దగా పట్టించుకోలేదు. కేవలం 8 మంది మీసేవా కేంద్రాల ఆపరేటర్లపై చర్యలు తీసుకున్నట్లు చెబుతున్నారే తప్ప పూర్తిస్థాయిలో చర్యలు తీసుకోలేదు.
మాయ చేసిన సాఫ్ట్వేర్
‘ఇన్స్టంట్’ అనే కొత్త సాఫ్ట్వేర్ గతేడాది మార్చిలో అందుబాటులోకి రాగా.. ఈ సాఫ్ట్ వేర్ సాయంతో మీసేవా కేంద్రాల నిర్వహకులు చేసిన ఎన్ఏసీ దరఖాస్తులు అప్లోడ్అయ్యాయి. అన్నీ అప్లోడ్ అయ్యాక దానంతట అదే సర్టిఫికెట్ జనరేట్ అయ్యేది. దీనివల్లనే భారీ సంఖ్యలో ఫేక్ సర్టిఫికెట్లు జారీ అయినట్లు అధికారులు గుర్తించారు. తేరుకున్న అధికారులు సర్టిఫికెట్లను రద్దు చేసిన తర్వాత ఆ సాఫ్ట్వేర్లో పలు మార్పులు చేశారు. ఇప్పుడు ఎన్ఏసీ కింద వచ్చే దరఖాస్తులను అసిస్టెంట్ మెడికల్ ఆఫీసర్ (ఏఎంఓహెచ్) పరిశీలించిన తర్వాతే జారీ అవుతున్నాయి. ఎన్ఏసీ దరఖాస్తులు వచ్చిన వారంలోపు వీరు చెక్ చేసిన అన్ని సరిగ్గా ఉంటే అప్రూవ్చేయాలి. లేకపోతే రిజెక్ట్ చేయాల్సి ఉంటుంది. వారంలోపు చేయకపోతే హెడ్డాఫీసులో ఉన్నతాధికారుల వద్దకు ఆ దరఖాస్తు వెళ్లనుంది. ఇక సర్టిఫికెట్లు రద్దయిన వారు తిరిగి ఆర్డీవో ప్రొసీడింగ్స్తో దరఖాస్తు చేసుకుంటే వారికి సర్టిఫికెట్లు అందించేందుకు జీహెచ్ఎంసీ సిద్ధంగా ఉంది. పుట్టిన లేదా చనిపోయిన ఏడాది లోపు అయితే నేరుగా సర్టిఫికెట్లు పొందవచ్చు. ఆలస్యమైతే ఆర్డీవో ప్రొసీడింగ్ తీసుకొని నాన్ అవేలబిలిటీ సర్టిఫికెట్(ఎన్ఏసీ) కింద దరఖాస్తు చేసుకోవాల్సి ఉంది.
నేటి నుంచి విజిలెన్స్ విచారణ?
బర్త్, డెత్ సర్టిఫికెట్లపై దుమారం లేవడం,ఎమ్మెల్యే రాజాసింగ్ హాట్ కామెంట్లతో పాటు విజిలెన్స్ విచారణ జరపాలని బీజేపీ కార్పొరేటర్లు కమిషనర్కు లెటర్లు రాశారు. దీంతో బల్దియా కమిషనర్ విజిలెన్స్ విచారణకు అదేశించనున్నట్లు సమాచారం. మంగళవారం హోలీ సందర్భంగా హాలిడే కావడంతో బుధవారం నుంచి జీహెచ్ఎంసీ విజిలెన్స్ అధికారులు విచారణ జరిపే అవకాశం ఉంది.
సీబీఐ విచారణ జరపాలి: ఎమ్మెల్యే రాజాసింగ్
ఫేక్ బర్త్ సర్టిఫికెట్లపై గోషామహల్ ఎమ్మెల్యే రాజాసింగ్ మండిపడ్డారు. ఈ మేరకు మంగళవారం ఓ వీడియో విడుదల చేశారు. సరైన ఆధారాలు లేవని, తెల్ల పేపర్ పెట్టి బర్త్ సర్టిఫికెట్లు జారీ చేసినట్లు గుర్తించి వాటిని తొలగించామని అధికారులు చెబుతున్నారని, ఇల్లీగల్గా ఇన్ని సర్టిఫికెట్లు ఎలా తయారయ్యాయో చెప్పాలని ఆయన డిమాండ్ చేశారు. రద్దు చేసిన వాటిలో పాతబస్తీకి చెందినవే ఉన్నాయని, దీని వెనుక ఎంఐఎం కుట్ర ఉందని ఆరోపించారు. వీరిలో ఎంతమంది టెర్రరిస్టులో తేల్చాలని డిమాండ్ చేశారు. ఈ కుట్రపై సీబీఐ ఎంక్వయిరీ చేయాలన్నారు. ఇవే కాకుండా ఇంకా ఎన్ని అక్రమ రేషన్ కార్డులు, ఓటరు కార్డులు ఉన్నాయో కూడా తేల్చాలన్నారు.
