న్యూఢిల్లీ: సాఫ్ట్‌‌‌‌బ్యాంక్ మద్దతు ఉన్న ఈ–-కామర్స్ సంస్థ మీషో ఐపీఓ వచ్చే నెల 3–5 తేదీల్లో ఉంటుంది. ఈ పబ్లిక్ ఇష్యూతో రూ.5,421 కోట్లు సమీకరించాలని కంపెనీ లక్ష్యంగా పెట్టుకుంది. ఐపీఓ ధరల బ్యాండ్ను రూ.105–-111గా నిర్ణయించారు. ఈ ధరల బ్యాండ్ ఎగువ స్థాయిలో మీషో వాల్యుయేషన్ రూ.50,096 కోట్లుగా ఉంది.
యాంకర్ ఇన్వెస్టర్లకు షేర్ల కేటాయింపు రెండో తేదీన జరుగుతుంది. ఇందులో రూ.4,250 కోట్ల విలువైన ఫ్రెష్ ఇష్యూ, రూ.1,171 కోట్ల విలువైన ఆఫర్ ఫర్ సేల్ (ఓఎఫ్ఎస్) ఉన్నాయి. మీషో వ్యవస్థాపకులు, తొలి పెట్టుబడిదారులు షేర్లను అమ్ముతారు. క్లౌడ్ సంబంధిత మౌలిక సదుపాయాలు, మార్కెటింగ్, బ్రాండింగ్ కార్యక్రమాలు, విలీనాల కోసం ఈ నిధులను వాడతారు.
డిసెంబర్ 12న మీషో స్టాక్ మార్కెట్లో లిస్టవుతుంది. ఇష్యూలో 75 శాతం షేర్లను అర్హత ఉన్న సంస్థాగత కొనుగోలుదారులకు, 15 శాతం నాన్-ఇన్స్టిట్యూషనల్ ఇన్వెస్టర్లకు, మిగిలిన 10 శాతం షేర్లను రిటైల్ ఇన్వెస్టర్లకు రిజర్వ్ చేశారు. మీషో 2025 ఆర్థిక సంవత్సరంలో రూ.29,988 కోట్ల నికర వ్యాపార విలువ (ఎన్ఎంవీ) సాధించింది. రూ.3,942 కోట్ల నికర నష్టం వచ్చింది.
విద్య వైర్స్ ఐపీఓ కూడా మూడో తేదీనే..
వైండింగ్, కండక్టింగ్ ఉత్పత్తుల తయారీ సంస్థ విద్య వైర్స్ తన రూ.300 కోట్ల ఐపీఓకు ధరల బ్యాండ్ను రూ.48-–52గా నిర్ణయించింది. ఎగువ స్థాయిలో కంపెనీ విలువ రూ.1,100 కోట్లకు పైగా ఉంది. ఈ ఐపీఓ 3–5 తేదీల్లో ఉంటుంది. యాంకర్ ఇన్వెస్టర్లకు షేర్ల కేటాయింపు డిసెంబర్ 2న జరుగుతుంది.
