- తరలివచ్చిన అరవైకి పైగా కంపెనీలు
- 8795 మంది రిజిస్ట్రేషన్
- 1310 మందికి స్పాట్లోనే అపాయింట్మెంట్ లెటర్స్
- 3887 మందికి ట్రైనింగ్ తర్వాత జాబ్స్
హుస్నాబాద్, వెలుగు : సిద్దిపేట జిల్లా హుస్నాబాద్లో మంత్రి పొన్నం ప్రభాకర్ చొరవతో, యువజన సర్వీసుల శాఖ ఆధ్వర్యంలో సోమవారం నిర్వహించిన మెగా జాబ్మేళా గ్రాండ్ సక్సెస్అయ్యింది. ధృవ్ కన్సల్టెన్సీ ఆధ్వర్యంలో అరవైకి పైగా జాతీయ, అంతర్జాతీయ కంపెనీలు అభ్యర్థులను సెలక్ట్ చేసుకున్నాయి. 8,795 మంది నిరుద్యోగులు రిజిస్ట్రేషన్ చేసుకోగా దేశ, విదేశాల్లోని వివిధ కంపెనీల ప్రతినిధులు 5,225 మంది విద్యార్హతలు, నైపుణ్యాలను పరిశీలించారు. ఇందులో వారికి అవసరమైన1,310 మందికి స్పాట్లోనే అపాయింట్మెంట్ లెటర్స్ ఇచ్చారు.
మరో 3,887 మందిని షార్ట్ లిస్టులో ఉంచారు. వీరికి స్కిల్స్ నేర్పించిన తర్వాత ఉద్యోగావకాశాలు కల్పించనున్నారు. హుస్నాబాద్లో మొదటిసారి నిర్వహించిన జాబ్మేళా ద్వారా ఉద్యోగాలు పొందినవారికి మంత్రి పొన్నం ప్రభాకర్, కలెక్టర్ మనుచౌదరితో కలిసి అపాయింట్మెంట్ లెటర్స్ అందజేశారు. మంత్రి పొన్నం ప్రభాకర్ మాట్లాడుతూ హుస్నాబాద్లో సెట్విన్ ట్రైనింగ్ ఇచ్చి గ్రామీణ ప్రాంత నిరుద్యోగ యువతకు విదేశాల్లో ఉద్యోగాలు కల్పిస్తామన్నారు. నర్సింగ్, ఫార్మసీ చదివిన వారికి అపోలో, యశోద, కామినేని హాస్పిటల్స్తో పాటు ఇతర ఫార్మా కంపెనీల్లో ఉద్యోగాలు దక్కేలా జాబ్ మేళా నిర్వహిస్తామన్నారు.
భీమదేవరపల్లి మండలం మాణిక్యాపూర్లో అంబేద్కర్ విగ్రహావిష్కరణ సందర్భంగా ప్రభుత్వ మెడికల్ కాలేజీలో కొందరు విద్యార్థులకు సీట్లు వచ్చినట్టు తెలిసిందని, వారికి అవసరమైన ఫీజులను తానే చెల్లిస్తానని హామీ ఇచ్చారు. మున్సిపల్ చైర్పర్సన్ ఆకుల రజిత, వైస్చైర్పర్సన్ అయిలేని అనిత, ఆర్డీవో రామ్మూర్తి, మున్సిపల్ కమిషనర్ మల్లికార్జున్ పాల్గొన్నారు.
