భద్రాద్రికొత్తగూడెం, వెలుగు : ఏ పార్టీ బతకాలన్నా, రాజకీయ నేతల తలరాతలు మార్చాలన్నా గ్రామస్థాయి ఎన్నికలే పునాది అని రెవెన్యూ శాఖ మంత్రి పొంగులేటి శ్రీనివాసరెడ్డి అన్నారు. చుంచుపల్లి మండలంలోని మంత్రి క్యాంప్ఆఫీస్లో కాంగ్రెస్ పార్టీ మద్దతుతో గెలిచిన సర్పంచులు, ఉప సర్పంచులు, వార్డు మెంబర్లతో గురువారం నిర్వహించిన అభినందన సభలో ఆయన మాట్లాడారు. గ్రామస్థాయి ఎన్నికలు రాజకీయాలకు ఆయువుపట్టు లాంటివన్నారు. గత బీఆర్ఎస్ హయాంలో స్థానిక సంస్థలు ఎన్నికలు కుట్రలు, కుతంత్రాలతో సాగాయని తెలిపారు. ప్రస్తుత ప్రజా ప్రభుత్వంలో సీఎం రేవంత్ రెడ్డి హయాంలో పంచాయతీ ఎన్నికలు మూడు విడతల్లో రాజ్యాంగబద్ధంగా ప్రశాంతంగా సాగాయన్నారు.
జిల్లాలో అత్యధిక స్థానాల్లో కాంగ్రెస్ మద్దతు దారులు విజయం సాధించడం పార్టీ రాష్ట్రంలో అమలు చేస్తున్న సంక్షేమ పథకాల విజయమేనని తెలిపారు. పార్టీ కోసం పనిచేస్తున్న అందరికీ న్యాయం చేస్తామన్నారు. గెలిచిన వారికి ప్రోత్సహిస్తూ, ఓడిన వారికి భరోసా కల్పించే ప్రోగ్రాం చేపడుతామని చెప్పారు. క్రిస్టమస్లోపే ప్రతి నియోజకవర్గంలో గెలిచిన, ఓడిన సర్పంచులతో విస్తృత స్థాయి సమావేశం ఏర్పాటు చేస్తామన్నారు. కొత్తగూడెంలో నియోజకవర్గంలో ఫ్రెండ్లీ ఫైటింగ్ చేశామని, కొత్తగూడెంలో ఎమ్మెల్యే లేడు అనే దిగులు పడొద్దని చెప్పారు. ఓటమిని జీర్ణించుకోలేని ప్రతిపక్షాలు అంకెల గారడీ చేస్తూ మసిపూసి మారేడు కాయ చేస్తున్నాయని విమర్శించారు
గ్రామీణ ప్రాంత ప్రజలు కాంగ్రెస్ వైపే ఉన్నారని చెప్పేందుకు రాష్ట్రంలో కాంగ్రెస్కు వచ్చిన ఫలితాలే నిదర్శనమన్నారు. రాబోయే ఎంపీటీసీ, జడ్పీటీసీ ఎన్నికల్లోనూ ఇవే ఫలితాలు సాధిస్తామన్నారు. ఈ ప్రోగ్రాంలో ఎమ్మెల్యేలు కోరం కనకయ్య, తెల్లం వెంకట్రావ్, పాయం వెంకటేశ్వర్లు, జారే ఆదినారాయణతో పాటు పలువురు కాంగ్రెస్ నేతలు పాల్గొన్నారు.
రాంరెడ్డి మృతదేహానికి నివాళులర్పించిన మంత్రి
కూసుమంచి : పాలేరు గ్రామానికి చెందిన కాంగ్రెస్ నాయకుడు ఎడవల్లి రాంరెడ్డి (57) బుధవారం బైక్ ప్రమాదంలో మృతి చెందిన విషయం తెలిసిందే. గురువారం ఖమ్మం మమత ఆస్పత్రిలో ఉన్న ఆయన మృదేహాన్ని మంత్రి పొంగులేటి సందర్శించి నివాళులర్పించారు. ఈ సందర్భంగా ఆయన మాట్లాడుతూ కాంగ్రెస్ పార్టీలో చురుకైన వ్యక్తిగా రాంరెడ్డి ఉండేవారని, పాలేరు జీపీని ఏకగ్రీవంగా చేసిన నాయకుడని గుర్తుచేశారు. ఈ కార్యక్రమంలో కాంగ్రెస్ పార్టీ సీనియర్ నాయకులు ఎండీ హాఫీజుద్దీన్, మాజీ సర్పంచ్ బజ్జురి వెంకటరెడ్డిపాల్గొన్నారు.
