- హర్షం వ్యక్తం చేస్తున్న గ్రామస్తులు
చెన్నూర్, వెలుగు : మండలంలోని వెంకంపేట గ్రామం ఎస్సీ కాలనీలో బోరు మోటార్ చెడిపోయి తాగునీటి సమస్య ఏర్పడింది. దీంతో కాలనీవాసులు ఇబ్బందులు పడుతున్నారు. ఈ విషయాన్ని గ్రామ కాంగ్రెస్ నాయకులు.. మంత్రి వివేక్ వెంకటస్వామి, ఎంపీ వంశీకృష్ణ దృష్టికి తీసుకువెళ్లారు. వారు వెంటనే స్పందించి కొత్త మోటార్ మంజూరు చేశారు. మంగళవారం కాంగ్రెస్ సీనియర్ నాయకుడు అయిత హిమవంతరెడ్డి, గ్రామస్తులతో కలిసి కొత్త మోటర్ బిగించి ప్రారంభించారు.
ఈ సందర్భంగా హిమవంతరెడ్డి మాట్లాడుతూ మంత్రి వివేక్ వెంకటస్వామి ఎన్నికల్లో ఇచ్చిన వాగ్దానం మేరకు దుగ్నేపల్లి నుంచి వెంకంపేట వరకు రూ.1.17 కోట్లతో బీటీ రోడ్డు, ఉపాధిహామీ నిధుల ద్వారా రూ.20 లక్షలు, డీఎంఎఫ్టీ నుంచి రూ.5 లక్షలతో సీసీ రోడ్లను ఇప్పటికే మంజూరు చేశారని తెలిపారు. ఈ సందర్భంగా మంత్రి వివేక్, ఎంపీ వంశీకృష్ణకు కృతజ్ఞతలు తెలిపారు.
