చెన్నూరు నియోజకవర్గ పరిధిలో అభివృద్ధి పనులు వెంటనే పూర్తిచేయాలి : మంత్రి వివేక్ వెంకటస్వామి ఆదేశం

• చెన్నూరు వార్డుల్లో మార్నింగ్ వాక్
• మంత్రి వివేక్​ వెంకటస్వామి ఆదేశం

కోల్​బెల్ట్/చెన్నూరు, వెలుగు: చెన్నూరు నియోజకవర్గ పరిధిలో చేపట్టిన అభివృద్ధి పనులను వెంటనే పూర్తిచేయాలని సంబంధిత అధికారులను రాష్ట్ర కార్మిక, గనుల శాఖ మంత్రి వివేక్​వెంకటస్వామి ఆదేశించారు.  ప్రజల సంక్షేమానికి కాంగ్రెస్ సర్కార్​కృషి చేస్తోందన్నారు. శనివారం ఆయన చెన్నూరు, రామకృష్ణాపూర్, మందమర్రి, మంచిర్యాల పట్టణాల్లో పర్యటించారు. చెన్నూరు పట్టణంలో చేపట్టిన వివిధ అభివృద్ధి పనులను పరిశీలించారు.

 రూ.30 కోట్లతో డ్రింకింగ్ వాటర్​సప్లై కోసం చేపట్టిన అమృత్​2.0 పనులు, బస్తీ దవాఖానాను పరిశీలించి వెంటనే పనులు పూర్తిచేయాలని ఆఫీసర్లు, కాంట్రాక్టర్​కు సూచించారు. మంచిర్యాల జిల్లా కాంట్రాక్ట్​అసోసియేషన్​ బాధ్యులు రామారావు, సదాశివారెడ్డి, మదన్​మోహన్, వెంకటేశ్వర్లు, కాంట్రాక్టర్లు మంత్రిని కలిసి తమకు రావాల్సిన పెండింగ్ బిల్లులను ఇప్పించాలని వినతిపత్రం అందజేశారు. సీఎం రేవంత్​రెడ్డితో మాట్లాడి సమస్య తీర్చుతానని మంత్రి హామీ ఇచ్చారు. 

బాధిత కుటుంబాలకు పరామర్శ

మంచిర్యాల జిల్లాలో పర్యటించిన మంత్రి వివేక్​పలువురు కాంగ్రెస్ కార్యకర్తలు, ఇతర బాధిత కుటుంబాలను పరామర్శించారు. ఇటీవల మృతిచెందిన క్యాతనపల్లి మున్సిపాలిటీలోని కుర్మపల్లి గ్రామానికి చెందిన బైర వీరమల్లమ్మ, రామకృష్ణాపూర్​16వార్డుకు చెందిన కట్ల లక్ష్మి, మందమర్రి అంగడిబజార్​కు చెందిన అంగన్​వాడీ ఆయా కౌసర్ భాను, మార్కెట్​లో పసునూరి రామకృష్ణ కుటుంబాలను పరామర్శించారు. 

అనారోగ్యం, ప్రమాదాల బారినపడిన కాంగ్రెస్ కార్యకర్తలు మారపెల్లి రాజయ్య, యమహా శ్రీనివాస్, వెల్ది సాయి, మంచిర్యాలలోని హెల్త్​కేర్​హాస్పిటల్​లో చికిత్స పొందుతున్న ఆలం రమణను మంత్రి పరామర్శించి ఆరోగ్య పరిస్థితిని అడిగి తెలుసుకున్నారు. మంత్రి వెంట స్థానిక కాంగ్రెస్ లీడర్లు ఉన్నారు.