వనపర్తి, వెలుగు: ప్రజాప్రభుత్వం పేదల సమస్యలు పరిష్కరిస్తుందని ఎమ్మెల్యే తూడి మేఘారెడ్డి తెలిపారు. గురువారం నియోజకవర్గంలోని గోపాల్పేట, ఏదుల, రేవల్లి మండలాలకు చెందిన లబ్ధిదారులకు గోపాలపేటలో ఏర్పాటు చేసిన కార్యక్రమంలో రేషన్ కార్డులు పంపిణీ చేశారు. రాష్ట్ర ప్రభుత్వం ఇచ్చిన ప్రతి హామీని నెరవేరుస్తూ, దేశంలోనే ఆదర్శంగా నిలుస్తుందన్నారు. మూడు మండలాలకు కలిపి 3,500 రేషన్ కార్డులు మంజూరయ్యాయని తెలిపారు.
సాంకేతిక సమస్యతో ఉచిత కరెంట్, రూ.500 సిలిండర్ పథకం కింద కొంత మందికి లబ్ధి చేకూరడం లేదన్నారు. త్వరలోనే ఈ సమస్యను పరిష్కరిస్తామని చెప్పారు. జిల్లాలో 37,962 కొత్త రేషన్ కార్డులు మంజూరు చేసినట్లు చెప్పారు. కలెక్టర్ ఆదర్శ సురభి, అడిషనల్ కలెక్టర్ వెంకటేశ్వర్లు, డీఎస్ వో కాశీ విశ్వనాథ్, తహసీల్దార్లు పాండు, లక్ష్మి, మల్లికార్జున్, పీఏసీఎస్ చైర్మన్ రఘు, మాజీ ఎంపీపీ సత్యశీలా రెడ్డి పాల్గొన్నారు.
ఉప్పునుంతల: కాంగ్రెస్ హయాంలోనే పేదలకు రేషన్ కార్డులు అందుతున్నాయని అచ్చంపేట ఎమ్మెల్యే వంశీకృష్ణ తెలిపారు. గురువారం మండలంలోని ఓ ఫంక్షన్ హాల్ లో తహసీల్దార్ ప్రమీలతో కలిసి లబ్ధిదారులకు రేషన్ కార్డులు అందజేశారు. పదేండ్లుగా ఎదురుచూస్తున్న పేదలకు కాంగ్రెస్ ప్రభుత్వం ఇచ్చిన మాట ప్రకారం రేషన్కార్డులు అందిస్తోందన్నారు. 1,612 కొత్త కార్డులు అందజేసినట్లు తెలిపారు. తెలంగాణ టీషాట్ సీఈవో బోధనపల్లి వేణుగోపాల్ రెడ్డి, కట్ట అనంతరెడ్డి, మామిళ్ళపల్లి ఆలయ చైర్మన్ నరసింహారావు, తిప్పర్తి అరుణ నరసింహారెడ్డి పాల్గొన్నారు.
ఆమనగల్లు: కడ్తాల్ లో గురువారం యూత్ కాంగ్రెస్ జిల్లా ప్రధాన కార్యదర్శి క్యామ రాజేశ్ పంపిణీ చేశారు. పేదలకు రేషన్ కార్డు భరోసా కల్పిస్తుందని పేర్కొన్నారు. మండలంలో అర్హులైన ప్రతి ఒక్కరికీ రేషన్ కార్డు అందించేందుకు కృషి చేస్తామని చెప్పారు. ఇమ్రాన్ బాబా, భాను కిరణ్, శ్రీకాంత్, రమేశ్, రామకృష్ణ, సందీప్, శివ, మహేశ్, నరసింహ, శ్రీను పాల్గొన్నారు.
