ఎల్బీనగర్, వెలుగు: గోల్డ్ ట్రేడింగ్ పేరుతో మహిళ నుంచి రూ.23.15 లక్షలు కాజేశారు. పోలీసులు తెలిపిన వివరాల ప్రకారం.. ఎల్బీనగర్ చంద్రపురి కాలనీలో నివాసం ఉండే రచన నల్గొండ జిల్లాలో హార్టికల్చర్ ఆఫీసర్గా చేస్తోంది. గుర్తు తెలియని వ్యక్తులు ‘గోల్డ్ ట్రేడింగ్ 3038’ పేరుతో వాట్సప్లో ఆమెను కాంటాక్ట్ అయ్యారు. హెడ్ఆఫీస్ మలేషియాలో ఉందని నమ్మించారు. పీఓఎం గోల్డ్ యాప్ లింక్ ఆమెకు పంపించారు. అందులో పెట్టుబడి పెడితే అధిక మొత్తంలో లాభాలు వస్తాయని, ముందుగా రూ . 5,000 డిపాజిట్ చేసి రిజిస్టర్ చేసుకోవాని సూచించారు. తర్వాత రూ. 5 లక్షలు డిపాజిట్ చేయడం ద్వారా వీఐపీ సభ్యత్వంలో చేరాలంటూ ఆమెపై ఒత్తిడి తెచ్చారు. దాంతో రూ .5 లక్షలు చెల్లించింది. రెండు రోజుల తర్వాత మరో రూ.3 లక్షల స్కీమ్లో చేరాలని చెప్పడంతో తన డబ్బులు వెనక్కు ఇవ్వాలని కోరింది. రూ .25 లక్షలు అయిన తర్వాత డబ్బులు విత్ డ్రా చేయగలరని చెప్పారు. 15 % పన్ను కింద రూ .3.75 లక్షలు, గుర్తింపు తనిఖీకి మరో రూ.5 లక్షలు.. ఇలా 23.5 లక్షలు వసూలు చేశారు. డబ్బులు విత్ డ్రా కాకపోవడం, ఎవరూ స్పందించకపోవడంతో మోసపోయినట్లు గుర్తించి రచన పోలీసులకు ఫిర్యాదు చేశారు. ఆమె డబ్బులు పంపించిన బ్యాంక్ అకౌంట్ల ఆధారంగా కేసు దర్యాప్తు చేస్తున్నారు.
