ముంబై: అమ్మ కోసం ఎన్నో ఏండ్లుగా వెతుకుతున్న బిడ్డ కష్టం తీరింది. 20 ఏండ్ల కిందట మిస్సయిన మహిళ ఆచూకీ సోషల్ మీడియా ద్వారా దొరికింది. ముంబైకి చెందిన హమీదా బానో ఖతార్లో వంట మనిషిగా పనిచేస్తుండేది. అయితే 2002లో ఒక ఏజెంట్ ద్వారా దుబాయ్ వెళ్లింది. కానీ మళ్లీ ఇంటికి తిరిగి రాలేదు. అప్పటి నుంచి ఆమె బిడ్డ యాస్మిన్ షేక్ తల్లి కోసం వెతుకుతూనే ఉంది. సోషల్ మీడియా ద్వారా తన తల్లి పాకిస్తాన్లో ఉందని తెలిసిందని, ఆమెను తీసుకొచ్చేందుకు ప్రభుత్వం సాయం చేయాలని విజ్ఞప్తి చేసింది.
యూట్యూబ్ వీడియోతో వెలుగులోకి..
ఏజెంట్ చేతిలో మోసపోయిన హమీదా బానో పాకిస్తాన్కు వెళ్లింది. లోకల్ వ్యక్తిని పెండ్లి చేసుకొని సింధూ ప్రావిన్స్లో ఉంటోంది. వాళ్లకు ఒక పాప పుట్టింది. ప్రస్తుతం ఒంటరిగా ఉంటోంది. ఆమె జీవిత కథనంతా సామాజిక కార్యకర్త వలీవుల్లా మరుఫ్ తన యూట్యూబ్ చానెల్లో పెట్టారు. ముంబై సామాజిక కార్యకర్త ఖఫ్లాన్ షేక్ ఆ వీడియోను షేర్ చేయడంతో యాస్మిన్ షేక్, ఆమె బంధువులకు చేరింది. వాళ్లు హమీదా బానోతో వీడియో కాల్లో మాట్లాడారు.