స్ట్రీమ్ ఎంగేజ్: ఈ వారం ( మే 11 - 17 ) ఓటీటీలో మస్ట్ వాచ్ మూవీస్

రాజ కుటుంబమే కానీ.. 

• టైటిల్ : ది రాయల్​, ప్లాట్​ ఫాం : నెట్‌‌ఫ్లిక్స్, డైరెక్షన్ :  ప్రియాంక ఘోష్, నుపుర్ అస్థానా
• కాస్ట్​ : భూమి పెడ్నేకర్, ఇషాన్ ఖట్టర్, సాక్షి తన్వర్, విహాన్ సమత్, లిసా మిశ్రా, కావ్య ట్రెహాన్, మిలింద్ సోమన్..

రాజస్థాన్​లోని రాజకుటుంబానికి చెందిన మహారాజా యువనాథ్ సింగ్ (మిలింద్ సోమన్) చనిపోవడంతో కుటుంబ బాధ్యతలు అతని కొడుకు అవిరాజ్ (ఇషాన్ ఖట్టర్) మీద పడతాయి. అతనేమో అలాంటి బాధ్యతలకు దూరంగా ఉండాలి అనుకుంటాడు. న్యూయార్క్‌‌ వెళ్లి  అతనికి నచ్చిన మోడలింగ్​ కెరీర్‌‌లో సక్సెస్​ కావాలని కలలు కంటుంటాడు. తన నిర్ణయాన్ని తల్లి రాణి పద్మజ (సాక్షి తన్వర్)తో చెప్తాడు. కానీ.. రాజ కుటుంబం అయినా వాళ్ల దగ్గర అంత డబ్బు లేకపోవడంతో రాణి పద్మజ అతన్ని ఇక్కడే ఉండమని బలవంతం చేస్తుంది. ఆ తర్వాత ఆర్థిక సమస్యల నుంచి బయటపడేందుకు అవిరాజ్ ‘రాయల్ బిఅండ్​బి’ అనే స్టార్టప్‌‌ కంపెనీ సీఈవో సోఫియా(భూమి పెడ్నేకర్)తో  కలిసి పనిచేయాల్సి వస్తుంది. కానీ.. ఆమెతో పదే పదే గొడవలకు దిగుతాడు. ఆ తర్వాత ఏం జరిగింది? తెలియాలంటే ఈ వెబ్​ సిరీస్​ చూడాలి. 

రోగుల్లేని హాస్పిటల్!​ 

• టైటిల్ : గ్రామ్​ చికిత్సాలయ్ , ప్లాట్​ ఫాం : అమెజాన్ ప్రైమ్ వీడియో, డైరెక్షన్ : రాహుల్ పాండే
• కాస్ట్​ : అమోల్ పరాశర్, వినయ్ పాఠక్, ఆనందేశ్వర్ ద్వివేది, ఆకాష్ మఖిజా, ఆకాంక్ష రంజన్ కపూర్, గరిమా సింగ్, సంతూ కుమార్

మెడికల్​ గ్యాడ్యుయేషన్​ పూర్తి చేసిన ప్రభాత్ సిన్హా (అమోల్ పరాశర్) ఉత్తర భారతదేశంలోని ఒక మారుమూల గ్రామమైన భట్కండిలోని గవర్నమెంట్​ హాస్పిటల్​కి డాక్టర్​గా వెళ్తాడు. ఆ ఊళ్లోని హాస్పిటల్​ని చాలా కాలంగా నిర్లక్ష్యంగా వదిలేశారు. ఎలాంటి సౌకర్యాలు ఉండవు. కనీసం బీపీ మెషిన్​ కూడా పనిచేయదు. కొన్ని పరికరాలు తుప్పు పట్టి ఉంటాయి. అదంతా చూసి సిన్హా ఆశ్చర్యపోతాడు. ఆ గ్రామంలోని రోగులకు గూగుల్‌‌పై ఆధారపడే ఒక మోసగాడు చేతక్ కుమార్‌‌(పాఠక్​) వైద్యం చేస్తుంటాడు. 

►ALSO READ | పరిచయం: అప్పుడు ఆలిండియా ర్యాంకర్.. ఇప్పుడు ఆర్టిస్ట్​ అమోల్

గవర్నమెంట్​ హాస్పిటల్​లోని మందులు కూడా అతని దగ్గరే ఉంటాయి. కాంపౌండర్ ఫుటాని జీ (ఆనందేశ్వర్ ద్వివేది), వార్డ్ బాయ్ గోవింద్ (ఆకాష్ మఖిజా) హాస్పిటల్​కు చాలా అరుదుగా వెళ్తుంటాడు. దాన్ని ఒక వర్క్‌‌ ప్లేస్​గా కాకుండా అప్పుడప్పుడు టైంపాస్​ కోసం వెళ్లే  ప్రదేశంగా భావిస్తారు. అలాంటి భట్కండి పరిస్థితులను ఎలాగైనా మార్చాలని నిశ్చయించుకుంటాడు సిన్హా. కానీ.. ఆ ప్రయత్నంలో అతను స్థానిక రాజకీయ నాయకుల నుంచి వ్యతిరేకతను ఎదుర్కొంటాడు. ఆ తర్వాత ఏం జరిగిందనేదే మిగతా కథ. 

అమ్మంటే ప్రాణం

• టైటిల్ : నోన్నాస్​, ప్లాట్​ ఫాం : నెట్​ఫ్లిక్స్​, డైరెక్షన్ :  స్టీఫెన్ చ్బోస్కీ గంట,
• కాస్ట్​ : విన్స్ వాఘన్​, లోరైన్ బ్రాకో, తాలియా షైర్, సుసాన్ సరాండన్, జో మాంగనీల్లో, కాంప్‌‌బెల్ స్కాట్, మైఖేల్ రిస్పోలీ

ఒక వాస్తవ సంఘటన ఆధారంగా తీసిన సినిమా ఇది. కథలోకి వెళ్తే.. జో స్కారావెల్లా (విన్స్ వాఘన్) బ్రూక్లిన్ మెకానిక్​గా పనిచేస్తుంటాడు. సడెన్​గా వాళ్ల అమ్మ చనిపోతుంది. అతనికి అమ్మ, ఆమె చేతి వంట చాలా ఇష్టం. ఆమెకు కూడా జో అంటే ప్రాణం. అందుకే తాను చనిపోయినా జో బాగుండాలని ఇన్సూరెన్స్​ కూడా తీసుకుంటుంది. 

ఆమె చనిపోయాక జోకి ఆ డబ్బు వస్తుంది. దాంతో అతను తల్లి జ్ఞాపకార్థం ఒక రెస్టారెంట్​ పెడతాడు. అందులో  ప్రొఫెషనల్ చెఫ్‌‌లకు బదులుగా నలుగురు ఇటాలియన్ అమ్మమ్మల(నోన్నాస్)ని చెఫ్​లుగా పెట్టుకుంటాడు. వాళ్లు చేసే గోల చాలా నవ్వు తెప్పిస్తుంది. వాళ్లతో పనిచేయించుకోవడానికి జో ఎలాంటి ఇబ్బందులు ఎదుర్కొన్నాడు? ఆ తర్వాత ఏం జరిగింది? అనేది మిగతా కథ.