2011 వరల్డ్ కప్ ఫైనల్ క్రికెట్ అభిమానులు ఎప్పటికీ మర్చిపోని మ్యాచ్. ముఖ్యంగా ఈ మ్యాచ్ లో ధోని కొట్టిన విన్నింగ్ షాట్ ఇప్పటికీ అభిమానుల కళ్ల ముందు కదలాడుతూనే ఉంటుంది. ధోని ఆ షాట్ కొట్టగానే...ధోనీ.. ఫినిషెస్ ఆఫ్ ఇన్ స్టైల్... ఏ మాగ్నిఫిషియెంట్ స్ట్రైక్ ఇంటు ద క్రౌడ్.. ఇండియా లిఫ్ట్ ద వరల్డ్ కప్ ఆఫ్టర్ 28 ఈయర్స్... ద పార్టీ బిగిన్స్ ఇన్ డ్రెస్సింగ్ రూమ్..'అంటూ కామెంటేటర్ రవిశాస్త్రి అన్న మాటలు..ఇప్పటికీ ప్రతీ భారతీయ క్రికెట్ అభిమాని చెవుల్లో మార్మోగుతూనే ఉంటాయి.
2011 వరల్డ్ కప్ ఫైనల్లో ధోని ఉపయోగించిన బ్యాట్ ఇప్పుడు మరోసారి వార్తల్లో నిలిచింది. ఈ బ్యాట్ కు వేలంలో ఊహించని ధర పలికింది. లండన్‌లోని ఓ చారిటీ ఈవెంట్‌లో ధోనీ బ్యాట్‌ను వేలం వేశారు. ఈ వేలంలో బ్యాట్ ఏకంగా రూ.83 లక్షలు పలికింది. ఆర్కే గ్లోబల్‌ షేర్స్‌ అండ్‌ సెక్యూరిటీస్‌ లిమిటెడ్‌(ఇండియా) కంపెనీ ఈ భారీ ధరకు ధోని బ్యాట్‌ను కొనుక్కుంది. ఈ డబ్బును ధోనీ సతీమణి సాక్షి ఆధ్వర్యంలో నడిచే సాక్షి ఫౌండేషన్‌ ఖర్చు చేయనుంది. ధోని బ్యాట్కు వేలంలో రూ. 83 లక్షలు పలకడంతో ప్రపంచంలో అత్యంత ఖరీదైన బ్యాట్గా నిలిచిపోయింది.
