యంగ్ రెబల్ స్టార్ ప్రభాస్ హీరోగా తెరకెక్కుతున్న పీరియాడిక్ యాక్షన్ మూవీ ‘ఫౌజీ’ టీజర్ ఇప్పుడు వివాదానికి కేంద్రబిందువుగా మారింది. స్వాతంత్య్ర సమరయోధుడు నేతాజీ సుభాష్ చంద్రబోస్‌ను సినిమాలో చూపించిన తీరుపై విమర్శలు వెల్లువెత్తుతున్నాయి. టీజర్‌లో చారిత్రక వ్యక్తులను కల్పిత కథతో ముడిపెట్టి చూపించడం ద్వారా నేతాజీ గౌరవాన్ని తగ్గించారని ఆయన కుటుంబానికి చెందిన చంద్రకుమార్ బోస్ తీవ్ర అభ్యంతరం వ్యక్తం చేశారు. దర్శకుడు హను రాఘవపూడి, చిత్ర నిర్మాణ సంస్థల తీరుపై అసంతృప్తి వ్యక్తం చేస్తూ.. టీజర్‌ను వెనక్కి తీసుకోవాలని డిమాండ్ చేశారు. అంతటితో ఆగకుండా కేంద్ర సమాచార, ప్రసార శాఖ మంత్రి అశ్విని వైష్ణవ్‌కు లేఖ రాసి, ఈ వ్యవహారంపై విచారణ జరిపించాలని కోరారు. పూర్తి వివరాల్లోకి వెళితే..
ఫౌజీ టీజర్‌పై భగ్గుమన్న నేతాజీ కుటుంబం..
ప్రభాస్ పుట్టినరోజు సందర్భంగా అక్టోబర్ 23న చిత్రబృందం ‘ఫైల్ నంబర్ 25’ పేరుతో ‘ఫౌజీ’ టీజర్‌ను విడుదల చేసింది. 1942 నాటి బెర్లిన్ నేపథ్యంలో సాగే ఈ టీజర్‌లో నేతాజీ సుభాష్ చంద్రబోస్, జర్మనీ నియంత అడాల్ఫ్ హిట్లర్ మధ్య జరిగినట్లుగా ఓ కల్పిత సంభాషణను చూపించారు. బ్రిటిష్ పాలన నుంచి భారత్‌కు విముక్తి కల్పించే పోరాటంలో సహకారం కోరేందుకు నేతాజీ హిట్లర్‌ను కలిసినట్లుగా సన్నివేశాన్ని రూపొందించారు.
ఆ సంభాషణలో భాగంగా భారతదేశం కోసం పోరాడుతున్న ఓ రహస్య గూఢచారి గురించి నేతాజీ ప్రస్తావిస్తారు. జపాన్‌కు బ్రిటిష్ సేనలపై పైచేయి సాధించడంలో, సింగపూర్‌ను స్వాధీనం చేసుకోవడంలో ఆ గూఢచారి కీలక పాత్ర పోషించినట్లుగా వివరిస్తారు. భగవద్గీత స్ఫూర్తితో ఓ రహస్య సంకేత భాషను రూపొందించిన ఆ వ్యక్తి ప్రస్తుతం కలకత్తాలో ఉన్నాడని కూడా చెబుతారు. ఆ కల్పిత గూఢచారి పాత్రలోనే ప్రభాస్ కనిపిస్తారు. చివర్లో చేతిలో భారీ తుపాకీతో ఆయన కనిపించే సన్నివేశాలు టీజర్‌కు ప్రధాన ఆకర్షణగా నిలిచాయి.
అయితే, నిజ జీవిత చారిత్రక వ్యక్తులైన నేతాజీ, హిట్లర్‌లను ఓ కల్పిత పాత్రను పరిచయం చేసే కథనంలో భాగం చేయడంపై అభ్యంతరాలు వ్యక్తమయ్యాయి. ముఖ్యంగా నేతాజీ ఆ కల్పిత గూఢచారి గురించి ప్రశంసించినట్లుగా చూపించడం చరిత్రను తప్పుదోవ పట్టించే ప్రమాదం ఉందని విమర్శకులు ఆందోళన వ్యక్తం చేస్తున్నారు.
The teaser of Fauzi ought to be pulled down, corrected and released again. Should our concern regarding Netaji be resolved (for the teaser as well as for the Movie), my best wishes go out for #Prabhas and the entire team @FauziTheMovie . Hope @hanurpudi realises the seriousness @narendramodi @AshwiniVaishnaw @SuparnoSatpathy
— Chandra Kumar Bose (@Chandrakbose) October 27, 2026
I&B మంత్రికి చంద్రకుమార్ బోస్ లేఖ
ఈ వివాదంపై స్పందించిన నేతాజీ కుటుంబ సభ్యుడు, సామాజిక-రాజకీయ కార్యకర్త చంద్రకుమార్ బోస్.. కేంద్ర సమాచార, ప్రసార శాఖ మంత్రి అశ్విని వైష్ణవ్‌కు లేఖ రాశారు. టీజర్‌లో నేతాజీని చూపించిన విధానం అభ్యంతరకరంగా ఉందని పేర్కొంటూ, ఈ అంశంపై సమగ్ర విచారణ జరిపించాలని కోరారు. టీజర్‌ను వెంటనే తొలగించాలని, అవసరమైన మార్పులు చేసిన తర్వాతే మళ్లీ విడుదల చేయాలని ఆయన డిమాండ్ చేశారు. అంతేకాదు, ఈ టీజర్‌కు సెంట్రల్ బోర్డ్ ఆఫ్ ఫిల్మ్ సర్టిఫికేషన్ (CBFC) ఎలా అనుమతి ఇచ్చిందనే అంశాన్ని కూడా ప్రశ్నించారు. బాధ్యులపై తగిన చర్యలు తీసుకోవాలని తన లేఖలో కోరినట్లు వెల్లడించారు.
నేతాజీ చరిత్రను, ఆయన దేశానికి చేసిన సేవలను గౌరవించాల్సిన బాధ్యత ప్రతి ఒక్కరిపై ఉందని బోస్ మునిమనవడు అభిప్రాయపడ్డారు. చారిత్రక వ్యక్తులను సినిమాల్లో చూపించే సమయంలో సృజనాత్మక స్వేచ్ఛకు హద్దులు ఉండాలని, వాస్తవాలకు విరుద్ధమైన భావన కలిగించేలా చిత్రీకరించకూడదని ఆయన చేసిన వ్యాఖ్యలు ఇప్పుడు చర్చనీయాంశంగా మారాయి.
టీజర్‌ను తొలగించి.. సరిచేసి విడుదల చేయాలి
సోషల్ మీడియాలోనూ చంద్రకుమార్ బోస్ తన అభ్యంతరాలను వెల్లడించారు. నేతాజీని తక్కువ చేసి చూపించే విధానాన్ని తాము తీవ్రంగా వ్యతిరేకిస్తున్నామని పేర్కొంటూ, టీజర్‌ను వెనక్కి తీసుకుని సరిచేసిన రూపంలో విడుదల చేయాలని స్పష్టం చేశారు. దర్శకుడు హను రాఘవపూడి, చిత్రబృందం ఈ అంశంలోని తీవ్రతను అర్థం చేసుకోవాలని ఆయన కోరారు. నేతాజీ విషయంలో తమ అభ్యంతరాలు పరిష్కారమైతే ప్రభాస్‌తో పాటు చిత్రబృందానికి శుభాకాంక్షలు తెలుపుతానని కూడా పేర్కొన్నారు. అంటే, నటుడిపై వ్యక్తిగత వ్యతిరేకత కంటే చారిత్రక అంశాల చిత్రీకరణపైనే తమ అభ్యంతరమని ఆయన వ్యాఖ్యల ద్వారా స్పష్టమవుతోంది. ఈ వివాదంపై ప్రధాని నరేంద్ర మోదీని కూడా ఆయన ట్యాగ్ చేశారు. టీజర్‌తో పాటు సినిమాలోనూ నేతాజీకి సంబంధించిన అంశాలను బాధ్యతాయుతంగా చూపించాలని కోరారు.
తొలుత అభ్యంతరం వ్యక్తం చేసిన సుపర్ణో సత్పతి
ఈ అంశంపై సామాజిక-రాజకీయ నాయకుడు సుపర్ణో సత్పతి కూడా తొలుత స్పందించారు. ‘ఫౌజీ’ టీజర్‌ను ప్రశంసించినప్పటికీ, చారిత్రక వ్యక్తులను కల్పిత కథలో భాగం చేయడంపై సందేహాలు వ్యక్తం చేశారు. చరిత్రను, కల్పనను కలిపి చూపించడం భవిష్యత్తు తరాలు చారిత్రక సంఘటనలను అర్థం చేసుకునే విధానంపై ప్రభావం చూపవచ్చని అభిప్రాయపడ్డారు. ఆయన చేసిన వ్యాఖ్యలకు చంద్రకుమార్ బోస్ మద్దతు తెలపడంతో వివాదం మరింతగా చర్చలోకి వచ్చింది. టీజర్‌ను వెనక్కి తీసుకుని, చరిత్ర వక్రీకరణకు తావులేని విధంగా కొత్త టీజర్‌ను విడుదల చేయాలని డిమాండ్లు వినిపిస్తున్నాయి.
‘ఫౌజీ’ మేకర్స్ రియాక్షన్ ఏంటి?
హను రాఘవపూడి దర్శకత్వంలో తెరకెక్కుతున్న ‘ఫౌజీ’ చిత్రాన్ని మైత్రీ మూవీ మేకర్స్ నిర్మిస్తుండగా, టీ-సిరీస్ ఫిల్మ్స్ సమర్పిస్తోంది. నవీన్ యెర్నేని, వై. రవిశంకర్, భూషణ్ కుమార్ నిర్మాతలుగా వ్యవహరిస్తున్నారు. ప్రభాస్‌తో పాటు ఇమాన్వి, అనుపమ్ ఖేర్, మిథున్ చక్రవర్తి, జయప్రద తదితరులు ఈ సినిమాలో నటిస్తున్నారు.
ఇపుడు ‘ఫౌజీ’ టీజర్ చుట్టూ మొదలైన వివాదం ఇప్పుడు చారిత్రక వ్యక్తుల చిత్రీకరణ, సినిమా స్వేచ్ఛ, చరిత్ర పట్ల బాధ్యత వంటి అంశాలపై చర్చకు దారితీసింది. ఈ అభ్యంతరాలపై చిత్రబృందం ఎలా స్పందిస్తుంది? టీజర్‌లో మార్పులు చేస్తారా? కేంద్ర మంత్రిత్వ శాఖ ఈ ఫిర్యాదుపై ఎలాంటి చర్యలు తీసుకుంటుంది? అన్నది ఆసక్తికరంగా మారింది. ఈ చిత్రాన్ని 2027 మార్చి 19న థియేటర్లలో విడుదల చేయాలని మేకర్స్ భావిస్తున్నారు.
