- తెలంగాణతో సహా అన్ని రాష్ట్రాలకు ఎన్ హెచ్ఆర్సీ ఆదేశం
- బస్సు ప్రమాదాలపై మానవ హక్కుల రక్షణ చట్టం కింద విచారణ
న్యూఢిల్లీ, వెలుగు: భద్రతా నిబంధనలను ఉల్లంఘించే స్లీపర్ కోచ్ బస్సులను తొలగించాలని జాతీయ మానవ హక్కుల కమిషన్(ఎన్ హెచ్ఆర్సీ) తెలంగాణ సహా అన్ని రాష్ట్రాల ప్రధాన కార్యదర్శులకు ఆదేశాలు జారీ చేసింది. తెలంగాణ, మహారాష్ట్ర, రాజస్తాన్, ఇతర రాష్ట్రాల్లో ఇటీవల జరిగిన బస్సు ప్రమాదాల్లో మంటల్లో చిక్కుకొని ప్రయాణికులు మరణించిన ఘటనలపై ఎన్ హెచ్ఆర్సీకి ఫిర్యాదులు అందాయి. బస్సుల రూపకల్పనలో లోపాలు ప్రయాణికుల ప్రాణాలకు ముప్పు కలిగిస్తున్నాయని ఫిర్యాదులో పేర్కొన్నారు.
కొన్ని బస్సుల్లో డ్రైవర్ క్యాబిన్ ప్రయాణికుల కంపార్ట్‌‌మెంట్ నుంచి పూర్తిగా వేరు చేయబడ్డాయని, ప్రమాదాలు జరిగిన టైంలో ప్రయాణికులు మంటలను సకాలంలో గుర్తించడంలో అడ్డంకిగా మారిందన్నారు. దీంతో ప్రయాణికులు మంటల్లో చిక్కుకొని మరణించిన ఇటీవలి ఘటనలను ప్రస్తావించారు.
ఇది రాజ్యాంగంలోని ఆర్టికల్ 21 ప్రకారం జీవించే ప్రాథమిక హక్కును కాలరాయడమే అన్నారు. ఈ ఘటనలు బస్సులు తయారు చేసే కంపెనీలు, వాటి ఫిట్ నెస్ ను ఆమోదించే అధికారుల నిర్లక్ష్యానికి నిదర్శమన్నారు. భద్రత ప్రమాణాలు రూపొందించడంతో పాటు బాధిత కుటుంబాలకు పరిహారం నిర్ధారించడానికి జోక్యం చేసుకొవాలని పిటిషన్ లో అభ్యర్థించారు. ఈ పిటిషన్ పై శనివారం మానవ హక్కుల రక్షణ చట్టం–1993, సెక్షన్ 12 కింద ఎన్ హెచ్ఆర్సీ మెంబర్ ప్రియాంక్ కనూంగో విచారణ చేపట్టారు.
ఈ సందర్భంగా.. స్లీపర్ కోచ్ బస్సులు తొలగించాలని తెలంగాణ సహా అన్ని రాష్ట్రాల సీఎస్ లకు ఆదేశాలు జారీ చేశారు. అలాగే కేంద్ర రోడ్డు, రవాణా, జాతీయ రహదారుల శాఖ సెక్రటరీ, మహారాష్ట్రలోని పూణేలోని సెంట్రల్ ఇన్ స్టిట్యూట్ ఆఫ్ రోడ్ ట్రాన్స్ పోర్ట్ డైరెక్టర్ కు నోటీసులు జారీ చేయాలని రిజిస్ట్రీని ఆదేశించారు. ఈ బస్సు ఘటనలపై తీసుకున్న చర్యలపై సమగ్ర నివేదికను రెండు వారాల్లో సమర్పించాలని స్పష్టం చేశారు.
