నిర్మల్, వెలుగు : వరి ధాన్యం కొనుగోలు ప్రక్రియను వేగంగా పూర్తిచేయాలని నిర్మల్ అడిషనల్ కలెక్టర్ కిషోర్ కుమార్ అధికారులను ఆదేశించారు. వరి ధాన్యం కొనుగోలుకు సంబంధించిన వివిధ అంశాలపై రెవెన్యూ, పౌరసరఫరాల శాఖల అధికారులు, కొనుగోలు కేంద్రాల నిర్వాహకులతో కలెక్టరేట్లో సోమవారం సాయంత్రం సమావేశం నిర్వహించారు. ఈ సందర్భంగా ఆయన మాట్లాడుతూ.. వరి ధాన్యం కొనుగోలు ప్రక్రియను నిర్ణీత గడువులోగా పూర్తిచేయాలని ఆదేశించారు.
ధాన్యం కొన్న తర్వాత సకాలంలో మిల్లులకు తరలించాలని, కొనుగోలు వివరాలను ఖచ్చితంగా ట్యాబ్లో ఎంట్రీ చేయాలని సూచించారు. ధాన్యం కొనుగోలు చేసిన వెంటనే రైతుల ఖాతాల్లో డబ్బులు జమచేసే విధంగా చర్యలు తీసుకోవాలన్నారు. ఈ సమావేశంలో డీఆర్డీవో విజయలక్ష్మి, డీఎం సివిల్ సప్లయిస్ శ్రీకళ, డీఎస్వో నందిత, ఇతర అధికారులు, సిబ్బంది పాల్గొన్నారు.
కొనుగోళు సెంటర్ల పరిశీలన
లక్ష్మణచాంద : లక్ష్మణచాంద మండలంలో రాచాపూర్, పీచర, ధర్మారం గ్రామాల్లోని వరి ధాన్యం కొనుగోలు కేంద్రాలను అడిషనల్ కలెక్టర్ కిషోర్కుమార్ పరిశీలించారు. సెంటర్లలోని సౌకర్యాలపై ఆరా తీశారు. ధాన్యాన్ని వెంటవెంటనే మిల్లర్లకు పంపించాలని, కొనుగోళ్లలో వేగం పెంచాలని నిర్వాహకులకు సూచించారు. ఆయన వెంట తహసీల్దార్ జానకి తదితరులున్నారు.
