సాధారణంగా భారత్ పాకిస్థాన్ మ్యాచ్ అంటే టికెట్లు హాట్ కేకుల్లా అమ్ముడుపోవడం సహజం. చాలా మంది అభిమానులు టికెట్ రేట్ ఎంతైనా సరే కొనడానికి వెనుకాడరు. అయితే ప్రస్తుత పరిస్థితి మాత్రం అందుకు భిన్నంగా కనపడుతుంది. శ్రీలంకలోని పల్లకెల స్టేడియం ఆతిధ్యమిస్తున్న ఈ మ్యాచ్ కి టికెట్ల ధర ఇప్పుడు ఊహించని స్థాయిలో ఉండడం విశేషం. టికెట్ల విషయంలో అభిమానులకి ఆఫర్ లో ఇండియా, పాక్ మ్యాచ్ టికెట్లు అమ్మడం సోషల్ మీడియాలో వైరల్ గా మారింది.
రూ.10వేల టికెట్ రూ.1500:
ఇండియా పాకిస్థాన్ మ్యాచ్ కోసం శ్రీలంక రూ.10 వేల టికెట్ రూ.1500కే అమ్ముతున్నారు. వినడానికి ఆశ్చర్యంగా ఉన్నా ఇది నిజం. ఓ వైపు వరల్డ్ కప్ లో టికెట్లు దొరకడం కష్టంగా మారుతున్న తరుణంలో శ్రీలంకలో మాత్రం చాలా తక్కువ ధరకి దొరకడం ప్రస్తుతం టాక్ ఆఫ్ ది టౌన్ గా మారింది. టోర్నీ హోస్ట్ అయిన పాకిస్థాన్ క్రికెట్ బోర్డు ఈ ఆఫర్ అనౌన్స్ చేసింది. ఈ లిమిటెడ్ టైమ్ స్పెషల్ ఆఫర్ ను దక్కించుకోవాలని అభిమానులను కోరింది. పల్లెకెలె స్టేడియంలోని పచ్చికపై కూర్చొని మ్యాచ్ చూడాలనుకునేవారికి ఈ ఆఫర్ వర్తిస్తుంది. ఇందులో భాగంగా శ్రీలంకలోని రూ.9600 టికెట్ ను కేవలం రూ.1500కే ఇస్తున్నట్లు పాక్ బోర్డు వెల్లడించింది.
భారత్-నేపాల్ మ్యాచ్ కి కూడా..
ఈ ఆఫర్ కేవలం భారత్ పాకిస్థాన్ మ్యాచ్ కే కాదు టీమిండియా తదుపరి నేపాల్ తో ఆడబోయే లీగ్ మ్యాచులో కూడా ఈ ఆఫర్ వర్తిస్తుంది. అంతేకాదు ఈ మ్యాచ్ చూడాలనుకునే వారు 2560 రూపాయలు చెల్లిస్తే చాలని మరో ఆఫర్ కూడా ఇచ్చింది. క్యాండీలో స్టేడియం దగ్గర ఉన్న బాక్సాఫీస్ లో ఈ టికెట్లను అప్పటికప్పుడు కొనుగోలు చేయొచ్చు. క్రికెట్ ప్రేమికులకు ఇది నిజంగా ఒక అద్భుతమైన ఆఫరని చెప్పాలి.
