కామారెడ్డి జిల్లాలో డేటాఫ్ బర్త్ పేరిట సైబర్ మోసం చోటుచేసుకుంది. సదాశివనగర్ మండలం లింగంపల్లి గ్రామానికి చెందిన సుభాష్ రావుకు క్రెడిట్ కార్డులో డేటాఫ్ బర్త్ తప్పుగా ఉందని సైబర్ నేరగాళ్లు ఫోన్ చేశారు. డేటాఫ్ బర్త్ సరిచేయాలని, అందుకు ఓ యాప్ ను డౌన్ లోడ్ చేసుకోవాలని సుభాష్ ను నమ్మించారు. ఆ తర్వాత సుభాష్ రావు యాప్ ను డౌన్ లోడ్ చేసుకోగా... రూ.1,06,910 అకౌంట్ నుంచి డెబిట్ అయినట్లుగా మొబైల్ కు మెసేజ్ వచ్చింది. ఆ తర్వాత తనకు వచ్చిన ఫోన్ కాల్ ఆధారంగా ఆ నెంబర్ కు ఫోన్ చేయడంతో స్విచ్ ఆఫ్ వచ్చింది. దీంతో ఆందోళనకు గురైన సుభాష్ రావు.. సైబర్ క్రైమ్ పోలీసులకు ఫిర్యాదు చేశారు. మోసపోయానని గ్రహించిన ఆ వ్యక్తి.. స్థానిక సదాశివనగర్ పోలీసులను ఆశ్రయించారు. ఈ ఘటనపై సదాశివనగర్ పోలీసులు కేసు నమోదు చేసుకుని దర్యాప్తు చేస్తున్నారు.
