- వారసత్వ రాజకీయాలు యంగ్ టాలెంట్ను అణచివేస్తున్నాయి
- దేశ అభివృద్ధికి స్వాతంత్ర్య పోరాట స్ఫూర్తిని చాటాలి
- అంతరిక్ష రంగంలో భారత్ దూసుకెళ్తున్నది
- చంద్రుడి దక్షిణ ధ్రువంపై దిగిన తొలి దేశంగా నిలిచినం
- తెలుగు ప్రజలకు భాషా దినోత్సవ శుభాకాంక్షలు
- 113వ మన్ కీ బాత్ లో మోదీ
న్యూఢిల్లీ: ఎలాంటి నేపథ్యంలేని యువత రాజకీయాల్లోకి రావాలని ప్రధాని మోదీ మరోసారి పిలుపునిచ్చారు. దేశ అభివృద్ధి, భవిష్యత్తుతోపాటు వికసిత్ భారత్ లక్ష్యం సాధించేందుకు ఇది అవసరమని పేర్కొన్నారు. వారసత్వ రాజకీయాలు యంగ్ టాలెంట్ను అణచివేస్తున్నాయని తెలిపారు. ఆదివారం ప్రసారమైన 113వ ‘మన్ కీ బాత్’ ఎపిసోడ్లో మోదీ ఈ వ్యాఖ్యలు చేశారు.
అభివృద్ధి చెందిన భారత్, బలమైన ప్రజాస్వామ్యం కోసం యువత ప్రజా జీవితంలోకి రావాలని అన్నారు. ఎలాంటి రాజకీయ నేపథ్యం లేని లక్ష మంది యువత పాలిటిక్స్లోకి రావాలని స్వాతంత్య్ర దినోత్సవం సందర్భంగా ఎర్రకోటనుంచి తాను ఇచ్చిన పిలుపునకు విస్తృత స్పందన వచ్చిందని పేర్కొన్నారు. పలువురు యువత సోషల్మీడియాలో సూచనలు ఇవ్వడమేగాక తనకు లేఖలు రాశారని చెప్పారు. ఇది నిజంగా తాము ఊహించలేదని పలువురు లేఖల్లో పేర్కొన్నట్టు చెప్పారు.
స్వాతంత్ర్య పోరాట స్ఫూర్తిని చాటాలి
ఎలాంటి పొలిటికల్ బ్యాక్గ్రౌండ్ లేకున్నా అనేక మంద్రి ప్రజలు దేశ స్వాతంత్య్రోద్యమంలో పాల్గొన్నారని మోదీ తెలిపారు. వికసిత్ భారత్ లక్ష్యాన్ని చేరుకునేందుకు ఇప్పుడు కూడా అదే స్ఫూర్తిని చాటాల్సిన అవసరం ఉందన్నారు. పెద్ద సంఖ్యలో యువత రాజకీయాల్లో చేరేందుకు సిద్ధంగా ఉన్నట్టు మోదీ తెలిపారు. వారికి సరైన అవకాశం, మార్గదర్శకత్వం అవసరమని పేర్కొన్నారు. ఈ అంశంపై సలహాలు పంపినవారందరికీ ధన్యవాదాలు తెలుపుతున్నట్టు చెప్పారు.
అంతరిక్ష రంగంలో సంస్కరణలతో యువతకు లబ్ధి
ఈ ప్రోగ్రామ్లో భాగంగా మోదీ.. ఐఐటీ మద్రాస్ పూర్వ విద్యార్థులు, గెలాక్సీ ఐ స్పేస్స్టార్టప్కు చెందిన ఔత్సాహిక పారిశ్రామికవేత్తలతో మాట్లాడారు. భారత్అంతరిక్ష రంగంలో దూసుకెళ్తున్నదని గుర్తుచేశారు. ఈ రంగంలో తీసుకొచ్చిన అనేక సంస్కరణలతో యువత పెద్ద ఎత్తున లబ్ధి పొందినట్టు వెల్లడించారు. చంద్రయాన్–3 విజయానికి గుర్తుగా ఈ నెల 23న తొలి జాతీయ అంతరిక్ష దినోత్సవాన్ని జరుపుకున్నామని గుర్తుచేశారు. చంద్రుడి దక్షిణ ధ్రువం (శివశక్తి పాయింట్)పై కాలుమోపిన తొలి దేశంగా భారత్ నిలిచిందని అన్నారు. అంతరిక్ష రంగం యువతను ఆకర్షిస్తున్నదని చెప్పారు.
హర్ఘర్ తిరంగా, పూరా దేశ్ తిరంగా సక్సెస్
ఈ ఏడాది హర్ఘర్తిరంగా, పూరా దేశ్ తిరంగా కార్యక్రమాలు సక్సెస్ అయ్యాయని మోదీ తెలిపారు. ఇండ్లు, స్కూళ్లు, కాలేజీలు, యూనివర్సిటీలు, దుకాణాలు, ఆఫీసులపై త్రివర్ణ పతాకం రెపరెపలాడిందని అన్నారు. తన పిలుపు మేరకు కోట్లాది మంది జాతీయ జెండాలతో ఫొటోలు దిగి వెబ్సైట్లో అప్లోడ్ చేశారని తెలిపారు. స్వాతంత్ర్య దినోత్సవం ఓ సామాజిక వేడుకగా మారిందని వెల్లడించారు. ప్రపంచంలోనే అత్యంత ఎత్తైన చీనాబ్ రైల్వే బ్రిడ్జిపై 750 మీటర్ల పొడవున్న జెండాతో తిరంగా ర్యాలీని కూడా తీశారని చెప్పారు. శ్రీనగర్లోని దాల్ సరస్సుతోపాటు దేశంలోని వివిధ చోట్ల జరిగిన తిరంగా యాత్రలను ప్రస్తావించారు.
తెలుగు.. అద్భుతమైన భాష
తెలుగు.. అద్భుతమైన భాష అని మోదీ అన్నారు. ఆగస్టు 29న తెలుగు భాషా దినోత్సవమని గుర్తు చేశారు. ఈ సందర్భంగా ప్రపంచవ్యాప్తంగా ఉన్న తెలుగు మాట్లాడే ప్రజలందరికీ శుభాకాంక్షలు తెలిపారు. చిన్నారులు, మహిళల్లో పోషకాహార లోపాన్ని నివారించేందుకు అందరూ చేతులు కలపాలని పిలుపునిచ్చారు. అలాగే, వర్షపు నీటిని ఒడిసిపట్టి కాపాడుకునేందుకు ఉద్దేశించిన ‘క్యాచ్ ద రెయిన్ మూవ్మెంట్’లో ప్రజలు భాగస్వాములు కావాలని కోరారు. పారిస్లో పారాలింపిక్స్ప్రారంభం కానున్నాయని, ఇందులో పాల్గొనేందుకు దేశానికి చెందిన దివ్యాంగ క్రీడాకారులు అక్కడికి చేరుకున్నారని చెప్పారు. వారిని 140 కోట్లమంది భారతీయులు ప్రోత్సహిస్తున్నందుకు సంతోషంగా ఉందన్నారు.
