- మూసీని బాగుచేస్తుంటే అవినీతి అంటున్నరు
- పీసీసీ చీఫ్ మహేశ్ గౌడ్ ఫైర్
- హైదరాబాద్ మరో వయనాడ్ కాకూడదంటే ప్రక్షాళన తప్పదు
నిజామాబాద్, వెలుగు: ప్రజలకు ఉపయోగపడే 1,500 చెరువులను బీఆర్ఎస్ నేతలు కబ్జా చేశారని పీసీసీ ప్రెసిడెంట్ మహేశ్ కుమార్ గౌడ్ ఆరోపించారు. తమ ప్రభుత్వం హైదరాబాద్లో మూసీ నదిని ప్రక్షాళన చేసే ప్రయత్నం చేస్తుంటే బీఆర్ఎస్ నేతలు ఇంగిత జ్ఞానం లేకుండా అవినీతి అంటూ ఆరోపణలు చేస్తున్నారని మండిపడ్డారు. ఎవరెన్ని కుట్రలు చేసినా ప్రక్షాళన జరిగి తీరుతుందని, నిజామాబాద్ జిల్లాలో కూడా హైడ్రా తరహా వ్యవస్థ తప్పక వస్తుందన్నారు.
శనివారం ఇందూరులో మీడియాతో ఆయన చిట్ చాట్ చేశారు. రాష్ట్రాన్ని రూ.ఏడున్నర లక్షల కోట్ల అప్పులతో తమకు అప్పగించినా ప్రజలికిచ్చిన ప్రతి హామీని నిలబెట్టుకుంటూ ముందుకు సాగుతున్నామని చెప్పారు. మాజీ సీఎం కేసీఆర్ మాఫీ చేసిన పంట రుణాల విలువ ఎంతో హరీశ్ రావు చెప్పాలని డిమాండ్ చేశారు. తాము అధికారం చేపట్టిన 9 నెలల్లోనే రూ.18 వేల కోట్లు మాఫీ చేశామని, దీనిపై చర్చకు సిద్ధంగా ఉన్నామని సవాల్ చేశారు.
నాయకులందరికీ అందుబాటులో ఉండే హరీశ్ రావు మంచోడనుకున్నానని, ఆయన అబద్ధాలు మాట్లాడతాడనుకోలేదని ఎద్దేవా చేశారు. హైడ్రాపై కూడా బీఆర్ఎస్ నేతలు దుష్ప్రచారం చేస్తున్నారన్నారు. చెరువుల సంరక్షణ అవసరమని, లేకపోతే మున్ముందు హైదరాబాద్లో వయనాడ్ లాంటి పరిస్థితి వస్తుందని ఆందోళన వ్యక్తం చేశారు. హైడ్రా ఏర్పాటుపై వ్యక్తిగతంగా సీఎం రేవంత్ రెడ్డిని అభినందించానన్నారు. ఇటీవల వరదలు వచ్చి ప్రజలు ఇబ్బందులు ఎదుర్కొన్నా బీఆర్ఎస్ అధినేత కేసీఆర్ ఫాంహౌస్ నుంచి బయటకు రాలేదని విమర్శించారు.
నిజాం షుగర్ ఫ్యాక్టరీ రీఓపెన్కు కట్టుబడి ఉన్నాం
తన రాజకీయ ఎదుగుదలలో జర్నలిస్టుల పాత్ర ఎంతో ఉందని మహేశ్ గౌడ్ తెలిపారు. జర్నలిస్టుల ఇంటి స్థలాల పరిష్కారానికి తన పరిధిలో చొరవ తీసుకుంటానని హామీ ఇచ్చారు. నిజాం షుగర్ ఫ్యాక్టరీ రీఓపెన్కు కట్టుబడి ఉన్నామని చెప్పారు. నిజామాబాద్ జిల్లాకు మరో మెడికల్ కాలేజీ అవసరమని, స్పోర్ట్స్ స్టేడియంను అభివృద్ధి చేస్తామన్నారు. క్రీడాకారులను ప్రోత్సహించడానికి జిల్లాకు చెందిన బాక్సర్లు హసన్ అలీ, నిఖత్ జరీన్ను డీఎస్పీలుగా నియమించామని చెప్పారు.
