కామారెడ్డి జిల్లా తాడ్వాయి మండలంలోని దేమే కలాన్ గ్రామానికి చెందిన ఓ వ్యాపారి వద్ద కొనుగోలు చేసిన రాజ్మా విత్తనాలు మొలకెత్తకపోవడంతో పలు గ్రామాలకు చెందిన రైతులు ఆందోళన వ్యక్తం చేస్తున్నారు. నకిలీ విత్తనాల కారణంగా సుమారు 100 మంది రైతులకు చెందిన 300 ఎకరాల్లో పంట సాగు ప్రశ్నార్థకంగా మారిందని రైతులు ఆవేదన వ్యక్తం చేస్తున్నారు.
తాడ్వాయి మండలంలోని దేమే, కన్కల్, కరడ్‌పల్లి, తాడ్వాయి, చందాపూర్, బ్రహ్మాజీవాడి, కృష్ణాజీవాడి, సంగోజీవాడి తదితర గ్రామాలకు చెందిన రైతులు సదరు వ్యాపారి వద్ద రాజ్మా విత్తనాలు కొనుగోలు చేసి తమ పొలాల్లో విత్తారు. అయితే విత్తనాలు వేసి రోజులు గడుస్తున్నా మొలకలు రాకపోవడంతో రైతులు ఆందోళన చెందుతున్నారు. గత పదేళ్లుగా ఇదే వ్యాపారి వద్ద విత్తనాలు కొనుగోలు చేస్తున్నామని, ఈసారి నాణ్యత లేని విత్తనాలు విక్రయించడంతో తీవ్రంగా నష్టపోయామని పలువురు రైతులు పేర్కొంటున్నారు.
ఇప్పటికే ఎల్‌నినో ప్రభావంతో వర్షాలు లేక, భూగర్భ జలాలు అడుగంటిపోతున్న తరుణంలో ఆరుతడి పంటగా రాజ్మాను సాగు చేసిన రైతులకు ఈ పరిస్థితి మరింత ఇబ్బందికరంగా మారింది. విత్తనాలు మొలకెత్తకపోవడంతో పెట్టుబడులు వృథా అయ్యాయని, తిరిగి విత్తనాలు వేసుకునే పరిస్థితి కూడా లేదని రైతులు ఆవేదన వ్యక్తం చేస్తున్నారు.
వ్యవసాయ శాఖ అధికారుల నిర్లక్ష్యం కారణంగానే కొంతమంది వ్యాపారులు నకిలీ విత్తనాలు విక్రయిస్తున్నారని రైతులు ఆరోపిస్తున్నారు. రైతులకు నష్టం కలిగించిన విత్తన వ్యాపారిపై విచారణ జరిపి కఠిన చర్యలు తీసుకోవాలని డిమాండ్ చేస్తున్నారు.
ఈ మేరకు బాధిత రైతులు తాడ్వాయి మండల వ్యవసాయ అధికారి (ఏవో), తహసీల్దార్ (ఎమ్మార్వో)కు వినతిపత్రం సమర్పించారు. సంబంధిత అధికారులు వెంటనే స్పందించి విత్తనాల నాణ్యతపై విచారణ చేపట్టడంతో పాటు నష్టపోయిన రైతులకు న్యాయం చేయాలని కోరారు.
