ఆన్లైన్లో బట్టలు కొంటే… నచ్చకపోతే నాలుగు రోజుల తర్వాతైనా రిటర్న్ చేయొచ్చు. ఆఫ్లైన్లో ఆ సౌలభ్యం లేదు. అందుకే ఇటీవల చాలా మంది ఆన్లైన్లో బట్టలు కొంటున్నారట. అయితే ఆన్లైన్లో బట్టలు కొని రిటర్న్ ఇస్తున్న వాళ్లంతా ఇలా నచ్చకపోవడమో, సైజ్ సరిపోకపోవడమో, క్వాలిటీ బాగోలేకపోవడమో కాదట. ఇలా దుస్తులు రిటర్న్ ఇవ్వడానికో విచిత్రమైన కారణం ఉంది. అదే ‘ఇన్స్టాగ్రామ్’.
సోషల్ మీడియా వాడకం విపరీతంగా పెరిగిపోయిన రోజులివి. చాలా మంది యూజర్లు తమ ఫొటోల్ని ఫేస్బుక్, ట్విట్టర్, ఇన్స్టాగ్రామ్లో అప్లోడ్ చేస్తున్నారు. ప్రత్యేకంగా ఫొటోలు తీయించుకుని సోషల్ మీడియాలో అప్లోడ్ చేస్తున్నారు. వీటికి వచ్చే లైకులు, కామెంట్ల కోసం వాళ్లు ఎంత ఖర్చుకైనా వెనుకాడటం లేదు. కొందరు సెలబ్రిటీలైతే వీటి కోసమే ఫొటో షూట్లు కూడా చేయించుకుంటున్నారు. సెలబ్రిటీల దగ్గర్నుంచి సామాన్యుల వరకు సోషల్ మీడియా ఫొటోలను ప్రతిష్టాత్మకంగా తీసుకుంటున్నారు. ప్రత్యేకంగా డ్రెస్సులు వేసుకుని, మేకప్ చేసుకుని, కొత్త ప్రదేశాల్ని ఎంచుకుని మరీ ఫొటోలు తీయించుకుంటున్నారు.
ఈ ఫొటోల్లో వీటన్నింటినీ చూసి ఫాలోవర్లు లైకులు, కామెంట్లతో స్పందిస్తున్నారు. కొంతమంది వేసుకునే డ్రెస్సుల్ని చూసి వావ్.. అంటున్నారు. అయితే ఇకపై ఎవరైనా మంచి డ్రెస్సుతో ఇలా పోస్ట్ చేస్తే కాస్త ఆలోచించండి. ఎందుకంటే ఆ డ్రెస్సు వాళ్లు సొంతంగా కొనుక్కున్నదై ఉండదు. జస్ట్… ఇన్స్టాగ్రామ్ కోసమే ఆన్లైన్లో ఆర్డరిచ్చుకున్నదై ఉంటుంది. ఈ ఫొటో షూట్ అయిపోగానే వాటిని తిరిగి రిటర్న్ చేస్తున్నారట చాలా మంది. అయితే మనదగ్గర కాదులెండి. బ్రిటన్లోనట.
అక్కడి ‘బార్క్లే కార్డ్’ అనే సంస్థ జరిపిన అధ్యయనం ప్రకారం ప్రతి పది మందిలో ఒకరు ఇలా కేవలం ఇన్స్టాగ్రామ్ కోసమే దుస్తుల్ని షాపింగ్ చేస్తున్నారట. వచ్చిన దుస్తులతో ఫొటో తీయించుకోవడం.. ఇన్స్టాలో అప్లోడ్ చేసేయడం.. ఎంచక్కా వాటిని రిటర్న్ చేసేయడం… ఇదీ చాలా మంది చేస్తున్న పని. ఇది ఆడవాళ్లే చేస్తున్నారనుకుంటే పొరపాటు. మగవాళ్లే ఎక్కువగా ఇలా చేస్తున్నారట. అయితే కొన్ని బ్రాండ్లు ఇలా రెగ్యులర్ వేర్ కాకుండా ఇన్స్టా కోసమే.. అంటే ఒకటి, రెండు సార్లు వాడి పక్కనపెట్టేసేలాంటి దుస్తుల్ని రూపొందిస్తున్నాయి.
