అవగాహన కల్పించని అధికారులు.. ‘సూర్యఘర్’కు అప్లై చేసుకోవటానికి ముందుకు రాని జనం

• వినియోగదారులకు అవగాహన కల్పించని ఆఫీసర్లు
• వనపర్తి జిల్లాలో దరఖాస్తు చేసుకొనేందుకు ఆసక్తి చూపని ప్రజలు

వనపర్తి, వెలుగు: విద్యుత్​ వినియోగం పెరిగిపోతున్న నేపథ్యంలో సోలార్​ విలేజ్​ స్కీమ్​కు కేంద్ర ప్రభుత్వం శ్రీకారం చుట్టింది. జిల్లాలో ఈ పథకంపై సంబంధిత అధికారులు అవగాహన కల్పించడం లేదనే విమర్శలున్నాయి. గ్రామాల్లో సోలార్​ ప్యానెళ్లను ఏర్పాటు చేసి సోలార్​ విలేజీల ఏర్పాటును ప్రోత్సహిస్తోంది. ఈ క్రమంలో తెలంగాణ రెడ్కో సంస్థ, ప్రధాన మంత్రి సూర్యఘర్​ ముఫ్త్​ బిజిలీ యోజన(పీఎంఎస్​జీఎంబీవై) పథకాన్ని అమలు చేసేందుకు విస్తృత ప్రచారం చేస్తోంది.  ఈ పథకం కింద సోలార్​ ప్యానెళ్లను ఏర్పాటు చేసుకునేలా ప్రోత్సహించేందుకు కేంద్ర ప్రభుత్వం ఒక్కో గ్రామానికి రూ. కోటి చొప్పున నజరానా ప్రకటించింది. 

వనపర్తి జిల్లాలో 10 గ్రామాలు ఎంపిక..

వనపర్తి జిల్లాలో 10 గ్రామాలను పైలెట్​ ప్రాజెక్టు కింద ఎంపిక చేసి సోలార్​ ప్యానెల్​ ఏర్పాటు చేసుకునేలా ప్రజలకు అవగాహన కల్పించేందుకు చర్యలు చేపట్టారు. గ్రామస్తులంతా దరఖాస్తు చేసుకోవాలని కోరారు. కానీ, పూర్తి స్థాయిలో వారికి పథకం గురించి అవగాహన కల్పించడం లేదనే విమర్శలున్నాయి. 2011 జనాభా లెక్కల ప్రకారం 5 వేల కంటే ఎక్కువ జనాభా ఉన్న గ్రామాలను పైలెట్​ ప్రాజెక్టు కింద ఎంపిక చేశారు. ఖిల్లాగణపురం, మానాజీపేట, పెద్దమందడి, గోపాల్​పేట, ఏదుట్ల, బుద్దారం, పాన్​గల్, పెద్దగూడెం, శ్రీరంగాపురం, ఏదుల గ్రామాలను పైలట్​ ప్రాజెక్టుగా ఎంపిక చేశారు. మొదట్లో కొన్ని గ్రామాల్లో అవగాహన కల్పించిన అధికారులు ఆ తరువాత పట్టించుకోవడం లేదు. 

బిల్లులు ఎక్కువ వచ్చే వారికి ఉపయోగకరం..

ప్రతి నెలా రూ.2 వేలకు పైగా విద్యుత్​ బిల్లులు చెల్లించే వారికి ఈ సోలార్​ ప్యానెల్​ ఉపయోగకరంగా ఉంటుంది. ఒకటి, రెండు, మూడు కిలో వాట్ విద్యుత్​ వినియోగించే వారికి ఎక్కువగా ఉపయోగం ఉంటుంది. కిలో వాట్​ సోలార్​ ప్యానెల్​ను ఏర్పాటు చేసుకునే వినియోగదారులకు రూ.30 వేల సబ్సిడీ, రెండు కిలోవాట్​లకు రూ.60 వేలు, మూడు కిలోవాట్​లకు రూ.78 వేల చొప్పున సబ్సిడీ ఉంటుంది. సోలార్  ప్యానెల్​ ఏర్పాటు కోసం 100 నుంచి 300 చదరపు అడుగుల రూఫ్  అవసరం ఉంటుంది. ఇప్పటి వరకు జిల్లాలో కేవలం 102 దరఖాస్తులు రాగా, విస్తృత ప్రచారం కల్పిస్తే మరింత మంది దరఖాస్తు చేసుకునే అవకాశం ఉందని చెబుతున్నారు.