జయశంకర్ భూపాలపల్లి/మహదేవపూర్, వెలుగు: కరోనా వ్యాక్సిన్ కోసం తెలంగాణ ప్రజలు మహారాష్ట్రకు క్యూ కడుతున్నారు. శనివారం మహారాష్ట్ర లోని అంకీస, సిరోంచ హాస్పిటల్ లో సుమారు 100 మంది తెలంగాణవాసులు వ్యాక్సిన్ వేయించుకున్నారు. భూపాలపల్లి జిల్లాలోని మహదేవపూర్, పలిమెల మహాముత్తారం, కాటారం, మల్హర్ తదితర మండలాల్లో 18 నుంచి 44 ఏళ్లలోపు వారికి వ్యాక్సిన్ ప్రక్రియ ఇంకా మొదలు కాలేదు. పక్క రాష్ట్రమైన మహారాష్ట్రలోని గడ్చిరోలి జిల్లా సిరొంచ, అంకీస తదితర గవర్నమెంట్ హాస్పిటల్స్లో మాత్రం మొదటి డోసును సోమవారం నుంచి ఉచితంగా వేస్తున్నారు. ఈ హాస్పిటల్స్ తెలంగాణ బార్డర్కు 5 నుంచి 10 కి.మీ. దూరంలో ఉండడంతో జయశంకర్ భూపాలపల్లి జిల్లాతోపాటు మంచిర్యాల జిల్లా కోటపల్లి మండలాల నుంచి కూడా ప్రజలు మహారాష్ట్రకు వెళ్లి వ్యాక్సిన్ వేయించుకుంటున్నారు.
