తిరువనంతపురం: ఆక్సిజన్ అవసరాలు తమకూ పెరిగాయని, ఇకపై పొరుగు రాష్ట్రాలకు ఇవ్వలేమని ప్రధాని నరేంద్ర మోడీకి కేరళ ముఖ్యమంత్రి పినరయి విజయన్ తేల్చి చెప్పారు. ఇప్పటికే పొరుగు రాష్ట్రాలకు చాలా మొత్తంలో ఆక్సిజన్ను సరఫరా చేశామన్నారు. దీంతో తమవద్ద కేవలం 86 టన్నుల బఫర్ స్టాక్ మాత్రమే ఉందని, ఆ స్టాక్ తమ అవసరాలకూ సరిపోదని చెప్పారు. అయితే, సెంట్రల్ కమిటీ ఆఫ్ ఆక్సిజన్ అలొకేషన్ నిర్ణయం ప్రకారం మే 6న నిర్ణయించినట్టుగా తమిళనాడుకు 40 టన్నుల ఆక్సిజన్ను పంపిస్తామన్నారు. ఆ తర్వాత వేరే ఏ రాష్ట్రానికీ ఆక్సిజన్ను సరఫరా చేయలేమని చెప్పారు. ప్రస్తుతం రాష్ట్రంలో 4,02,640 యాక్టివ్ కేసులున్నాయని, ఈ నెల 15 నాటికి అవి 6 లక్షలకు పెరిగే అవకాశముందని చెప్పారు. దీంతో ఆక్సిజన్ అవసరం కూడా 450 టన్నులకు పెరిగే అవకాశముంటుందన్నారు. కాబట్టి రాష్ట్రంలో తయారయ్యే 219 టన్నుల ఆక్సిజన్ను తమ రాష్ట్రానికే కేటాయించాలని ఆయన కోరారు. మరిన్ని క్రయోజెనిక్ ఆక్సిజన్ ట్యాంకర్లను కేటాయించాలని విజ్ఞప్తి చేశారు.
