న్యూఢిల్లీ: రష్యా అధ్యక్షుడు పుతిన్కు ప్రధాని మోడీ పుట్టిన రోజు శుభాకాంక్షలు తెలియజేశారు. పుతిన్ 73వ బర్త్ డే సందర్భంగా మంగళవారం (అక్టోబర్ 7) ప్రధాని మోడీ ఆయనకు ఫోన్ చేశారు. ఈ సందర్భంగా పుతిన్కు బర్త్ డే విషెస్ చెప్పారు. పుతిన్ ఆయురారోగ్యాలతో ఉండాలని.. భవిష్యత్ ప్రయత్నాలన్నింటిలోనూ విజయం సాధించాలని ఆకాంక్షించారు.
ఇండియా-రష్యా మధ్య ద్వైపాక్షిక సంబంధాలను మరింత బలంగా ముందుకు తీసుకెళ్తామని ఇరువురూ పునరుద్ఘాటించారు. ఇండియా--రష్యా స్పెషల్ అండ్ ప్రివిలేజ్డ్ స్ట్రాటజిక్ పార్టనర్షిప్లో భాగంగా ఇరుదేశాల మధ్య ఇంధనం, రక్షణ, వాణిజ్యం, అంతరిక్ష సహకారం వంటి అంశాలపై చర్చించారు. పుతిన్ భారత పర్యటన కోసం ఆసక్తిగా ఎదురుచూస్తున్నట్లు ప్రధాని మోడీ పేర్కొన్నారు.
కాగా, 2025 చివర్లో 23వ భారత్-రష్యా వార్షిక శిఖరాగ్ర సమావేశం జరగనుంది. రష్యా అధ్యక్షుడు పుతిన్ ఈ సమావేశంలో పాల్గొనేందుకు స్వయంగా ఇండియా రానున్నాడు. ఈ సమావేశం రెండు దేశాల మధ్య దీర్ఘకాలిక భాగస్వామ్యంలో మరో ముఖ్యమైన మైలురాయిగా నిలువనుంది.
