టీఆర్ఎస్తో ప్రశాంత్ కిశోర్ దోస్తీ

రాష్ట్ర కాంగ్రెస్లో తొలగిన అయోమయం
రేవంత్ వర్గీయుల్లో సంబురం.. వారం రోజుల గందరగోళానికి ముగింపు

హైదరాబాద్, వెలుగు: ఎన్నికల వ్యూహకర్త ప్రశాంత్ కిశోర్ కాంగ్రెస్కు దూరమయ్యారు. కాంగ్రెస్లో చేరాలని సోనియా గాంధీ ఇచ్చిన ఆఫర్ను ఆయన తిరస్కరించారు. ఈ విషయాన్ని ఏఐసీసీ అధికార ప్రతినిధి రణ్దీప్ సింగ్సుర్జేవాలా మంగళవారం ట్వీట్ చేశారు. కొద్ది నిమిషాలకే పీకే దీన్ని ధ్రువీకరించారు. వెనువెంటనే జరిగిన ఈ పరిణామాలతో రాష్ట్ర కాంగ్రెస్ నేతలు ఊపిరి పీల్చుకున్నట్లయింది. అయితే.. టీఆర్ఎస్తో పీకే దోస్తీ కొనసాగుతుందనే విషయంలో క్లారిటీ వచ్చింది. వాస్తవానికి ప్రశాంత్ కిశోర్ కాంగ్రెస్లో చేరుతారని వారం పది రోజుల నుంచి చర్చ జరుగుతూ ఉంది.

కాంగ్రెస్ చీఫ్ సోనియా గాంధీతో పీకే మూడు సార్లు సమావేశమైనందున ఇది మరింత బలపడింది. పీకేను కాంగ్రెస్లో చేర్చుకోవాలంటే ఆయన ఇతర పార్టీలతో పెట్టుకున్న ఎన్నికల వ్యూహాల ఒప్పందాలను రద్దు చేసుకోవాలని సోనియా షరతు విధించారని కూడా ప్రచారం జరిగింది. ఈ క్రమంలో పీకే శనివారం (23న) రాష్ట్రానికి వచ్చి ప్రగతి భవన్లో సీఎం కేసీఆర్ను కలిశారు. రెండు రోజుల పాటు ఇక్కడే ఉన్న ఆయన సీఎం ఫామ్హౌస్కు కూడా వెళ్లి చర్చలు జరిపారు. వచ్చే ఎన్నికల కోసం టీఆర్ఎస్ తరఫున తన ఐప్యాక్ సంస్థ పని చేస్తుందని, తాను కాంగ్రెస్లో చేరబోతున్నానని చెప్పడానికే వచ్చారని అంతా నమ్మారు. టీఆర్ఎస్ వర్కింగ్ ప్రెసిడెంట్, మంత్రి కేటీఆర్.. ఐప్యాక్ తమ పార్టీ కోసం పని చేస్తుందని మీడియాకు తెలిపారు.
పీసీసీ చీఫ్ రేవంత్రెడ్డి కూడా కాంగ్రెస్లో చేరబోయే పీకే టీఆర్ఎస్తో కుదుర్చుకున్న ఒప్పందాన్ని రద్దు చేసుకునేందుకే వచ్చారన్నారు. ఈ పరిణామాలు ఇలా కొనసాగుతున్న క్రమంలోనే కాంగ్రెస్, టీఆర్ఎస్ పొత్తు కలుస్తున్నాయని ప్రచారం జరిగింది. దీంతో కొందరు కాంగ్రెస్ నేతలు కూడా అయోమయంలో పడ్డారు. అసలేం జరుగుతుందో అర్థం కాక గందరగోళానికి గురయ్యారు. ఈ చర్చంతా ఇంకా హాట్హాట్గా కొనసాగుతూ ఉండగానే పీకే విషయం మంగళవారం తేలిపోవడంతో కాంగ్రెస్ నేతలు ఊపిరి పీల్చుకున్నారు. ముఖ్యంగా రేవంత్ వర్గీయులు సంతోషంగా ఉన్నారు. కేసీఆర్ నీడనూ కాంగ్రెస్పై పడనీయబోమనే రేవంత్ మాటలకు తాజా పరిణామాలతో బలం చేకూరిందని చెప్తున్నారు.
డబ్బు పనిచేసిందా.. ఇంకేమైనానా?
పీకే ఇక టీఆర్ఎస్ తరఫున పని చేస్తారనేది స్పష్టమైనందుకు రాష్ట్ర కాంగ్రెస్ నేతలు సంబురపడుతున్నారు. ఇటీవల జీహెచ్ఎంసీ ఆఫీసు దగ్గరకు వచ్చిన ప్రజాశాంతి పార్టీ అధ్యక్షుడు కేఏ పాల్ మాట్లాడుతూ.. కేసీఆర్, పీకేకి మధ్య రెండు వందల కోట్ల రూపాయల డీల్ కుదిరిందని ఆరోపించారు. వాస్తవానికి పీకే కాంగ్రెస్లో చేరే ఉద్దేశంతోనే ఉన్నారని, అయితే కేసీఆర్తో రెండు రోజుల పాటు జరిగిన చర్చల ప్రభావం ఆయనపై పడి ఉంటుందని సీనియర్ కాంగ్రెస్ నేత ఒకరు అన్నారు. డబ్బు పని చేసిందా లేదా ఇంకేమైనా అంశాల ప్రభావం ఉందా అన్నది అనుమానంగా ఉందని పేర్కొన్నారు.

మరో వ్యూహకర్త సునీల్ కొనుగోలు ఎలాంటి పాత్ర పోషిస్తారనే విషయంలో కూడా కాంగ్రెస్లో సందిగ్ధత తొలగిందని ఆ పార్టీ నేతలు సంతోషిస్తున్నారు. వచ్చే ఎన్నికల్లో తమకు సునీల్ వ్యూహకర్తగా కొనసాగుతారనే విషయంలో స్పష్టత వచ్చిందంటున్నారు. కాగా, తాజాగా పీసీసీ వర్కింగ్ ప్రెసిడెంట్ మహేష్ కుమార్ గౌడ్.. పీకే తమ పార్టీలో చేరకపోయినా, సూచనలు ఇస్తారని చెబుతూ ఒక వీడియో విడుదల చేశారు. ఏఐసీసీ నుంచి తమకు ఇలాంటి సమాచారమే వచ్చిందన్నారు.