గచ్చిబౌలి, వెలుగు: రెండో అంతస్తులో వాకింగ్ చేస్తూ కళ్లు తిరిగి కింద పడి గర్భిణి చనిపోయిన ఘటన చందానగర్ పీఎస్ పరిధిలో జరిగింది. ఎస్సై రమేశ్ తెలిపిన వివరాల ప్రకారం.. లింగంపల్లిలోని వెంకట్రెడ్డి కాలనీలో ఉండే శ్రీనిక(23) తల్లిదండ్రులు ఆమె చిన్నప్పుడే చనిపోయారు. దీంతో ఆమెను పిన్ని, బాబాయి చక్రాల స్వప్న, కృష్ణ దంపతులు పెంచి పెద్ద చేశారు. పటాన్ చెరులోని రుద్రారానికి చెందిన శ్రవణ్కుమార్కు ఇచ్చి పెండ్లి చేశారు.
ప్రస్తుతం శ్రీనిక 5 నెలల గర్భిణి. మెడికల్ చెకప్ కోసం ఈ నెల 15న ఆమె లింగంపల్లిలోని పిన్ని స్వప్న ఇంటికి వచ్చింది. బుధవారం స్థానిక ప్రైవేటు ఆస్పత్రిలో చెకప్ చేయించుకుంది. గురువారం ఉదయం 7.30 గంటలకు బిల్డింగ్ రెండో అంతస్తు వరండాలో ఆమె వాకింగ్ చేస్తోంది. అదే టైమ్లో కళ్లు తిరిగి ప్రమాదవశాత్తు రెండో ఫ్లోర్ ర్యాంప్పై నుంచి గ్రౌండ్ ఫ్లోర్లో పడిపోయింది. తీవ్రంగా గాయపడ్డ శ్రీనికను కుటుంబసభ్యులు ఆస్పత్రికి తీసుకెళ్లగా.. అక్కడ ట్రీట్ మెంట్ తీసుకుంటూ 11.43 గంటలకు మృతి చెందింది. శ్రీనిక అప్పుడప్పుడు కళ్లు తిరిగి పడిపోయేదని కుటుంబసభ్యులు తెలిపారు. పిన్ని స్వప్న ఇచ్చిన కంప్లయింట్ మేరకు పోలీసులు కేసు ఫైల్ చేశారు.
