- 50 రోజుల్లో 4 వేల కి.మీ. ప్రయాణం
- బంగ్లాదేశ్లో 15 రోజులు పయనించి గువహటి దగ్గర రీ ఎంట్రీ
- జాతీయ పార్కుల గుండా జర్నీ
వారణాసి: రివర్ క్రూయిజ్ యాత్రల్లో ప్రపంచంలోనే ఎక్కడా లేని సుదీర్ఘ యాత్ర మరో నాలుగు రోజుల్లో మన దేశంలో ప్రారంభం కాబోతోంది. 50 రోజుల పాటు దాదాపు 4 వేల కిలోమీటర్ల దూరం ప్రయాణించే ఈ క్రూయిజ్ పేరు ‘గంగా విలాస్’.. ఉత్తరప్రదేశ్ లోని వారణాసి నుంచి మొదలయ్యే ఈ యాత్ర వివిధ చారిత్రక ప్రదేశాలను చుట్టుకుంటూ బంగ్లాదేశ్లోకి ప్రవేశిస్తుంది. బంగ్లాదేశ్లోనే 15 రోజుల పాటు ప్రయాణించి తిరిగి మన దేశంలోకి ఎంటరై అస్సాంలోని దిబ్రూగఢ్కు చేరుతుంది. అక్కడితో 50 రోజుల రివర్ క్రూయిజ్ జర్నీ పూర్తవుతుంది. ఈ యాత్రను వచ్చే శుక్రవారం(ఈ నెల 13న) ప్రధాని నరేంద్ర మోడీ చేతుల మీదుగా ప్రారంభింపజేసేందుకు అధికారులు ఏర్పాట్లు చేస్తున్నారు. కాగా, ఈ యాత్రకు టికెట్ ధర ఎంత అనే వివరాలను ఇటు నిర్వాహకులు కానీ అటు అధికారులు కానీ వెల్లడించలేదు. నిజానికి ఈ యాత్ర ఎప్పుడో ప్రారంభం కావాల్సింది. గతంలో పనులు పూర్తికాక ఒకసారి.. కరోనా లాక్ డౌన్ కారణంగా మరోసారి టూర్ ప్రారంభం వాయిదా పడింది. ఎట్టకేలకు ఈ నెల 13న గంగా విలాస్ ప్రయాణం మొదలుకానుంది. ఈ యాత్రలో పాల్గొనే ఫారినర్ల ద్వారా మన దేశంలోని పర్యాటక స్థలాల వివరాలు ప్రపంచానికి తెలుస్తాయని అధికారులు చెప్పారు. ఈ రివర్ క్రూయిజ్ మొదలయ్యాక మన దేశానికి వచ్చే టూరిస్టుల సంఖ్య కూడా పెరుగుతుందని అధికారులు ఆశాభావం వ్యక్తం చేస్తున్నారు. మరోవైపు, గంగా విలాస్ టూర్ కు సంబంధించిన టికెట్లన్నీ ఇప్పటికే అమ్ముడు పోయాయని, వచ్చే 2 నెలల దాకా ఫారిన్ టూరిస్టులే ఈ టికెట్లు బుక్ చేసుకున్నారని అనధికార వర్గాల సమాచారం.
వారణాసిలో ప్రారంభం..
రవిదాస్ ఘాట్లో గంగా విలాస్ టూర్ మొదలవుతుంది. ఇందులో 80 మంది ప్రయాణించొచ్చు. అంటారా లగ్జరీ రివర్ క్రూయిజెస్, జేఎం బాక్సిరివర్ క్రూయిజెస్లు ప్రభుత్వ భాగస్వామ్యంతో ‘గంగా విలాస్’ యాత్రను నిర్వహిస్తున్నాయి.
టూర్ విశేషాలు..
గంగా విలాస్ రివర్ క్రూయిజ్ మన దేశంలోని రెండు ప్రముఖ నదులు గంగ, బ్రహ్మపుత్ర నదుల్లో పయనిస్తుంది.
వారణాసి నుంచి బయలుదేరి ఘాజీపూర్, బక్సర్, పాట్నా గుండా ప్రయాణించి కోల్కతా చేరుతుంది.
బంగ్లాదేశ్లోకి ప్రవేశించిన తర్వాత దాదాపు 15 రోజుల పాటు ఆ దేశంలోని నదులమీదుగా ముందుకు సాగుతుంది.
గువహటి వద్ద మన దేశంలోకి తిరిగి ఎంటరవుతుంది. అక్కడి నుంచి దిబ్రూగఢ్కు చేరుకుంటుంది.
సుందర్బన్ డెల్టా, కజిరంగా నేషనల్ పార్క్సహా దేశంలోని పలు జాతీయ పార్కులు, శాంక్చురీల గుండా ఈ యాత్ర కొనసాగుతుంది
