కందనూలు, వెలుగు: నాగర్ కర్నూల్ జిల్లా తాడూరు మండలం సిర్సవాడలో ఆదివారం జడ్పీ హైస్కూల్ ప్రారంభోత్సవంలో ప్రోటోకాల్ పై గొడవ జరిగింది. మాజీ ఎమ్మెల్యే స్కూల్ను ప్రారంభించడం గందరగోళానికి దారి తీసింది. వివరాలిలా ఉన్నాయి.. మాజీ ఎమ్మెల్యే మర్రి జనార్దన్రెడ్డి తన ఎంజేఆర్ ట్రస్ట్కు చెందిన రూ.50 లక్షల ఫండ్స్తో 2022లో కొత్త స్కూల్ బిల్డింగ్కి శంకుస్థాపన చేశారు.
పనులు పూర్తి కావడంతో ఆదివారం స్కూల్ను ప్రారంభించాల్సి ఉంది. ముందుగా మాజీ ఎమ్మెల్యే తన అనుచరులతో కలిసి స్కూల్ గేట్ వద్ద ఏర్పాటు చేసిన రిబ్బన్కట్ చేసి, గతంలో ఏర్పాటు చేసిన శిలాఫలకాన్ని ప్రారంభించి వెళ్లిపోయారు. అనంతరం ఎమ్మెల్యే రాజేశ్రెడ్డి ఈ కార్యక్రమానికి వచ్చారు. అప్పటికే స్కూల్ను మాజీ ఎమ్మెల్యే ప్రారంభించినట్లు గుర్తించి డీఈవో గోవిందరాజులు, స్కూల్ హెచ్ఎంను పిలిచి ఆగ్రహం వ్యక్తం చేశారు.
కాంగ్రెస్ పార్టీ కార్యకర్తలు డీఈవో గోవిందరాజులు, మాజీ ఎమ్మెల్యేకు వ్యతిరేకంగా నినాదాలు చేశారు. దీంతో గందరగోళ పరిస్థితి నెలకొంది. పోలీసులు కలగజేసుకొని వారిని సముదాయించి, డీఈవోకు భద్రత కల్పించి అక్కడి నుంచి పంపించారు. అధికారుల తీరుపై అసంతృప్తి వ్యక్తం చేసిన ఎమ్మెల్యే స్కూల్ను ప్రారంభించకుండానే అక్కడి నుంచి వెళ్లిపోయారు. దీంతో ఆందోళన సద్దుమణిగింది. ఈ సందర్భంగా డీఈవో మాట్లాడుతూ స్కూల్ ప్రారంభోత్సవాన్ని వాయిదా వేస్తున్నట్లు తెలిపారు. మాజీ ఎమ్మెల్యే, ఎంజేఆర్ చారిటబుల్ ట్రస్ట్ అధినేత మర్రి జనార్దన్ రెడ్డి నిబంధనలకు విరుద్ధంగా 2022లో ఏర్పాటు చేసిన శిలాఫలకాన్ని ప్రారంభించారని, ఈ విషయంలో అధికారులకు ఎలాంటి సంబంధం లేదన్నారు.
