హైదరాబాద్, వెలుగు: రాష్ట్రంలో భూరికార్డుల నిర్వహణ, రిజిస్ట్రేషన్ల కోసం వినియోగిస్తున్న ధరణి పోర్టల్పై అధ్యయనం చేసేందుకు పంజాబ్ ప్రతినిధి బృందం బుధవారం రాష్ట్రానికి చేరుకుంది. పంజాబ్ రెవెన్యూ శాఖ సెక్రటరీ, కమిషనర్ మన్వేష్ సింగ్, రెవెన్యూ కమిషన్ మాజీ సభ్యుడు, సలహాదారు నరేందర్ సింగ్ సంఘా, మొహాలీ జిల్లా రెవెన్యూ అధికారి ప్రదీప్ సింగ్ బెయిన్స్తో కూడిన బృందం మీ సేవ కమిషనర్ జీటీ వెంకటేశ్వర్ రావుతో భేటీ అయ్యింది. ఈ సందర్భంగా వెంకటేశ్వర్ రావు మాట్లాడారు. దేశంలోనే తొలిసారిగా ధరణి పోర్టల్లో చాలా ఫీచర్లను ప్రవేశపెట్టామని, ఈ పోర్టల్ ఇతర రాష్ట్రాలు అనుసరించదగినదని సూచించారు. అలాగే రాష్ట్రంలో చేపట్టిన భూరికార్డుల ప్రక్షాళన, పట్టాదారు పాస్బుక్స్ జారీ, ఎలాంటి మోసాలకు తావులేని రిజిస్ట్రేషన్లు, మ్యుటేషన్ విధానం గురించి ఆయన పంజాబ్ అధికారులకు వివరించారు. ఆ తర్వాత అధికారుల బృందం శంషాబాద్ తహసీల్దార్ ఆఫీసును సందర్శించింది. ఫీల్డ్ లెవల్లో ధరణి పోర్టల్ పనితీరును పరిశీలించారు. ల్యాండ్ రికార్డుల నిర్వహణలో పారదర్శకత, జవాబుదారీతనాన్ని పాటిస్తున్న తెలంగాణ ప్రభుత్వ కృషిని వారు అభినందించారు.
