నేషనల్ హెరాల్డ్ మనీలాండరింగ్ కేసులో కాంగ్రెస్ సీనియర్ నాయకులు రాహుల్ గాంధీ, సోనియా గాంధీలపై కొత్త ఎఫ్ఐఆర్ నమోదైంది. ఢిల్లీ పోలీసుల ఆర్థిక నేరాల విభాగం(EOW) సోనియా,రాహుల్ సహా ఆరుగురిపై ఎఫ్ఐఆర్ నమోదు చేసింది.
ఎఫ్ఐఆర్‌లో సామ్ పిట్రోడా, సుమన్ దూబే, సునీల్ భండారి, ఒక గుర్తు తెలియని వ్యక్తితో పాటు మూడు కంపెనీలు, అసోసియేటెడ్ జర్నల్స్ లిమిటెడ్ (AJL), యంగ్ ఇండియన్, డోటెక్స్ మర్చండైజ్ ప్రైవేట్ లిమిటెడ్ పేర్లు కూడా ఉన్నాయి. ఈడీ ఫిర్యాదు ఆధారంగా అక్టోబర్ 3 న ఈ ఎఫ్ఐఆర్ నమోదైంది. వీళ్లంతా కేవలం రూ. 50 లక్షలు చెల్లించి అసోసియేట్ జనరల్ లిమిటెడ్ (AJL) కి చెందిన రూ.2 వేల కోట్ల విలువైన ఆస్తులపై అధికారం పొందారని తెలిపింది
ఏంటీ నేషనల్ హెరాల్డ్ కేసు..
నేషనల్ హెరాల్డ్ పత్రికలో మనీలాండరింగ్ జరిగిందని 2012లో బీజేపీ నేత సుబ్రమణియన్ స్వామి కోర్టులో పిటిషన్ వేశారు. పిటిషన్ ను కోర్టు పరిశీలించిన తర్వాత 2021లో ఈడీ దర్యాప్తు ప్రారంభించింది. ఈ ఫిర్యాదులో సోనియా గాంధీ, ఎంపీ రాహుల్ గాంధీ, దివంగత నేతలు మోతీలాల్ వోరా, ఆస్కార్ ఫెర్నాండెజ్ వంటి కీలక కాంగ్రెస్ ప్రముఖులు, సుమన్ దూబే, సామ్ పిట్రోడా, యంగ్ ఇండియన్ అనే ప్రైవేట్ కంపెనీలు మనీలాండరింగ్ కు కుట్ర చేశారని ఆరోపించింది.
అసోసియేట్ జనరల్ లిమిటెడ్ (AJL) కి చెందిన రూ.2 వేల కోట్ల విలువైన ఆస్తులను మోసపూరితంగా సంపాదించారని ఈడీ మనీలాండరింగ్ కేసు నమోదు చేసింది. సోనియా, రాహుల్ గాంధీ, యంగ్ ఇండియన్ లో మెజార్టీ వాటాదారులు, ఒక్కొక్కరికి 38 శాతం వాటా ఉంది. ఈ కేసులో గతంలో రాహుల్, సోనియాలో ఈడీ ప్రశ్నించింది. ఇప్పటికే రూ.661 కోట్ల విలువైన స్థిరాస్తులు, రూ.90.2 కోట్ల విలువైన ఏజేఎల్ షేర్లను ఈడీ అటాచ్ చేసింది.
