సిగరెట్, తంబాకు, బీడీ, గుట్కా​ మాన్పిస్తడు..

V6 Velugu Posted on May 31, 2021

సిగరెట్, తంబాకు, బీడీ, గుట్కా...  ప్రాణాలు తీస్తాయని తెలిసినా చాలామంది మానేయరు. ఈ చెడు అలవాట్ల వల్ల ఆరోగ్యం దెబ్బతింటుందని డాక్టర్లు చెప్పినా కూడా వినరు. అలాంటి వాళ్లచేత సిగరెట్​, తంబాకు ​మాన్పిస్తున్నాడు మాచన రఘునందన్​. మహబూబ్​నగర్​ జిల్లాలో పౌరసరఫరాల శాఖ ఎన్​ఫోర్స్​మెంట్​లో డిప్యూటి తహసీల్దార్​గా పనిచేస్తున్న ఆయన ‘గివ్​ అప్​ టొబాకో‘ అని గొంతెత్తి చెబుతున్నాడు. ప్రభుత్వ ఉద్యోగి అయిన రఘునందన్​ ఊరు మేడ్చల్​ జిల్లా కేశవరం.​ ఇతను ‘క్విట్​ టిబాకో’ నినాదం ఎత్తుకోవడానికి ఓ కారణముంది. రఘునందన్​ ఇంటర్మీడియెట్​ ఫ్రెండ్​ దీక్షితులుకు సిగరెట్​ ​ అలవాటు ఉండేది. ఆ అలవాటు ఆఖరుకి అతడి ప్రాణం తీసింది.  స్నేహితుడి మరణం రఘునందన్​ను ఆలోచనల్లో పడేసింది. ఫ్రెండ్​ లెక్కనే ఎంతోమంది జీవితాలు టొబాకోకు బలికావద్దనుకున్నాడు. అటు ఉద్యోగం చేస్తూనే  పొగాకు అలవాటున్న వాళ్లను ఆ వ్యసనం నుంచి బయటపడేస్తున్నాడు. 
ఎలా మాన్పిస్తాడంటే
బస్టాండ్​, రోడ్డుమీద ఎవరైనా బీడీ, సిగరెట్​ తాగుతూ, తంబాకు, గుట్కా నములుతూ రఘునందన్​కు కనిపిస్తే వెంటనే వాళ్ల దగ్గరకు వెళతాడు.  వాళ్లకు పండ్లు, కర్చీఫ్​ ఇస్తాడు. ఆ అలవాటు మానేయాలని చెప్తాడు. ‘వీటికోసం రోజుకు ఎన్ని పైసలు ఖర్చు పెడతవో, వాటిని ఒక పక్కకు పెట్టు. వారం, నెల తిరిగే సరికి ఎన్ని పైసలు జమైతయో చూడు.  సిగరెట్​ మీదకు మనసు గుంజితే ఒక పేపర్​ మీద నీ పేరు లేదా నీ ఇష్టదైవం పేరు రాయి. అప్పుడు నీలో పాజిటివ్​ ఎనర్జీ వస్తుంది. సిగరెట్​ తాగాలనే ఆలోచన ఇక రాదు’ అని చెబుతాడు. అంతేకాకుండా ఆడపిల్లలకు ‘అమ్మా! సిగరెట్​ లేదా పొగాకు అలవాటున్న మీ అన్నకు, తమ్ముడికి ఈ సారి రాఖీ కట్టేటప్పుడు వాళ్లను ఆ అలవాటు మానుకోవాలని చెప్పు. వాటికయ్యే ఖర్చులో నాకు ఒక చీర కొనివ్వండి’ అని అడుగు అని చెప్తాడు. అతడి ఆలోచన చాలా గొప్పగా పనిచేసింది.  చాలామంది అతడికి ఫోన్​ చేసి ‘అన్నా! నువ్వు​ చెప్పిన మాటలు బాగా పనిచేశాయి. నేనిప్పుడు సిగరెట్​, పొగాకు మానేశాను’అని చెబుతుంటారు. 
మూడు రోజుల్లో 2,020 మెసేజ్​లు
కిందటి ఏడాది డిసెంబర్​ 29,30,31 తారీఖుల్లో మూడు రోజుల్లోనే ప్రపంచ దేశాలన్నింటికీ ‘సే గుడ్​ బై టు టొబాకో’అని 2‌‌‌‌,020 మెసేజ్​లు పంపాడు. గత పదేళ్లుగా పొగాకు లేని సమాజం కోసం సోషల్​ మీడియా ద్వారా ప్రచారం చేస్తున్నాడు. అతడి ట్యాగ్​లను చూసి చండీగఢ్​​లోని ‘రిసోర్స్​ సెంటర్​ ఫర్​ టొబాకో కంట్రోల్’ వాళ్లు కొత్తగా మొదలెట్టిన మూడునెలల ‘టొబాకో బేసిక్​ కోర్స్’ లో చేరాల్సిందిగా రఘునందన్​ను కోరారు.  - సంతోష్​ బొందుగుల

ఇది నా బాధ్యత
‘‘మా నాన్న అభిమన్యు టీచర్.  ఆయన పెంపకం వల్లనే నేను ఏ వ్యసనాల జోలికి పోలేదు. పొగాకు ఆరోగ్యానికి మంచిది కాదని తెలిసి కూడా కొందరు సిగరెట్​ తాగుతారు. అలాంటి వాళ్లతో మాట్లాడి, వాళ్లకు అర్థమయ్యేలా చెప్పి మాన్పించేవాడిని” అంటున్నాడు రఘునందన్​.  ‘ఎందుకు నీకీ శ్రమ’అని ఎవరైనా అడిగితే ‘ప్రజలు కట్టిన పన్నుతో జీతం తీసుకుంటున్నా. అందుకే నేనీ పని చేస్తున్నా.’’ - మాచన రఘునందన్

Tagged AWARENESS, tobacco, gutka, beedi, Cigarette, smoking,

Latest Videos

Subscribe Now

More News