కళ్లు లేని ఒక అమ్మాయి.. నడవలేని ఒక అబ్బాయి.. వీరిద్దరి మధ్య చిగురించిన అందమైన ప్రేమకథే ‘రమణి కళ్యాణం’. సూర్య వశిష్ట, దీప్షిక చంద్రన్ జంటగా, విజయ్ ఆదిరెడ్డి దర్శకత్వంలో తెరకెక్కిన ఈ ఫీల్ గుడ్ ఎమోషనల్ డ్రామా ఇవాళ (మే 22, 2026న) ప్రేక్షకుల ముందుకు వచ్చింది. మరి ఈ వెండితెర కళ్యాణం ప్రేక్షకులను ఏ మేరకు మెప్పించిందో రివ్యూలో చూద్దాం.
కథేంటంటే?
సంజన (దీప్షిక) చిన్నప్పుడే జరిగిన ఒక ప్రమాదంలో కంటిచూపు కోల్పోతుంది. కానీ ఆ లోపాన్ని ఎప్పుడూ తలచుకుని బాధపడదు. ఎంతో ఆత్మవిశ్వాసంతో కిషోర్ (శ్రీనివాస రెడ్డి) నడిపే పబ్లో సింగర్గా, మరోపక్క ఆర్జేగా చేస్తూ నలుగురు పిల్లలు, ఓ బామ్మతో కలిసి జీవిస్తుంటుంది. అదే పబ్కు కిషోర్ స్నేహితుడు, వీల్ చైర్కే పరిమితమైన రాజ్ (సూర్య వసిష్ఠ) వస్తుంటాడు.
అనుకోకుండా సంజన, రాజ్ మధ్య గొడవ జరిగి.. అది కాస్తా పరిచయంగా మారి, చివరకు బలమైన ప్రేమగా రూపాంతరం చెందుతుంది. ఒకరికొకరు తోడై తమ జీవితాలను పెళ్లి పీటల దాకా తీసుకెళ్లాలని భావిస్తారు. అయితే, వీరి పెళ్లి జరిగిందా? అసలు రాజ్ వీల్ చైర్కే ఎందుకు పరిమితమయ్యాడు? సంజనతో ఉన్న ఆ నలుగురు పిల్లల కథేంటి? అనేదే మిగిలిన సినిమా.
సినిమా విశ్లేషణ:
ట్రైలర్ చూసినప్పుడే ఇదొక విభిన్నమైన ప్రేమకథ అని అర్థమైంది. దర్శకుడు ఫస్ట్ హాఫ్లో సంజన, రాజ్ పాత్రలను పరిచయం చేస్తూ, వారి మధ్య ప్రేమ చిగురించే సీన్లతో క్యూట్గా నడిపించాడు. ఇంటర్వెల్ లో వచ్చే ఒక ఎమోషనల్ ట్విస్ట్ సెకండ్ హాఫ్పై ఆసక్తిని పెంచుతుంది. ఇక సెకండ్ హాఫ్ అంతా వీరిద్దరి పెళ్లి చుట్టూ తిరిగే హై-ఎమోషన్స్తో సాగుతుంది. ప్రీ-క్లైమాక్స్ ట్విస్ట్ ఊహించని విధంగా ఉంటుంది.
"ఏదో ఒక లోపం ఉందని జీవితంలో ఆగిపోకూడదు, ముందడుగు వేయాలి" అనే మంచి సందేశాన్ని ఇవ్వడంలో దర్శకుడు సక్సెస్ అయ్యాడు. అయితే, ఫస్ట్ హాఫ్లో కొన్ని సీన్లు బాగా సాగదీసినట్లు అనిపిస్తాయి. హీరోయిన్తో ఉండే నలుగురు పిల్లలు, బామ్మ బ్యాక్గ్రౌండ్ ఏంటనేది స్పష్టంగా చెప్పకపోవడం మైనస్. అలాగే, హీరో హెల్త్ ప్రాబ్లం రివీల్ అయ్యాక స్క్రీన్ప్లే కాస్త రొటీన్గా మారిపోవడం, క్లైమాక్స్ ఎమోషన్ పాత సినిమాలను గుర్తుచేయడం కొంత నిరాశపరుస్తుంది. అసలు ఈ కథకు 'రమణి కళ్యాణం' అనే టైటిల్ ఎందుకు పెట్టారో దర్శకుడికే తెలియాలి.
ఎవరెలా నటించారంటే?
దీప్షిక చంద్రన్: చూపు లేని అమ్మాయి పాత్రలో జీవించేసింది. ఆమె నటన చూస్తే నిజంగానే బ్లైండ్ ఏమో అనేంత పర్ఫెక్షన్ను చూపించింది. సినిమాకు ఆమే ప్రధాన బలం. వీల్ ఛైర్కే పరిమితమైన హీరోగా సూర్య వసిష్ఠ సవాల్తో కూడిన పాత్రలో చాలా సెటిల్డ్గా, చక్కటి హావభావాలు పలికించాడు. ఎప్పుడూ కామెడీతో నవ్వించే శ్రీనివాస రెడ్డికి చాలా రోజుల తర్వాత ఒక మంచి ఎమోషనల్ పాత్ర దక్కింది. తన నటనతో మెప్పించాడు. యాంకర్ శ్యామల, చైతన్య జొన్నలగడ్డ, లోహిత్ కుమార్, ప్రభావతి తమ పరిధి మేర బాగానే నటించారు.
టెక్నీకల్ అంశాలు:
సినిమాటోగ్రఫీ చాలా కలర్ఫుల్గా, విజువల్స్ రిచ్గా ఉన్నాయి. బ్యాక్గ్రౌండ్ మ్యూజిక్ కథలోని ఎమోషన్ను బాగా ఎలివేట్ చేసింది, కానీ పాటలు మాత్రం యావరేజ్గానే ఉన్నాయి. ఎడిటింగ్ విషయంలో ఫస్ట్ హాఫ్లోని కొన్ని ల్యాగ్ సీన్స్ను కట్ చేసి ఉంటే సినిమా మరింత ఫాస్ట్గా సాగేది. కైట్స్ క్రియేటివ్స్ బ్యానర్ నిర్మాణ విలువలు బాగున్నాయి, సినిమాకు గట్టిగానే ఖర్చు పెట్టారని స్క్రీన్పై కనిపిస్తుంది. ఇలాంటి ఛాలెంజింగ్ పాత్రలతో సినిమాను డైరెక్ట్ చేయడానికి దర్శకుడు విజయ్ ఆదిరెడ్డి పడిన శ్రమ మెచ్చుకోదగ్గదే.
ఫైనల్గా: కొన్ని లోపాలు, పాతకాలపు క్లైమాక్స్ ఉన్నప్పటికీ.. మనసుకు హత్తుకునే ఎమోషన్స్, నటీనటుల అద్భుతమైన నటన కోసం 'రమణి కళ్యాణం' సినిమాను ఒకసారి తప్పకుండా చూడొచ్చు!
