ఐపీఎల్ 2023లో భాగంగా చిన్నస్వామి స్టేడియం వేదికగా ఏప్రిల్ 10 సోమవారం రోజున లక్నో సూపర్ జెయింట్,రాయల్ ఛాలెంజర్స్ బెంగళూరు జట్ల మధ్య మ్యాచ్ ఉత్కంఠభరితంగా సాగింది. ఈ ఆసక్తికరమైన పోరులో లక్నో జట్టు కేవలం ఒక వికెట్ తేడాతో గెలిచింది. అయితే ఈ మ్యాచ్ లో 212 పరుగులు చేసినప్పటికీ బెంగళూరు జట్టు గెలవకపోవడంతో ఆ జట్టు ఫ్యాన్స్ నిరాశకు గురయ్యారు. స్టేడియంలో ఉన్న ఓ యువతి అయితే బాధను తట్టుకోలేక ఏకంగా ఏడ్చేసింది. ప్రస్తుతం దీనికి సంబంధించిన ఫొటో సోషల్ మీడియాలో వైరల్ గా మారింది. ఐపీఎల్ లో ఫ్యాన్ ఫాలోయింగ్ ఉన్న జట్లలో బెంగళూరు ఒకటి.. ఇప్పటివరకు ఈ జట్టుకు ట్రోఫీ గెలుచుకోలేకపోయినప్పటికీ క్రేజ్ ఏ మాత్రం తగ్గడం లేదు.
213 పరుగుల టార్గెట్ తో బరిలోకి దిగిన లక్నో సూపర్ జెయింట్స్ ..ఆరంభంలోనే వికెట్ కోల్పోయింది. కేవలం 1 పరుగు వద్ద కైల్ మేయర్స్ పెవలియన్ చేరాడు. ఆ తర్వాత 23 పరుగుల వద్ద లక్నో వరుసగా వికెట్లు కోల్పోయింది. దీపక్ హుడా, కృనాల్ పాండ్యాలు ఔటయ్యారు. దీంతో లక్నో కష్టా్ల్లో పడింది. ఈ సమయంలో కెప్టెన్ కేఎల్ రాహుల్ తో కలిసి స్టోయినీస్ జట్టును ఆదుకున్నాడు. నాల్గో వికెట్ కు 75 పరుగులు జోడించారు. ఇదే క్రమంలో స్టోయినీస్ 30 బంతుల్లో 65 పరుగులు సాధించాడు. అయితే ఈ సమయంలో స్టోయినీస్ ను సిరాజ్ ఔట్ చేశాడు. ఆ తర్వాత కెప్టెన్ కేఎల్ రాహుల్ 18 పరుగులు చేసి పెవీలియన్ చేరాడు. దీంతో లక్నో 105 పరుగులకే సగం వికెట్లు కోల్పోయింది.
ఈ సమయంలో జట్టును గెలిపించే బాధ్యతను నికోలస్ పూరన్ నెత్తిన వేసుకున్నాడు. బెంగుళూరు బౌలర్లను ఉతికారేశాడు. కేవలం 18 బంతుల్లోనే హాఫ్ సెంచరీ సాధించాడు. ఇందులో 7 సిక్సర్లు, 4 ఫోర్లు ఉన్నాయి. ఇతనికి ఆయుష్ బదోని (30) సహకారం అందించాడు. అయితే చివర్లో లక్నో వరుసగా వికెట్లను కోల్పోయింది. ఈ దశలో మ్యాచ్ ఉత్కంఠకు చేరుకుంది. అయితే చివరి బంతికి ఆవేశ్ కాన్ పరుగు తీసి లక్నోను గెలిపించాడు.
