న్యూఢిల్లీ: కరోనా తీవ్రత ఎక్కువైన వారికి అందించే రెమ్డెసివిర్ ఈ నెలాఖరులోగా అందుబాటులోకి రానుంది. కరోనా పేషెంట్లకు అత్యవసర పరిస్థితులలో రెమ్డెసివిర్ వాడేందుకు ఇప్పటికే డ్రగ్ కంట్రోలర్ జనరల్ ఆఫ్ ఇండియా పర్మిషన్ ఇచ్చింది. దీంతో దేశీయంగా తయారు అవుతున్న రెమ్డెసివిర్ కొద్ది రోజుల్లోనే విస్తృతంగా అందుబాటులోకి రానుందని ఫార్మా కంపెనీ వర్గాలు పేర్కొన్నాయి. గిలియడ్ సైన్సెస్ అభివృద్ధి చేసిన పరిశోధనాత్మక యాంటీ-వైరల్ థెరపీ అయిన రెమ్డెసివిర్ అమ్మకాలకు కండిషన్ల మేరకు ఆరోగ్య మంత్రిత్వ శాఖ అనుమతిచ్చింది.
అమెరికాకు చెందిన గిలియడ్ సైన్సెస్ అభివృద్ధి చేసిన ఈ ఔషధానికి అమెరికా ఫుడ్అండ్ డ్రగ్ అడ్మినిస్ట్రేషన్ (యూఎస్‌ఎఫ్‌డీఏ) అత్యవసర వినియోగానికి మాత్రమే అనుమతి ఇచ్చింది. గిలియడ్ సైన్సెస్ కంపెనీతో ఇండియాకు చెందిన ఐదు ఫార్మా కంపెనీలు ఒప్పందాలు కుదుర్చుకున్నాయి. ఇందులో సిప్లా, జుబిలెంట్ లైఫ్ సైన్సెస్, హెటెరో ల్యాబ్స్ వంటివి ఉన్నాయి. ఈ డీల్ ప్రకారం రెమ్డెసివిర్ ను తయారు చేసి ఇండియాతో పాటు తదితర దేశాలలో అమ్మకాలు చేపట్టవచ్చు. కాగా, డ్రగ్ కంట్రోలర్ జనరల్ ఆఫ్ ఇండియా నుంచి ఈ కంపెనీలకు అనుమతులు లభించిన నేపథ్యంలో రెమిడిసివిర్ ను త్వరలోనే మార్కెట్లోకి అందుబాటులోకి తెస్తామని కంపెనీ వర్గాలు ప్రకటించాయి. తీవ్రమైన కిడ్నీ సమస్యలు ఉన్నవారికి, 12 ఏండ్ల లోపు పిల్లలకు, గర్భిణీలు, పాలిచ్చే తల్లులకు రెమిడెసివిర్ వాడకానికి కేంద్ర ఆరోగ్య శాఖ పర్మిషన్ ఇవ్వలేదు.
