మీరు ఫుడీనా? అయితే కచ్చితంగా ఈ ‘ఐరన్ మ్యాన్ థాలీ’ తినాల్సిందే. దీని స్పెషాలిటీ ఏంటి? అంటారా! ఏదైనా రెస్టారెంట్ లేదా హోటల్కి వెళ్తే తిన్న వాటికి మనం డబ్బులు కడతాం. కానీ, ఈ ఐరన్ మ్యాన్ థాలీ తింటే ఎదురు డబ్బులిస్తారు. కాంప్లిమెంటరీగా ఏ వందో..రెండొందలో ముట్టజెప్తారు అనుకుంటే పొరపాటు. అక్షరాల ఎనిమిదిన్నర లక్షలు ఇస్తారు. ఇద్దరు కలిసి తినే ఈ థాలీలో చాలానే వంటకాలు ఉన్నాయి.
ఢిల్లీలోని ఆర్డౌర్ 2.1 రెస్టారెంట్..నార్త్, సౌత్ ఇండియా, చైనీస్, సీఫుడ్, బిర్యానీలకి పెట్టింది పేరు. అందుకే ఎప్పుడూ కస్టమర్స్తో కిక్కిరిసి ఉంటుంది ఈ రెస్టారెంట్. అది గమనించిన ఫేమస్ ఫుడ్ బ్లాగర్ మథుర్ కూడా ఈ రెస్టారెంట్లోకి వెళ్లాడు. ఫుడ్ ఆర్డర్ ఇవ్వడానికి మెనూ చూస్తే ‘ఐరన్ మ్యాన్ థాలీ’ అట్రాక్టివ్గా కనిపించింది. అది కంప్లీట్ చేస్తే ఎనిమిదిన్నర లక్షలు ఇస్తారన్న విషయం తెలిశాక కచ్చితంగా ఆ థాలీ తినాల్సిందే అనుకున్నాడు. కానీ, అంతలోనే కండిషన్స్ అప్లయ్ అన్నారు ఆ రెస్టారెంట్ వాళ్లు. అరగంటలో థాలీ తినాలని చెప్పారు. బోనస్గా ఆ థాలీని మరొకరితో షేర్ చేసుకోవచ్చని కూడా చెప్పారు. ఆ వార్త వినగానే రొట్టె విరిగి నేతిలో పడ్డట్టు అనిపించింది మథుర్కి. వెంటనే ఐరన్ మ్యాన్ థాలీ ఆర్డర్ చేశాడు.
ఆ థాలీలో ఏముందంటే...
మొదట మథుర్ పేరు మీద ఎనిమిదిన్నర లక్షల చెక్ రెడీ చేసి తీసుకొచ్చాడు బేరర్. అది చూశాక రెట్టింపు ఉత్సాహంతో సర్వింగ్ ప్లేట్ వైపు చూస్తే..స్టార్టర్స్గా కబాబ్లు, టిక్కాలు వడ్డించారు. ఆ వెంటనే మెయిన్ కోర్సులో చోలే, దమ్ ఆలు, దాల్ మక్నీ, ఆలూ గోబీ, కడీ, షాహీ పనీర్, కడాయి పనీర్... ఇలా రకరకాల వంటకాలు ప్లేట్లో పెడుతున్నారు. అంతలోనే రెండు చిన్న బకెట్స్ఒకదాంట్లో అన్నం, రెండో దాంట్లో బిర్యానీ టేబుల్ మీదకి వచ్చింది. చివరాఖరిలో రెండు గిన్నెల గులాబ్ జామూన్, ఐదు రకాల డ్రింక్స్ కూడా వచ్చేశాయి ఆ థాలీలో. వాటన్నింటినీ తినడం మాట అటుంచితే.. చూస్తేనే కడుపు నిండిపోయింది అన్నాడు మథుర్. అయినా సరే అరగంటలో కంప్లీట్ చేయడానికి ఎంత కష్టపడ్డా తన వల్ల కాలేదు. ఈ ఫుడ్ బ్లాగరే కాదు ఇప్పటివరకు ఈ థాలీని ఎవరూ పూర్తిగా తినలేకపోయారు. కానీ, మథుర్ వల్ల ఈ థాలీ విపరీతంగా వైరల్ అవుతోంది.
ఐరన్ మ్యాన్ థాలీ గురించి రీసెంట్గా తన ఇన్స్టాగ్రామ్ అకౌంట్లో ఒక వీడియో పోస్ట్ చేశాడు మథుర్. దానికి కొద్ది గంటల్లోనే మిలియన్స్లో వ్యూస్ వచ్చాయి. వేలమంది లైకులు కొట్టారు కూడా. అయితే ఈ థాలీ చూసి కొందరు ఆ ఎనిమిదిన్నర లక్షలు హాస్పిటల్ బిల్లుకి సరిపోవంటూ ఫన్నీగా రియాక్ట్ అవుతున్నారు.