- జీఆర్టీ జువెలర్స్, పారాచ్యూట్ ఆయిల్, క్లోజ్–అప్, హెయింజ్ టొమాటో కెచప్, కళ్యాణ్ జువెలర్స్ యాడ్స్లో నటించా
- ‘ఆగ్రా’ సినిమాని మెల్బోర్న్ ఫిల్మ్ ఫెస్టివల్లో ప్రదర్శించబోతున్నారు. ఆ సినిమా 2019లోనే షూటింగ్ పూర్తయింది. అందులో నాది డార్క్ క్యారెక్టర్,. ఆ క్యారెక్టర్ పేరు ఆగ్రా.
‘‘హీరోయిన్ అంటే గ్లామర్ రోల్స్ కోసమే కాదు. పర్ఫార్మెన్స్ ఉన్న పాత్రలు చేసే అవకాశం వస్తే నటించడానికి రెడీగా ఉంటారు. నేనూ అంతే... మొదటి నుంచి నా క్యారెక్టర్ ఇంపార్టెన్స్ చూశానే తప్ప గ్లామర్ పాత్రలతో సరిపెట్టుకోను’’ అంటోంది రుహానీ శర్మ. ‘చి.ల.సౌ.’ సినిమాలో అంజలి పాత్రలో కనిపించి తెలుగు ప్రేక్షకులను ఆకట్టుకుంది. ప్రస్తుతం పోలీస్ ఆఫీసర్గా ‘హర్: చాప్టర్1’లో లీడ్ రోల్లో నటించింది. మొదటినుంచీ పర్ఫార్మెన్స్ ఉన్న పాత్రలనే ఎంచుకుంటూ డిఫరెంట్ స్క్రిప్ట్లతో ఆడియెన్స్ ముందుకొస్తోంది రుహానీ.
హిమాచల్ ప్రదేశ్లో పుట్టి, తెలుగు తెర మీద మెరిసిపోతున్న రుహానీ శర్మ ఇంట్రెస్టింగ్ జర్నీ ఆమె మాటల్లోనే... ‘‘మాది హిమాచల్ ప్రదేశ్లోని సోలన్. నాన్న పేరు సుభాష్ శర్మ. అమ్మ ప్రాణేశ్వరి. నాకో సిస్టర్. తన పేరు శుభి శర్మ. మాది మిడిల్ క్లాస్ ఫ్యామిలీ. చండీగఢ్లోని పంజాబ్ యూనివర్సిటీలో గ్రాడ్యుయేషన్ పూర్తి చేశా. చిన్నప్పటి నుంచే మోడలింగ్, యాక్టింగ్ అంటే ఇంట్రెస్ట్ ఉండేది. కాలేజీలో చదివేటప్పుడు మోడలింగ్ చేయాలని డిసైడ్ అయ్యా. 2013లో ఒక మ్యూజిక్ వీడియో కోసం మోడలింగ్ చేశా. అదే నా కెరీర్కి మొదటి మెట్టు. ‘కుడి తు పటాకా’ అనే పంజాబీ సాంగ్ అది. ఆ సాంగ్ హిట్ కావడంతో మ్యూజిక్ వీడియోల్లో బోలెడన్ని అవకాశాలు వచ్చాయి. అలా ‘క్లాస్ రూమ్’, ‘డేట్’, ‘మేరీ జాన్’, ‘బుల్లెట్ వర్సెస్ చమ్మక్ చల్లో’ వంటి వీడియోలకు చేశా.
ప్రయత్నం ఆపలేదు
ఒకవైపు మ్యూజిక్ వీడియోలు చేస్తూ.. అదే టైంలో సినిమాలు, సీరియల్స్కి ఆడిషన్స్ ఇచ్చేదాన్ని. అలా చాలా ఆడిషన్స్కి వెళ్లా. కానీ ఒక్క అవకాశం కూడా రాలేదు. అయినా నేను ట్రై చేయడం మాత్రం మానలేదు. అప్పుడప్పుడు అడ్వర్టైజ్మెంట్స్లో కూడా చేశా. ఆ తర్వాత 2017లో తమిళంలో ఒక సినిమా అవకాశం వచ్చింది. హీరో భరత్ నటించిన ‘కడైసి బెంచ్ కార్తి’ అనే సినిమా అది. ఆ సినిమాతో పెద్దగా గుర్తింపు రాలేదు. ఆ తర్వాతి ఏడాది 2018లో తెలుగులో సుశాంత్ హీరోగా ఉన్న ‘చి.ల.సౌ.’ సినిమా ఛాన్స్ వచ్చింది. అది నా లైఫ్ని మలుపు తిప్పింది. ఆ సినిమా నాకు మంచి పేరు తెచ్చిపెట్టింది. దాని తర్వాత మలయాళంలో కూడా అవకాశం వచ్చింది. అది థ్రిల్లర్ మూవీ. పేరు ‘కమల’. 2019లో వచ్చింది ఆ సినిమా. అందులో టైటిల్ రోల్ కమలగా డార్క్ క్యారెక్టర్లో నటించా.
ఈ సినిమాతో పాటు ‘పాయిజన్’ అనే హిందీ వెబ్ సిరీస్లో కూడా నటించా. అది కూడా అదే ఏడాది ప్రేక్షకుల ముందుకు వచ్చింది. అలా మూడేండ్లలో నాలుగు భాషల్లో నటించే అవకాశం దక్కింది. ఈ విషయంలో నేను చాలా లక్కీ. ఆ తర్వాత మళ్లీ తెలుగులోనే ‘హిట్: ద ఫస్ట్ కేస్’, ‘డర్టీ హరీ’, ‘నూటొక్క జిల్లాల అందగాడు’ సినిమాల్లో అవకాశాలు వచ్చాయి. అలాగే 2022లో ‘మీట్ క్యూట్’ అనే వెబ్ సిరీస్లో కూడా చేశా. లేటెస్ట్గా ‘హర్: చాప్టర్ 1’తో మీ ముందుకొచ్చా. వెంకటేశ్ నటిస్తున్న ‘సైంధవ్’, ‘ఆగ్రా’, ‘బ్లాక్అవుట్’,‘శ్రీరంగ నీతులు’ సినిమాల్లో నటిస్తున్నా.
కష్టపడి ఇష్టంగా చేశా
నిజానికి నాకు లవ్ స్టోరీస్, సైకలాజికల్ థ్రిల్లర్ మూవీస్లో యాక్ట్ చేయడం ఇష్టం. ‘చి.ల.సౌ.’ ఒకలాంటి లవ్ స్టోరీ. ఇప్పటికీ నా కెరీర్ గురించి మాట్లాడాలంటే ఫస్ట్ ఇదే ఉంటుంది. ఈ సినిమా ఆడిషన్కి వెళ్లినప్పుడు మేకప్ లేకుండా నా లుక్ ఎలా ఉంటుందో చూశారు. ఆ తర్వాతే నాకు అవకాశం ఇచ్చారు. షూటింగ్ స్టార్ట్ అయ్యాక డైలాగ్స్ చెప్పడానికి వేలసార్లు రిహార్సల్ చేసేదాన్ని. ఒక సీన్లో పెద్ద డైలాగ్ ఇచ్చారు. అది గుర్తుపెట్టుకోవడం చాలా కష్టం అనిపించింది. డైరెక్టర్ రాహుల్ ‘నీ పాత్ర చాలా కోపంగా ఉంటుంది. కాబట్టి ఆ కోపంలో ఫాస్ట్గా డైలాగ్ చెప్పాలి. మధ్యలో కట్ ఉండదు..’ అని చెప్పాడు. అలా చాలా కష్టపడి, ఇష్టపడి చేసిన సినిమా అది.
ఈ సినిమాలో క్యారెక్టర్ చాలా సీరియస్గా, సింపుల్గా ఉండే అమ్మాయి. డైరెక్టర్కి క్లారిటీ ఉంది. ఆయన చెప్పినట్లు చేస్తేనే సక్సెస్ అవుతాం అనే విషయం నాకు అర్థమైంది. నాకు క్యారెక్టర్, అందులో నా పర్ఫార్మెన్స్ ముఖ్యం. అందుకే ఈ క్యారెక్టర్ చేశా. చాలామందికి తెలియని విషయమేంటంటే.. ఇప్పుడు వచ్చిన ‘హర్ : చాప్టర్ 1’ మూవీ రావడానికి కారణం కూడా చి.ల.సౌ. ‘హర్..’ సినిమా ఆఫర్ వచ్చినప్పుడు ‘నో’ చెప్పాలనుకున్నా. ఎందుకంటే నన్ను పోలీస్ ఆఫీసర్గా చూసుకోవాలంటే నాకే కొత్తగా అనిపించింది. అలాంటిది నేను లీడ్ రోల్లో పోలీస్గా యాక్ట్ చేయడం అంటే సాహసమే అనుకున్నా. పైగా డైరెక్టర్కి ఇది డెబ్యూ. సాఫ్ట్వేర్ ఇంజినీర్గా అమెరికాలో ఉద్యోగం చేసి, సినిమా తీయడానికి వచ్చాడు. ఇవన్నీ ఆలోచించాక ఈ స్ర్కిప్ట్ ‘నేను చేయను’ అని చెప్పడానికి వెళ్లా. కానీ డైరెక్టర్ చి.ల.సౌ.లో నా పర్ఫార్మెన్స్ చూసి ‘మీరు చేయగలరు’ అని.. కథ మొత్తం చెప్పాడు. అతనికి ఉన్న క్లారిటీ, విజన్, రైటింగ్ స్టయిల్ నచ్చాయి. అలా ఈ సినిమా చేయడానికి ఒప్పుకున్నా.
పోలీస్గా మారాలని...
ఈ క్యారెక్టర్ కోసం చాలా డాక్యుమెంటరీలు చూశా. రియల్ పోలీస్ ఆఫీసర్స్ని కలిసి వాళ్లతో మాట్లాడా. ‘ఢిల్లీ క్రైమ్’ సిరీస్ చూశా. వెపన్స్, మార్షల్ ఆర్ట్స్ ట్రైనింగ్ కూడా తీసుకున్నా. తినేటప్పుడు, ట్రావెలింగ్ చేసేటప్పుడు, వేరే పనిలో ఉన్నప్పుడు కూడా పోలీస్ క్యారెక్టర్ గురించే ఆలోచించేదాన్ని. పోలీస్ డ్రెస్ వేసుకుంటే ఆటోమెటిక్గా నా బాడీ లాంగ్వేజ్ మారిపోతుంది. మామూలుగా నా వాకింగ్ స్టైల్ ఒకలా ఉంటుంది. కానీ, క్యారెక్టర్ చేస్తున్నప్పుడు వేరేలా మారిపోతుంది. ‘హర్ : చాప్టర్ 1’లో నా పాత్ర పేరు అర్చన. ఇప్పటివరకు ‘చి.ల.సౌ.’లో అంజలి పాత్రను ప్రజలు బాగా ఆదరించారు. ఇప్పటికీ అలానే గుర్తుపడుతుంటారు కూడా. అంజలి తర్వాత నాకు బాగా కనెక్ట్ అయిన పేరు అర్చన.
ఓటీటీ వల్లే...
ఒక మంచి రోల్లో నటించాలంటే స్టార్ అయ్యుండాల్సిన పనిలేదు. ఓటీటీ వచ్చాక స్క్రిప్ట్స్, యాక్టింగ్, యాక్టర్స్ విషయంలో చాలా మార్పులు వచ్చాయి. చాలామంది ప్రేక్షకులు ఓటీటీకి అలవాటు పడి టీవీ చూడటం మానేస్తున్నారు. ఫిమేల్ యాక్టర్స్ అంటే సాంగ్, డాన్స్ అన్నట్టు ఉండేది. ఇప్పుడు అలా లేదు.. వెరైటీ స్క్రిప్ట్లతో గుర్తుండిపోయే పాత్రల్లో నటిస్తున్నారు.”
:::ప్రజ్ఞ