- రష్యా మీడియా సంస్థల కథనాలు.. కొట్టిపారేసిన ఉక్రెయిన్
మాస్కో: చెర్నోబిల్ అణు విద్యుత్ కేంద్రంలో ఉక్రెయిన్ ప్రమాదకరమైన ప్లుటోనియం ‘డర్టీ బాంబు’ను తయారు చేస్తోందని రష్యాకు చెందిన పలు మీడియా సంస్థలు వార్తలు రాశాయి. ఉక్రెయిన్ మాత్రం ఆ ఆరోపణలను ఖండించింది. సోవియట్యూనియన్ నుంచి విడిపోయిన తర్వాత అణ్వాయుధాలను వదిలిపెట్టేశామని, మళ్లీ న్యూక్లియర్ క్లబ్లో చేరే ఆలోచనలేవీ తమకు లేవని స్పష్టం చేసింది.
ఏంటీ డర్టీ బాంబు?
డర్టీ బాంబును రేడియోయాక్టివ్ పౌడర్, పేలుడు పదార్థాలను కలిపి తయారు చేస్తారని చెప్తారు. అది పేలిన చోట రేడియో యాక్టివ్ మెటీరియల్ విడుదలవుతుందని, ఆ రేడియేషన్తో తీవ్రమైన జబ్బుల ముప్పు తక్కువే అయినా దానిని పీల్చుకుంటే సమస్యలు వస్తాయి. బాంబ్ రేడియేషన్తో మనుషులు చనిపోరని, గాయాలు మాత్రమే అవుతాయని మరికొందరు చెప్తున్నారు.
అణు బాంబు కాదా?
డర్టీ బాంబ్.. అణు బాంబు కాదని, రెండింటికీ చాలా తేడా ఉంటుందని నిపుణులు అంటున్నారు. డర్టీ బాంబు కన్నా అణు బాంబు శక్తి కొన్ని లక్షల రెట్లు ఎక్కువుంటుందంటున్నారు. అణు బాంబు ద్వారా విడుదలయ్యే రేడియేషన్ కొన్ని వేల కిలోమీటర్ల దూరం వ్యాపిస్తుందని చెప్తున్నారు. డర్టీ బాంబ్ రేడియేషన్ కొన్ని కిలోమీటర్ల దూరమే వెళ్తుందని అంటున్నారు.