హైదరాబాద్, వెలుగు:మీ బండి నంబర్, మరో వాహనం నంబర్ ఒక్కటే ఉందా? సేమ్ మీ బండి నంబర్తోనే వేరే వాహనం ఏదైనా తిరుగుతున్నట్టు మీకు తెలుసా? ఇవేం ప్రశ్నలు!! ఒక రిజిస్ట్రేషన్ నంబర్తో ఒకే బండి ఉంటుందని అంటారా.. కానీ రాష్ట్రంలో చాలా వాహనాలు వేరే బండ్ల నంబర్లతో నకిలీ నంబర్ ప్లేట్లు పెట్టుకుని తిరిగేస్తున్నాయి. ట్యాక్సులు కట్టకుండా తప్పించుకోవడానికి, ట్రాఫిక్ చలానాలు తమకు పడకుండా ఉండేందుకు కొందరు తమ బండ్లకు నకిలీ నంబర్ ప్లేట్లు బిగించుకుంటున్నారు. కొందరు ఏదో ఒక వాహనం నంబర్తో నకిలీ ప్లేట్లు తయారు చేసుకుంటుంటే.. ఇంకొందరు అచ్చం తమ బండి మోడల్, సేమ్ కలర్తో ఉన్న వేరే వాళ్ల బండ్ల నంబర్లను పెట్టేసుకుంటున్నారు. ముఖ్యంగా ట్రావెల్స్ వాహనాలు, పాసింజర్ బస్సులు, లారీలకు ఇలా నకిలీ నంబర్ ప్లేట్లు ఎక్కువగా ఉంటున్నట్టు గుర్తించారు. ఆర్టీఏ అధికారులు నిర్లక్ష్యంగా వ్యవహరించడం వల్లే ఈ వ్యవహారం సాగుతోందన్న ఆరోపణలు వినిపిస్తున్నాయి.
చలానాతో బట్ట బయలు..
పర్వతాలు అనే వ్యక్తి పది నెలల క్రితం వేరే వ్యక్తి దగ్గర స్వరాజ్ మజ్దాను కొన్నారు. ఇటీవల ట్రాఫిక్ పోలీసులు ఆయనకు రెండు చలానాలు పంపించారు. వాటిల్లోని ఫొటోలో ఉన్నది ఆయన వాహనం కాదు. తన బండి నంబర్తో ఎవరో వేరే బండి నడుపుతున్నారని గుర్తించి పోలీసులకు ఫిర్యాదు చేశాడు. అయినా ఫలితం లేదు. తర్వాత ఆయనే ప్రయత్నం చేసి.. నకిలీ నంబర్ ప్లేట్ ఉన్న వాహనాన్ని పట్టుకుని జగద్గిరిగుట్ట పోలీస్ స్టేషన్లో అప్పగించారు. అయినా పోలీసులు పట్టించుకోవడం లేదని వాపోతున్నాడు. నకిలీ నంబర్ ప్లేటుతో దొరికిన బండి ఓనర్ ఇలాగే మరో నాలుగైదు వాహనాలనూ నడుపుతున్నాడని సమాచారం.
ఇట్ల చేస్తున్నరు..
కొందరు వ్యక్తులు సెకండ్హ్యాండ్ బండి కొంటామంటూ డాక్యుమెంట్లు తీసుకుంటున్నారు. వాటిని జిరాక్స్ తీయించి దగ్గర పెట్టుకుంటున్నారు. తర్వాత ఆ నంబర్ మీదే నకిలీ నంబర్ ప్లేట్లు తయారు చేసి వేరే బండ్లకు పెడుతున్నారు. ట్రాఫిక్ ఉల్లంఘనలకు సంబంధించి పోలీసులు ఫొటో తీసి పంపుతున్న చలాన్లు అసలు ఓనర్లకు వెళుతున్నాయి. ప్రభుత్వానికి పన్నులు ఎగ్గొట్టేందుకే ఇలా నకిలీ ప్లేట్లను పెట్టుకుంటున్నారని నిపుణులు చెబుతున్నారు. ఈ నకిలీ నంబర్ ప్లేట్ల వ్యవహారం ఆర్టీఏ అధికారులకు తెలిసినా పట్టించుకోవట్లేదని రాష్ట్ర ఫోర్ వీలర్స్ అసోసియేషన్ నేతలు ఆరోపిస్తున్నారు. తూతూ మంత్రంగా తనిఖీలు చేసి, వదిలేస్తున్నారని అంటున్నారు. ఆర్టీఏ అధికారులు మాత్రం తమ దృష్టికి వస్తే క్రిమినల్ కేసులు నమోదు చేస్తామని చెబుతున్నారు.