ఎల్లారెడ్డిపేట, వెలుగు: అక్రమ ఇసుక రవాణాను అడ్డుకునేందుకు ప్రయత్నించిన పోలీసులపైకి ఇసుక పికప్ వాహనాన్ని డ్రైవర్ పోనివ్వడంతో ఓ కానిస్టేబుల్ తీవ్రంగా గాయపడ్డాడు. ఎస్సై బాల్ రాజు తెలిపిన వివరాల ప్రకారం.. రాజన్న సిరిసిల్ల జిల్లా గంభీరావుపేట మండలం లింగన్నపేటలో మంగళవారం రాత్రి బ్లూకోల్ట్స్ హోంగార్డు మహిపాల్, కానిస్టేబుల్ రమేశ్ విధులు నిర్వహిస్తున్నారు.
అక్రమంగా ఇసుక తరలిస్తున్నట్లు సమాచారం అందడంతో వాహనాలను తనిఖీ చేస్తుండగా, ఇసుక పికప్ వాహనాన్ని డ్రైవర్ ఆపకుండా పోలీసులపైకి పోనిచ్చాడు. దీంతో మహిపాల్ పక్కకు తప్పించుకోగా, కానిస్టేబుల్ రమేశ్కాలు, చేతికి తీవ్ర గాయాలయ్యాయి.
వెంటనే క్షతగాత్రుడిని ఎల్లారెడ్డిపేటలోని ఓ ప్రైవేట్ ఆస్పత్రికి తరలించి ప్రాథమిక చికిత్స అందించారు. అనంతరం మెరుగైన వైద్యం కోసం హైదరాబాద్ యశోద ఆస్పత్రికి తరలించారు. ఈ ఘటనలో పికప్ వాహనం నడుపుతున్న ఎల్లారెడ్డిపేట మండలం కోరుట్లపేటకు చెందిన మైనర్, ఓనర్ గొల్లపల్లికి చెందిన వేముల విజయ్, మరో మైనర్ ప్రమేయం ఉన్నట్లు గుర్తించామని ఎస్సై తెలిపారు. వారిపై కేసు నమోదు చేసి దర్యాప్తు చేస్తున్నట్లు పేర్కొన్నారు.
