మహబూబ్నగర్,వెలుగు : ఏప్రిల్ ముగుస్తున్నా గ్రామాల్లో వడ్ల కొనుగోలు సెంటర్లను ఓపెన్ చేస్తలేరు. కోతలు కోసి, వడ్లను ఆరబెట్టుతున్న టైంలో అకాల వర్షాలు పడుతుండటంతో రైతులు ఆందోళన చెందుతున్నారు. సెంటర్లు తెరవడంపై ఆఫీసర్లు కూడా క్లారిటీ ఇవ్వకపోవడంతో ప్రైవేట్ వ్యక్తులకు తక్కువ రేట్కే వడ్లను అమ్ముకుంటున్నారు.
3.50 లక్షల మెట్రిక్ టన్నుల దిగుబడి..
మహబూబ్నగర్ జిల్లాలో రైతులు రికార్డు స్థాయిలో ఈ యాసంగిలో 1.10 లక్షల ఎకరాల్లో వరి సాగు చేశారు. దాదాపు 3.50 లక్షల మెట్రిక్ టన్నుల దిగుబడి వస్తుందని వ్యవసాయ శాఖ ఆఫీసర్లు అంచనా వేశారు. దీని ప్రకారం జిల్లాలో ఐకేపీ ఆధ్వర్యంలో 99, పీఏసీఎస్ ద్వారా 86, మెప్మా ద్వారా ఒకటి, డీసీఎంఎస్ ద్వారా నాలుగు సెంటర్లను తెరిచి 2.49 లక్షల మెట్రిక్ టన్నుల వడ్లు కొనుగోలు చేసేందుకు ప్రణాళిక చేశారు. కొనుగోలు చేసిన వడ్ల కోసం 62,43,770 సంచులు అవసరం ఉండగా, 37,36,500 అందుబాటులో ఉంచారు. సెంటర్లు ఈ నెల 15 నుంచే ఓపెన్ చేయాల్సి ఉండగా, జిల్లావ్యాప్తంగా ఉన్న 190 సెంటర్లలో కేవలం ఇప్పటి వరకు ఆరింటిని మాత్రమే తెరిచారు.
తక్కువ ధరకే అమ్ముకుంటున్రు..
ఓ వైపు అకాల వర్షాలు.. మరో వైపు వడ్ల సెంటర్లు ఎప్పుడు తెరుస్తారో స్పష్టత లేకపోవడంతో రైతులు ప్రైవేట్ వ్యక్తులకు వడ్లను అమ్ముతున్నారు. మహబూబ్నగర్ రూరల్, కోయిల్కొండ, చిన్నచింతకుంట, దేవరకద్ర, మిడ్జిల్, జడ్చర్ల, బాలానగర్ ప్రాంతాల్లో రెండు వారాల కిందటే రైతులు వరి కోతలు పూర్తి చేసి, వడ్లను ఆరబెట్టుకున్నారు. కొద్ది రోజులుగా వర్షాలు పడుతుండడంతో వడ్లు తడిసి పోతాయని రైతులు ఆందోళన చెందుతున్నారు. దీన్ని సాకుగా తీసుకున్న ప్రైవేట్ వ్యాపారులు లారీలను తీసుకొని రైతుల పొలాల వద్దకు వెళ్తున్నారు. అక్కడే కాంటాలు పెట్టి వడ్లను కొంటున్నారు. వడ్లు తేమగా ఉన్నా పట్టించుకోవడం లేదు. మిడ్జిల్, జడ్చర్ల, బాలానగర్ ప్రాంతాల్లో వడ్లు కొంచెం పచ్చిగా ఉండడంతో క్వింటాల్కు రూ.1,500 నుంచి రూ.1,760 వరకు ధర చెల్లిస్తున్నారు. మహబూబ్నగర్ రూరల్, కోయిల్కొండ, సీసీకుంట ప్రాంతాల్లో క్వింటాల్కు రూ.1,650 నుంచి రూ.1,800 ఇస్తున్నారు. సెంటర్ల వద్దకు వడ్లను తీసుకెళ్లినా తేమ, తరుగు, తాలు పేరుతో ప్రతీసారి నిర్వాహకులు ఇబ్బందులు పెడుతున్నారని, వర్షాలు పడితే వడ్లు తడిసి ఆగమైతమని ప్రైవేట్ వ్యాపారులు ఇచ్చిన రేట్కే పంటను అమ్ముకుంటున్నారు. దీనికితోడు వడ్లను ప్రైవేట్లో అమ్మడం ద్వారా ట్రాక్టర్ కిరాయిలు, సెంటర్ల వద్ద కొనుగోళ్లు ఆలస్యమైతే వడ్లను వర్షం నుంచి కాపాడుకునేందుకు టార్పాలిన్లు, సుతిలీల ఖర్చులు మిగిలిపోతాయని చెప్పుకుంటున్నారు.
నిరుడు ఇదే పరిస్థితి..
గత సీజన్లోనూ రైతులకు ఇదే పరిస్థితి ఎదురైంది. అప్పుడు అకాల వర్షాల భయం లేకున్నా, ఆఫీసర్లు సెంటర్లు తెరువడంలో జాప్యం చేశారు. దీంతో పంటను రైతులు పెద్ద మొత్తంలో ప్రైవేట్ వ్యక్తులకే అమ్మారు. కర్నాటకలోని రాయచూర్ ప్రాంతానికి చెందిన వ్యాపారులు కూడా జిల్లాకు లారీలను తీసుకొచ్చి వడ్లను కొనుగోలు చేశారు. ఆ సీజన్లో 2 లక్షల మెట్రిక్ టన్నుల వరకు ప్రభుత్వ సెంటర్ల ద్వారా కొనాల్సి ఉండగా, 90 వేల మెట్రిట్ టన్నుల వడ్లను మాత్రమే రైతుల నుంచి
సేకరించారు.
తడుస్తయని అమ్మిన..
నాకున్న నాలుగు ఎకరాల్లో ఈ యాసంగిలో వరి వేసిన. రూ.లక్ష వరకు పెట్టుబడి పెట్టగా, 125 క్వింటాళ్ల దిగుబడి వచ్చింది. రెండు వారాల నుంచి సెంటర్లు ఎప్పుడు తెరుస్తారని చూసిన. ఉరుములు, మెరుపులతో వర్షం పడుతుండడంతో భయంతో పచ్చి వడ్లనే ప్రైవేట్ వ్యక్తికి అమ్మిన. క్వింటాల్కు రూ.1,750 ఇచ్చిండు.
- సతయ్య, రైతు, మిడ్జిల్
ఇంకా 15 రోజులు అయితదట..
నేను పంట కోసి 10 రోజులవుతోంది. ఇప్పటిదాక సెంటర్ను తెరుస్తలేరు. సొసైటీకీ పోయి అడిగితే, రెండు వారాలు టైం పడ్తదని చెబుతున్రు. అప్పటి వరకు పంటను ఎట్ల కాపాడుకోవాలె? కొందరు ప్రైవేట్ వ్యక్తులకు వడ్లను అమ్ముకుంటున్రు. వడ్ల సెంటర్లను తొందరగా తెరవాలి.
- రాఘవేందర్ గౌడ్, రైతు, బొక్కలోనిపల్లి
