‘బ్లాక్స్వాన్’.. ఇదొక కె–పాప్ విమెన్ బ్యాండ్. ప్రపంచంలోనే టాప్ పాప్ బ్యాండ్స్లో ఒకటి కూడా. వీళ్ల ఆల్బమ్స్కి కోట్లల్లో అభిమానులున్నారు. ఇంతటి ప్రిస్టేజియస్ బ్యాండ్లో ఎంట్రీకి ఒడిశాకి చెందిన 18 ఏండ్ల శ్రేయ లెంక అడుగు దూరంలో ఉంది. బ్లాక్ స్వాన్లో స్థానం కోసం వివిధ దేశాలకు చెందిన నాలుగు వేలమంది ఆర్టిస్ట్లని వెనక్కి నెట్టిందామె. తన డాన్సింగ్, సింగింగ్తో పాటు గ్రేస్ అప్పియరెన్స్తో టాప్–2 వరకు దూసుకెళ్లింది. ఫైనల్లో నెగ్గితే మొదటి ఇండియన్–కె పాప్ ఆర్టిస్ట్గా శ్రేయ రికార్డు క్రియేట్ చేసినట్టే.
ఒడిశా నుంచి బ్లాక్ స్వాన్ వరకు శ్రేయ ఎలా చేరుకుందంటే.. డిఆర్ మ్యూజిక్ 2020లో ‘బ్లాక్ స్వాన్’ అనే సౌత్ కొరియన్ గర్ల్ గ్రూప్ని ఇంట్రడ్యూస్ చేసింది. ఐదుగురు పాప్ గర్ల్స్తో మొదలైన ఆ బ్యాండ్ మొదటి ఆల్బమ్ ‘గుడ్ బాయ్ రనీనా’ సూపర్ హిట్ అయింది. అప్పట్నించి ఈ బ్యాండ్ని రనీనా, బిపి రనీనా అని కూడా పిలుస్తున్నారు. కానీ, 2020 నవంబర్లో ఆ బ్యాండ్ ఐదో మెంబర్ హైమీని దాన్నుంచి బయటికొచ్చింది. దాంతో ఆ పొజిషన్ కోసం గ్లోబల్గా ఆడిషన్స్ కండెక్ట్ చేసింది డిఆర్ మ్యూజిక్. వరల్డ్లోనే ది బెస్ట్ పాప్ బ్యాండ్గా బ్లాక్ స్వాన్కి పేరుండటంతో దాదాపుగా 4000 మంది ఆర్టిస్ట్లు ఆ ప్లేస్ కోసం పోటీపడ్డారు. కానీ, వాళ్లందర్నీ దాటి టాప్–2 వరకు వెళ్లింది శ్రేయ. టాప్–1 కోసం బ్రెజిల్కి చెందిన గాబ్రియేలా డాల్సిన్తో పోటీ పడబోతుంది ఇప్పుడు. ‘‘ పద్దెనిమిదేండ్ల వయసులో ఇక్కడి వరకు రావడానికి మా నాన్న ఎంకరేజ్మెంట్ చాలా ఉందంటుం’’ది శ్రేయ.
కవర్ సాంగ్స్ చేసింది
ఒడిశాలోని రూర్కెలా శ్రేయ సొంతూరు. మధ్య తరగతి కుటుంబం. కానీ, ఉన్నంతలోనే కూతురి కలల్ని తీర్చడానికి ఆమె తండ్రి చాలా కష్టపడ్డాడు. శ్రేయ ఆటపాటల్లో యాక్టివ్గా ఉండటం గమనించి ఎంకరేజ్ చేశాడు. అలా తండ్రి సపోర్ట్తో ఎనిమిదేండ్ల వయసు నుంచే డాన్స్ ప్రాక్టీస్ మొదలుపెట్టింది శ్రేయ. ఆ తర్వాతి సంవత్సరం నుంచే కాంపిటీషన్స్లోనూ పార్టిసిపేట్ చేసింది. బోలెడు ప్రైజ్లు గెలుచుకుంది. మ్యూజిక్ కూడా నేర్చుకుంది. అయితే శ్రేయ వాయిస్ ‘లో’ పిచ్లో ఉండటంతో మొదట్లో సరైన టీచర్ దొరకడం కష్టమైంది ఆమెకి. వాళ్ల అమ్మమ్మ హిందూస్తానీ మ్యూజిక్లో చేర్పించింది. దాంతో పాటు ఆన్లైన్లో వీడియోలు చూస్తూ తన గొంతుని సరిచేసుకుంది శ్రేయ. యోగాలోనూ పర్ఫెక్ట్ అయింది. పాప్ విషయానికొస్తే చిన్నప్పట్నించీ కొరియన్ పాప్ ఆల్బమ్స్ బాగా వింటుండేది. అలా తెలియకుండానే పాప్వైపు తన మనసు మళ్లింది. అలా కొరియన్ పాప్ పాటలకి కవర్ సాంగ్స్ చేసింది. అలా ముందుకెళ్తున్న తన లైఫ్ని పూర్తిగా మలుపు తిప్పింది ‘బ్లాక్స్వాన్’ ఆడిషన్ కాల్.
మొదటి ఇండియన్ కె–పాప్గా...
2021 లో బ్లాక్ స్వాన్ గ్లోబల్ ఆడిషన్స్ కండక్ట్ చేస్తున్నట్టు యూట్యూబ్లో అనౌన్స్ చేసింది. వెంటనే తన అప్లికేషన్ పంపింది శ్రేయ. మొదటి రౌండ్లో 3,977 మందిని వెనక్కి నెట్టింది. రెండో రౌండ్లో ఎడిటింగ్ లేని సింగింగ్, డాన్సింగ్ వీడియోలు అడిగారు వాళ్లు. అవే తనని 23 మందిలో టాప్–2లో నిలబెట్టాయి. అంతలోనే ఫైనల్స్ కోసం నెలరోజుల ట్రైనింగ్కి సియోల్ రమ్మని శ్రేయకి పిలుపొచ్చింది. అంత చిన్న వయసులో శ్రేయని ఒంటరిగా పంపించాలా? వద్దా? అని ఆలోచనలో పడ్డారు పేరెంట్స్. శ్రేయ తల్లి వద్దంటే వద్దని మొండికేసింది. దాంతో ఏం చేయాలో తెలియని పరిస్థితి. ఆ టైంలో కూతురి కలని అర్థం చేసుకుని శ్రేయ తండ్రి సపోర్ట్ చేశాడు. శ్రేయకి తోడుగా సియోల్ వరకు తనూ వెళ్తున్నట్టు భార్యకి చెప్పాడు. కానీ, ఢిల్లీలో తనని విమానం ఎక్కించి, ఒకరోజు తర్వాత తిరిగి ఇంటికొచ్చాడు. అలా సియోల్ చేరుకున్న శ్రేయ ప్రస్తుతం కాంపిటీషన్ రూల్స్ ప్రకారం ఫైనల్స్ కోసం కొరియన్ లాంగ్వేజ్తో కుస్తీ పడుతోంది. అక్కడి కల్చర్, ఫ్యాషన్ ట్రెండ్స్, మేకప్ గురించి మరింత తెలుసుకుంటోంది.
