- చైనా బార్డర్లో ఏం జరుగుతోందో చెప్పాలె
- కాంగ్రెస్ పార్లమెంటరీ కమిటీ భేటీలో ప్రభుత్వానికి డిమాండ్
న్యూఢిల్లీ : కేంద్ర ప్రభుత్వం న్యాయ వ్యవస్థనే ధిక్కరిస్తున్నదని, ఉన్న సమస్యలు చాలవన్నట్టు కొత్త ఇబ్బందులు తీసుకొస్తున్నదని కాంగ్రెస్ పార్లమెంటరీ పార్టీ నేత సోనియా గాంధీ విమర్శించారు. సుప్రీం కోర్టుతో కేంద్రం వ్యవహరిస్తున్న తీరు దారుణంగా ఉందని మండిపడ్డారు. పార్లమెంట్లోని సెంట్రల్ హాల్లో పార్టీ ఎంపీలతో ఆమె భేటీ అయ్యారు. మోడీ ప్రభుత్వంపై తీవ్ర స్థాయిలో మండిపడ్డారు. జ్యుడిషియల్ వ్యవస్థనే రద్దు చేసేందుకు పక్కా ప్లాన్తో ముందుకు వెళ్తున్నదని విమర్శించారు. కేంద్రం తీరుతో న్యాయ వ్యవస్థపై ప్రజలకు నమ్మకం పోతోందని అన్నారు. మంత్రులు, రాజ్యాంగ పదవుల్లో ఉన్నవారు కూడా న్యాయ వ్యవస్థను విమర్శించడం దారుణమని విమర్శించారు. జ్యుడిషియల్ వ్యవస్థను అంతర్జాతీయ స్థాయిలో అభాసుపాలు చేస్తున్నారని మండిపడ్డారు. జడ్జీల నియామకం విషయంలో న్యాయశాఖ మంత్రి కిరణ్ రిజుజు చేసిన కామెంట్లు బాధాకరమన్నారు. సుప్రీంకోర్టు ఎన్జేఏసీ బిల్లును వ్యతిరేకించడంపై రాజ్యసభ చైర్మన్ ధన్కర్ కూడా సీజేఐ ఎదుటే న్యాయ వ్యవస్థను కించపర్చేలా మాట్లాడారని గుర్తుచేశారు.
బార్డర్ సమస్యపై పార్లమెంట్లో చర్చించాలి
చైనా సరిహద్దులో ఏంజరుగుతుందో ప్రధాని హోదాలో ప్రజలందరికీ స్పష్టత ఇవ్వాల్సిన బాధ్యత మోడీపై ఉందని సోనియా అన్నారు. పార్లమెంట్లో కూడా ఈ అంశంపై చర్చించేందుకు అవకాశం ఇవ్వడంలేదని మండిపడ్డారు. చైనా చొరబాట్లపై ప్రతిపక్షాలు చర్చకు డిమాండ్ చేస్తే కేంద్రం నిరాకరించడం ప్రజాస్వామ్యంపై ఉన్న గౌరవాన్ని తెలియజేస్తుందని విమర్శించారు. దేశ రక్షణ కోసం తీసుకుంటున్న చర్యల గురించి తెలియజేయాల్సిన బాధ్యత కేంద్రంపై ఉందన్నారు. కంటిన్యూగా చైనా ఆర్మీ ఇండియాలోకి చొచ్చుకువస్తుండటాన్ని కేంద్రం అంత సీరియస్గా తీసుకోవడంలేదని తెలిపారు. బార్డర్ వద్ద ఇండియన్ ఆర్మీ ఎంతో ధైర్యంగా చొరబాట్లను తిప్పికొడుతున్నారని కొనియాడారు. ఈ సమావేశంలో కాంగ్రెస్ అధ్యక్షుడు మల్లికార్జున ఖర్గే సహా పార్టీ సీనియర్ నేతలు పాల్గొన్నారు. తర్వాత పార్లమెంట్లోని గాంధీ విగ్రహం వద్ద ప్రతిపక్ష పార్టీల లీడర్లు ధర్నా చేశారు. ఈ కార్యక్రమంలో సోనియా, ఖర్గే, చిదంబరం కూడా పాల్గొన్నారు.
