- స్పెయిన్ సూపర్ మార్కెట్లలో దొంగతనాలు
- రెండేళ్లలో 150 శాతం పెరిగిన రేటు
వెలుగు బిజినెస్ డెస్క్: స్పెయిన్లోని సూపర్ మార్కెట్లు ఆలివ్ ఆయిల్ బాటిల్స్ను బీరువాలలో పెట్టి తాళాలు వేసి మరీ జాగ్రత్త చేస్తున్నాయి. ఎందుకంటే, గత రెండేళ్లలో ఆలివ్ ఆయిల్ రేటు భారీగా అంటే 150 శాతం పెరిగింది. ప్రస్తుతం ఒక లీటర్ ఆలివ్ ఆయిల్ బాటిల్ 15.77 డాలర్ల (రూ. 1,315)కు అమ్ముడుపోతోంది. అంటే, 14.5 యూరోలు. దీంతో రిటెయిలర్లు ఆలివ్ ఆయిల్ బాటిల్స్ను కాస్మెటిక్స్, అప్లయెన్సెస్, మద్యపానీయాలు వంటి ఖరీదైన ఇతర వస్తువులతో సమానంగా చూస్తున్నారు. దక్షిణ యూరప్లో కరువు పరిస్థితులు నెలకొనడం వల్లే ఆలివ్ ఆయిల్ రేటు పెరిగిందని చెబుతున్నారు. ఈ ప్రాంతమే చాలా ఎక్కువగా ఆలివ్ ఆయిల్ను ప్రొడ్యూస్ చేస్తుంది. స్పెయిన్తో పాటు, ఇటలీ, గ్రీస్, పోర్చుగల్ వంటి దేశాలలో ఆలివ్ ఆయిల్ ప్రొడక్షన్ ఎక్కువ. ఆలివ్ ఆయిల్ కొనే కుటుంబాలు ఇప్పుడు రేట్లు పెరగడంతో ఇబ్బందులు ఎదుర్కొంటున్నాయి. ప్రపంచపు ఆలివ్ ఆయిల్ ప్రొడక్షన్లో 40 శాతం ఒక్క స్పెయిన్ దేశం నుంచే వస్తోంది.
షాపుల నుంచి ఆలివ్ ఆయిల్ ఎత్తుకెళ్లడం (దొంగిలించడం) పెరుగుతోందని టు సూపర్ ( స్పెయిన్లోని ఒక సూపర్ మార్కెట్ చెయిన్) సీఈఓ రూబెన్ నవారో చెప్పారు. ఆలివ్ ఆయిల్ బాటిల్స్ను దొంగిలించడం దొంగలకు ఆకర్షణీయంగా మారిందని ఆయన పేర్కొన్నారు. ఫలితంగా 5 లీటర్ల ఆలివ్ ఆయిల్ బాటిల్స్ను చెయిన్స్తో కలిపి షెల్ఫ్లకు ఆ చెయిన్ను కట్టి జాగ్రత్త చేస్తున్నట్లు వివరించారు. ఈ ఏడాది సెప్టెంబర్ నుంచీ ఇదే పద్ధతి పాటిస్తున్నట్లు నవారో వెల్లడించారు. వచ్చే ఏడాది జూన్ దాకా ఆలివ్ ఆయిల్ ప్రొడక్షన్ పెరిగే సూచనలు కనబడటం లేదు. అంటే, ధరలు ఇప్పట్లో దిగి రావన్నమాట. స్పెయిన్లోని కేర్ఫర్, ఔచన్ సూపర్ మార్కెట్లు కూడా ఆలివ్ ఆయిల్ బాటిల్స్కు సెక్యూరిటీ ట్యాగ్స్ పెడుతున్నాయి.