వసంతకాలం వచ్చి, పది రోజులు దాటింది. త్వరలోనే హోలీ పండుగ కూడా రాబోతుంది. రంగులు చల్లుకుంటూ.. ఆ తెల్ల బట్టలు హరివిల్లు రంగులు పులుముకునే వరకు పండుగ చేసుకుంటారు.హోలీ ఆడటం ఓకే.. మరి ఈసారి హోలీ రోజున స్పెషల్గా తినడానికి ఏ వంటలు చేయాలి?
అని ఆలోచిస్తుంటే కనుక ఇవి మీకోసం.
ఠండాయ్
కావాల్సినవి :ఐస్ క్యూబ్స్ – మూడు
పాలు – పావు లీటర్
ఠండాయ్ పౌడర్ కోసం :
జీడిపప్పు, బాదం, చక్కెర – ఒక్కోటి పావు కప్పు చొప్పున
గసగసాలు, పుచ్చకాయ విత్తనాలు – ఒక్కోటి రెండు టేబుల్ స్పూన్ల చొప్పున, సోంఫు, మిరియాలు – ఒక్కోటి ఒక్కో టీ స్పూన్ చొప్పున
యాలకులు – మూడు
ఎండిన గులాబీ రేకులు – కొన్ని తయారీ :
మిక్సీ జార్లో జీడిపప్పు, బాదం, చక్కెర, గసగసాలు, పుచ్చకాయ విత్తనాలు, సోంఫు, మిరియాలు, యాలకులు, ఎండిన గులాబీ రేకులు వేసి మెత్తగా గ్రైండ్ చేయాలి. ఒక గ్లాస్లో ఐస్ క్యూబ్స్ వేసి, తయారుచేసిపెట్టుకున్న ఠండాయ్ పౌడర్ని కూడా మూడు స్పూన్లు వేయాలి. అందులో కాచి, చల్లార్చిన పాలుపోసి, స్పూన్తో బాగా కలపాలి. చివరిగా కుంకుమ పువ్వు, గులాబీ రేకుల్ని పైన చల్లాలి. కూల్ కూల్గా తాగేందుకు హెల్దీ ఠండాయ్ రెడీ.
ఠండాయ్ చాకొలెట్
కావాల్సినవి :
వైట్ చాకొలెట్ – పావు కిలో
కండెన్స్డ్ మిల్క్ – ఒక కప్పు
ఠండాయ్ పౌడర్ – ఒక టీ స్పూన్
పిస్తా తరుగు – ఒక కప్పు
ఉప్పు – చిటికెడు
తయారీ :
ఒక గిన్నెలో నీళ్లు వేడి చేసి, ఆ నీటిలో కండెన్స్డ్ మిల్క్ ఉన్న గిన్నెను పెట్టాలి. కండెన్స్డ్ మిల్క్ వేడయ్యాక, అందులో వైట్ చాకొలెట్ తరుగు వేసి ఐదు నిమిషాలు కరిగించాలి. చాకొలెట్ కరిగాక, గిన్నెను స్టవ్ మీద నుంచి తీసి పక్కన పెట్టాలి. ఇప్పుడు ఠండాయ్ పౌడర్, పిస్తా తరుగు వేసి బాగా కలపాలి. వెన్న రాసిన గిన్నెలోకి తీసుకుని, పైన పిస్తా తరుగు, గులాబీ రేకులు, ఉప్పు చల్లి, ఐదు గంటలు ఫ్రిజ్లో పెట్టాలి. ఆ తర్వాత ముక్కలుగా కట్ చేసుకుని తినేయడమే.
బచ్కా
కావాల్సినవి:
బియ్యప్పిండి – ఒక కప్పు
శనగపిండి – అరకప్పు
వాము, జీలకర్ర, నల్ల జీలకర్ర, పసుపు, అల్లం వెల్లుల్లి పేస్ట్ – ఒక్కోటి ఒక టీ స్పూన్ చొప్పున
ఉప్పు, నీళ్లు – సరిపడా
కారం – అర టీ స్పూన్
పచ్చి శనగపప్పు (నానబెట్టిన) –
ఒక కప్పు, నూనె – వేగించడానికి సరిపడా
తయారీ :
ఒక గిన్నెలో బియ్యప్పిండి, శనగపిండి, వాము, జీలకర్ర, నల్ల జీలకర్ర, పసుపు, అల్లం వెల్లుల్లి పేస్ట్, ఉప్పు, కారం వేసి కొంచెం కొంచెంగా నీళ్లు పోస్తూ బజ్జీ పిండిలా జారుగా కలపాలి. అందులో పచ్చి శనగపప్పు వేసి కలపాలి. ఒక పాన్లో కొంచెం నూనె వేసి వేడి చేయాలి. దానిమీద పిండి కలిపిపెట్టిన చిన్న దోశల్లా పోయాలి. రెండు వైపులా బాగా కాల్చితే కరకరలాడే బచ్కాలు రెడీ.
మట్కా మలై కుల్ఫీ
కావాల్సినవి :
పాలు – మూడు కప్పులు
క్రీమ్ – ఒక కప్పు
మిల్క్పౌడర్, బాదం, పిస్తా, జీడిపప్పు – ఒక్కోటి రెండు టేబుల్ స్పూన్ల చొప్పున
కుంకుమ పువ్వు – పావు టీ స్పూన్
చక్కెర – పావు కప్పు
తయారీ :
ఒక పాన్లో పాలు, క్రీమ్, మిల్క్ పౌడర్ ఒకదాని తర్వాత ఒకటి వేస్తూ కాగబెట్టాలి. ఉండలు కట్టకుండా తిప్పాలి. పాల మిశ్రమం కాగాక బాదం, పిస్తా, జీడిపప్పు వేసి పది నిమిషాలు కాగబెట్టాలి. పాలు దగ్గర పడ్డాక చక్కెర వేసి మరో ఐదు నిమిషాలు కాగబెట్టాలి. క్రీమ్లాగ అయ్యాక మట్టి (మట్కా) కుండల్లో లేదా గ్లాసులో పోసి, పాలిథీన్ కవర్తో గాలి చొరబడకుండా మూసేయాలి. ఆ కుండల్ని దాదాపు ఎనిమిది గంటలు ఫ్రిజ్లో పెట్టాలి. ఆ తర్వాత కవర్ తీసేసి, పైన నట్స్ చల్లుకుని చల్లగా, తియ్యగా ఉండే కుల్ఫీని ఎంజాయ్ చేయొచ్చు.
నాన్ ఖటాయ్
కావాల్సినవి :
నెయ్యి, మైదా – ఒక కప్పు
చక్కెర పొడి – ముప్పావు కప్పు
బొంబాయి రవ్వ, శనగపిండి – రెండు టేబుల్ స్పూన్లు
బేకింగ్ పౌడర్, యాలకుల పొడి – అర టీ స్పూన్
ఉప్పు – సరిపడా
పిస్తా – కొన్ని
తయారీ :
ఒక గిన్నెలో నెయ్యి, చక్కెర పొడి బాగా కలపాలి. అందులో జల్లెడ పట్టిన మైదా, బొంబాయి రవ్వ, శనగపిండి, ఉప్పు, బేకింగ్ పౌడర్, యాలకుల పొడి వేసి బాగా కలపాలి. ఆ మిశ్రమాన్ని ఉండలుగా చేసి ఒక ప్లేట్లో పెట్టాలి. వాటిపైన పాలతో తడి చేసి, పిస్తా పెట్టాలి. వీటిని ఒవెన్లో అయితే 170 డిగ్రీల టెంపరేచర్లో 20 నిమిషాలు ఉడికించాలి. లేదంటే.. ప్రెజర్ కుక్కర్లో అరకిలో ఉప్పు వేసి, స్టాండ్ ఉంచి, మూత పెట్టాలి. స్టాండ్ వేడయ్యాక దానిమీద నాన్ ఖటాయ్లు ఉన్న స్టీల్ ప్లేట్ని పెట్టాలి. పావుగంటపాటు ఒక మాదిరి మంట మీద ఉడికించాలి. గాలి చొరబడని డబ్బాలో వీటిని ఉంచితే నెల రోజులు ఫ్రెష్గా తినొచ్చు.
