థ్రిల్లర్ సినిమాలకి మ్యూజిక్ చేయడం శ్రీచరణ్ పాకాలకి కొట్టిన పిండి. అందుకు ఎగ్జాంపుల్ ‘క్షణం, ఎవరు, గూఢచారి, తిమ్మరుసు, గరుడవేగ, నాంది’.. లాంటి సినిమాలు. సస్పెన్స్, క్రైమ్, ఇన్వెస్టిగేషన్ బ్యాక్డ్రాప్లో వచ్చిన ఈ సినిమాలన్నింటికీ ట్యూన్స్ కట్టింది ఈ మ్యూజిక్ డైరెక్టరే. ఇవే కాదు ఈ మధ్య కాలంలో వచ్చిన మరెన్నో స్పై థ్రిల్లర్స్కి తన బిజిఎమ్ (బ్యాక్గ్రౌండ్ మ్యూజిక్) తో ప్రాణం పోశాడు ఈ మ్యుజీషియన్.
ఇంతకుముందు థ్రిల్లర్ సినిమాలు ఎక్కువగా తమిళ, మలయాళంలోనే తీసేవాళ్లు. కానీ, ఇప్పుడు తెలుగులోనూ వీటి హవా కనిపిస్తోంది. అలా ఈ మధ్య టాలీవుడ్లో థ్రిల్లర్ బ్యాక్డ్రాప్లో వచ్చిన సినిమాలు చాలావరకు ఆడియెన్స్ని మెప్పించాయి. అయితే ఇలాంటి సినిమాలకి మ్యూజిక్ అంటే కత్తిమీద సాములాంటిదే. బ్యాక్గ్రౌండ్ స్కోర్తోనే ప్రతి సీన్ని ఎలివేట్ చేయాలి. నెక్స్ట్ ఏం జరుగుతుందన్న ఉత్కంఠ పెంచాలి. ఈ విషయంలో శ్రీచరణ్కి వందకి వంద మార్కులు పడతాయి. అందుకే స్పై థ్రిల్లర్స్కి మ్యూజిక్ అనగానే మొదట గుర్తొచ్చే పేర్లలో ఈయన కూడా చేరిపోయాడు. కానీ, థ్రిల్లర్స్తో హిట్స్ కొడుతున్నా.. నాకు మెలోడి పాటలకి ట్యూన్స్ కట్టాలని ఉందంటున్నాడు. అంతేకాదు ఇంటర్ పూర్తయ్యే వరకు మ్యూజిక్ గురించి ఆలోచనలే లేవట శ్రీ చరణ్కి. మరెలా మ్యూజిక్ వైపు వచ్చారంటే ఇలా చెప్పుకొచ్చాడు.
గిటార్ నేర్చుకోవాలనుకున్నా..
‘నేను పుట్టింది, పెరిగిందంతా వైజాగ్లోనే. మా అమ్మానాన్నలిద్దరూ పోస్ట్ గ్రాడ్యుయేట్స్. దాంతో చదువు విషయంలో బాగా స్ట్రిక్ట్గా ఉండేవాళ్లు. నాకు కూడా పాఠాలు తప్పించి మరో ఆలోచనలు ఉండేవి కావు చిన్నప్పుడు. అందుకే బుద్ధిగా చదువుకునేవాడ్ని. కానీ, గజల్స్ బాగా వినేవాడ్ని. తెలుగు, హిందీ సినిమాల పాత పాటలు కూడా వినేవాడ్ని. అందుకు కారణం మాత్రం అమ్మ. తనకి మ్యూజిక్ అంటే చాలా ఇష్టం. బాగా పాడుతుంది కూడా. అలా పరిచయమైన పాటలు ఇంటర్ పూర్తయ్యాక మరింత దగ్గరయ్యాయి. దానికి కారణం నా ఫ్రెండ్స్ దూరమవ్వడమే.
ఇంటర్లో నా క్లోజ్ ఫ్రెండ్స్ అంతా నాన్లోకల్స్. వాళ్లతో కలిసి ఓ రేంజ్లో షికార్లు చేసేవాడ్ని. కానీ, ఇంటర్ పూర్తయ్యాక వాళ్లంతా కెరీర్ కోసం ఎవరి దార్లో వాళ్లు వెళ్లిపోయారు. ఆ టైంలో బాగా లోన్లీ ఫీలయ్యా. ఆ ఒంటరితనం నుంచి బయటపడేందుకు గిటార్ నేర్చుకోవాలనుకున్నా. మా అన్నకి గిటార్ తెలియడంతో కొంచెం ప్రాక్టీస్ చేయించాడు. ఆ ప్రాసెస్ నచ్చి,.. ఇంటర్నెట్ సాయంతో మరింత పర్ఫెక్ట్ అవ్వాలనుకున్నా. ఐదేళ్లలో నా అంతట నేనే ట్రైన్ అయ్యా. ఆ తరువాత ఒకరోజు ఒక పాట ప్లే చేస్తుంటే మా కజిన్ విని,‘ఎక్కడ నేర్చుకున్నావు’? అని అడిగాడు. సొంతంగానే అని చెప్పా. తను ఫారిన్లో గిటార్ నేర్చుకోవడంతో నన్ను కూర్చోబెట్టుకొని టెక్నిక్స్ అన్నీ చెప్పాడు. అలా గిటార్పై మరింత గ్రిప్ వచ్చింది. ఆ మధ్యలోనే ఒక లోకల్ బ్యాండ్లో గిటారిస్ట్గా, సింగర్గా చేరా. రాక్, ఫ్యూజన్, జాజ్ మ్యూజిక్లో ఎన్నో పర్ఫార్మెన్స్లు ఇచ్చా. నా ఫ్రెండ్స్ తీసిన షార్ట్ ఫిల్మ్స్కి, సోషల్ అవేర్నెస్ డాక్యుమెంటరీలకి కూడా మ్యూజిక్ ఇచ్చా.
అవకాశం అలా వచ్చింది.
ఏదేమైనా నచ్చిన పని చేయాలనుకున్నా. అందుకే ఇంట్లోవాళ్లకి ఇష్టం లేకపోయినా డిగ్రీ మధ్యలోనే ఆపేశా. పూర్తి కాన్సన్ట్రేషన్ మ్యూజిక్ మీద పెట్టా. అయితే అప్పటికీ సినిమా ఆలోచనలు లేవు నాకు. కానీ, నా ఫ్రెండ్ ‘క్షణం’ డైరెక్టర్ రవికాంత్ సలహాతో ఇండస్ట్రీకి రావాలనుకున్నా. అప్పటికే రవి.. అడివి శేషు దగ్గర చేరాడు. నేను కంపోజ్ చేసిన ఒక పాట తనకి బాగా నచ్చడంతో.. అడివి శేషు ‘కిస్’ సినిమాకి నన్ను రిఫర్ చేశాడు. అలా మొదటిసారి 2011 లో ఒక గిటారు, హార్డ్ డిస్క్ పట్టుకుని వైజాగ్ నుంచి హైదరాబాద్ వచ్చా. అప్పటి వరకు వెస్ట్రన్ మ్యూజిక్లో ఉన్న నాకు సినిమా పాటలు కొత్త సబ్జెక్ట్లా అనిపించాయి. దాంతో చాలా కష్టపడ్డా. దగ్గర దగ్గర ఇరవై డెమోలు పట్టుకుని అడివి శేషుని కలిశా. అవి విని, ‘బాగున్నాయని’ చెప్పి వెళ్లిపోయారాయన. దాంతో ఆశలన్నీ వదిలేసుకున్నా. కానీ, ఆ తర్వాత మళ్లీ ఫోన్ చేసి సినిమాలో ఒక పాట ఇచ్చారు. ఆ పాట బాగా రావడంతో... మరో సాంగ్ ఇచ్చారు..అది విన్నాక ఆల్బమ్ అంతా నాతోనే చేయించారు. కానీ, పాటలన్నీ బాగున్నప్పటికీ ఆ సినిమా ఆడకపోవడం నాకు మైనస్ అయింది. దాంతో తిరిగి వైజాగ్ వెళ్లిపోయా.
ఆ తర్వాత...
ఇండస్ట్రీలో కాంటాక్ట్స్ లేవు. డైరెక్టర్స్కి నా సాంగ్స్ వినిపించాలి..డెమోలు ఇవ్వాలని తెలీదు. దాంతో ఆ సినిమా రిలీజ్ అయ్యాక వైజాగ్ వెళ్లిపోయా. మొదట్నించీ మా వాళ్లకి నేను మ్యూజిక్ అంటూ తిరగడం ఇష్టం లేదు. ‘ఈ ఫీల్డ్లో సస్టైన్ అవ్వడం ఈజీ కాదు. ఉద్యోగం చేసుకోమ’ని గ్రౌండ్ రియాలిటీ చెప్తుండేవాళ్లు ఎప్పుడూ. నేను తిరిగి ఇంటికెళ్లేసరికి మ్యూజిక్ వద్దంటే వద్దని తేల్చి చెప్పేశారు. కానీ, నేను మాత్రం ఏదేమైనా మ్యూజిక్యే నా కెరీర్ అనుకున్నా. మళ్లీ బ్యాండ్తో కలిసి పర్ఫార్మెన్స్లు ఇచ్చా. ఆల్రెడీ ఒక సినిమాకి వర్క్ చేసి తిరిగొచ్చి బ్యాండ్లో వాయిస్తే ఒక్కొక్కరూ ఒక్కోలా మాట్లాడారు. ఇతర స్టేట్స్లో సెటిలైన వాళ్లు అయితే ‘నువ్వు ఇంకా హోటల్స్లోనే వాయిస్తున్నావా? ’ అంటూ ఎగతాళి చేశారు. వాటన్నింటినీ పట్టించుకోకుండా ముందుకెళ్లా. అలా సాగిపోతున్న లైఫ్కి మళ్లీ ఒక టర్నింగ్ పాయింట్ అయ్యాడు రవికాంత్. తను డైరెక్ట్ చేస్తున్న ‘క్షణం’ సినిమాకి మ్యూజిక్ డైరెక్టర్గా అవకాశం ఇచ్చాడు. అదే టైంలో ‘గుంటూరు టాకీస్’ డైరెక్టర్కి డెమోలు వినిపించా. రెండు సినిమాలు ఒకే టైంలో పట్టాలు ఎక్కడంతో మళ్లీ హైదరాబాద్ షిఫ్ట్ అయ్యా. ఆ టైంలో కొందరు ఫ్రెండ్స్ చాలా హెల్ప్ చేశారు.
ఎక్స్పెక్ట్ చేయలేదు
‘క్షణం’కి పెద్దగా బడ్జెట్ లేదు. బ్యాక్ గ్రౌండ్ స్కోర్ కంపోజిషన్కి సరిపడా టూల్స్, ఎక్విప్మెంట్ కూడా లేదు. ఉన్నంతలోనే ది బెస్ట్ మ్యూజిక్ ఇవ్వాలనుకున్నా. దానికోసం చాలా కష్టపడ్డా. నా కష్టానికి తగ్గట్టే అవుట్పుట్ వచ్చింది. సినిమా రిలీజ్ అయ్యాక అందరూ బ్యాక్గ్రౌండ్ స్కోర్ గురించే మాట్లాడారు. ఆ వెంటనే రిలీజ్ అయిన ‘గుంటూరు టాకీస్’ ఆల్బమ్కి కూడా మంచి పేరు వచ్చింది. దాంతో వరుసగా అవకాశాలు వచ్చాయి. అమ్మనాన్న కూడా ఫుల్ ఖుష్. అయితే ‘క్షణం’ హిట్ అవ్వడంతో స్పై, ఇన్వెస్టిగేషన్ థ్రిల్లర్సే ఎక్కువగా వచ్చాయి నాకు. మధ్యమధ్యలో ఇతర జానర్స్ కూడా ట్రై చేశా. అలా ఇప్పటివరకు అన్నీ కలుపుకుని ఇరవైకి పైగా సినిమాలకి మ్యూజిక్ ఇచ్చా. వాటిల్లో ముందు చెప్పిన ‘క్షణం, గుంటూరు టాకీస్తో పాటు గరుడ వేగ, రంగుల రాట్నం, గూఢచారి, ఇదంజగత్, జెస్సీ, ఎవరు, ఆపరేషన్ గోల్డ్ ఫిష్, అశ్వత్థామ, తిమ్మరుసు, నాంది’ లాంటి సినిమాలు నాకు మంచి పేరు తెచ్చాయి.
కంఫర్ట్ ఎక్కువ ఉంటుంది
చాలామంది ఫలానా హీరోలు, డైరెక్టర్స్తోనే ఎక్కువగా పనిచేస్తుంటారు ఎందుకని అడుగుతుంటారు. దానికి పర్టిక్యులర్ రీజన్ ఏం లేదు. ఆల్రెడీ వాళ్లతో కలిసి పనిచేయడం వల్ల ఒక కంఫర్ట్ లెవల్ ఉంటుంది. ఐడియాలజీ మ్యాచ్ అవుతుంది. దానివల్ల మ్యూజిక్ ప్రాసెస్ తేలిక అవుతుంది. అందుకే అడివి శేషుతో ఎక్కువగా సినిమాలు చేస్తుంటా. కమర్షియల్ సినిమాల విషయానికొస్తే అవెందుకు రావట్లేదో నాకు అర్థం కాదు. మేబీ నేను ఎవర్నీ అప్రోచ్ అవ్వకపోవడమే రీజన్ అనుకుంటున్నా. చాలామందికి నా పాటలు తెలుసు. కానీ, నేను తెలియదు. అందుకే ఇకముందు నన్ను నేను పరిచయం చేసుకోవాలి అనుకుంటున్నా. ఏదో ఒకరోజు కచ్చితంగా కమర్షియల్ సినిమాలు చేస్తా.
అదే గోల్
నేను ఇండస్ట్రీకి కొత్త అవడంతో ఇలాంటి సినిమాలే చేయాలన్న పారామీటర్స్ ఏం పెట్టుకోలేదు. వచ్చిన సినిమాలన్నీ చేసుకుంటూ పోయా. అయితే ప్రతీ సినిమాకి నా వంద శాతం ఇచ్చా. కానీ, నాకు కామెడీ, మాస్, లవ్ స్టోరీలంటే చాలా ఇష్టం. మెలొడీలకి ట్యూన్స్ కట్టాలనుకుంటున్నా. ప్రస్తుతం రిలీజ్కి రెడీగా ఉన్న ‘మేజర్’ సినిమా నా కెరీర్లో ది బెస్ట్ ఆల్బమ్ అవుతుందన్న నమ్మకంతో ఉన్నా. అలాగే ‘తెలిసినవాళ్లు’ అనే మరో సినిమాతో పాటు ఇంకొన్ని ప్రాజెక్ట్స్ చేతిలో ఉన్నాయి. పర్సనల్ లైఫ్ విషయానికొస్తే క్రికెట్, బాస్కెట్ బాల్ బాగా ఆడతా. సౌత్ ఇండియన్, ఇటాలియన్ ఫుడ్ ఎక్కువగా తింటా. బ్లాక్ కలర్ అంటే చాలా ఇష్టం. అందుకే ఎక్కువగా బ్లాక్ షర్ట్స్ వేసుకుంటా. దగ్గరదగ్గర పదేళ్లు బ్యాండ్లో పర్ఫార్మెన్స్లు ఇచ్చా.. టైట్ షెడ్యూల్ వల్ల వాటికి దూరమవ్వడంతో వెలితిగా ఉంది. అందుకే త్వరలో తెలుగు బ్యాండ్ స్టార్ట్ చేయాలనుకుంటున్నా. ఇళయరాజా గారి పాటల ఇన్ఫ్లుయెన్స్ చాలా ఉంటుంది నామీద.
::: ఆవుల యమున