టర్కీ: మాములుగానే ఫ్లైట్ నడపడమంటే కత్తి మీద సాములా ఉంటుంది. అటువంటిది ఓ టన్నెల్లో ఫ్లైట్ నడిపితే.. ఫ్లైట్ అటూ ఇటూ ఏమాత్రం తేడా జరిగినా.. ప్రాణాలు గాలిలో కలిసిపోతాయి. కానీ ఇటలీకి చెందిన ఓ ఎయిర్ రేసర్ మాత్రం ఒక టన్నెల్ నుంచి మరో టన్నెల్కు ఫ్లైట్ నడిపి రికార్డ్ సృష్టించాడు. ఇటాలియన్ ఎయిర్ రేసర్, స్టంట్ పైలట్ డారియో కోస్టా ఈ అద్భుతాన్ని నిజం చేశాడు. టర్కీలోని ఇస్తాంబుల్‌లోని రెండు టన్నెల్‌ల ద్వారా విమానం నడిపి గిన్నిస్ బుక్ ఆఫ్ వరల్డ్ రికార్డ్స్‌లో చోటు దక్కించుకున్నాడు. కోస్టా ఒక టన్నెల్లో 1,730 మీటర్లు ప్రయాణించి.. మరో టన్నెల్లోకి ప్రవేశించాడు. రెండో టన్నెల్ ద్వారా బయటకు వచ్చి టేకాఫ్ తీసుకున్నాడు. మొత్తంగా రెండు టన్నెల్స్ కలిపి గంటకు 245 కి.మీ. వేగంతో 2.6 కి.మీ. ప్రయాణం చేసి గిన్నిస్ వరల్డ్ రికార్డ్లో చోటు దక్కించుకున్నాడు. ఈ ఫ్లైట్ జర్నీ యొక్క వీడియోను ఆస్ట్రియన్ కంపెనీ రెడ్ బుల్.. సెప్టెంబర్ 4, 2021న ఫేస్‌బుక్‌లో విడుదల చేసింది. ఈ వీడియోకు ఇప్పటికే 1.5 లక్షల లైకులు రాగా.. 65 వేల షేర్ లభించాయి.
ఈ స్టంట్తో కొత్త రికార్డులు నమోదయ్యాయి. టన్నెల్ గుండా ప్రయాణించిన తొలి విమానం, ఒక టన్నెల్ నుంచి మరో టన్నెల్ లోకి ప్రయాణించిన విమానం, టన్నెల్ నుంచి టేకాఫ్ తీసుకున్న తొలి విమానం వంటి రికార్డులను కోస్టా నెలకొల్పాడు.
