న్యూఢిల్లీ, వెలుగు: ప్యాకేజ్డ్ ఫుడ్పై ‘హెచ్చరిక’ ముద్ర తప్పనిసరిగా ఉండాల్సిందేనని సుప్రీంకోర్టు స్పష్టం చేసింది. ఈ మేరకు భారత ఆహార భద్రత– ప్రమాణాల ప్రాధికార సంస్థ (ఎఫ్ఎస్ఎస్ఏఐ)ని ఆదేశించింది. ప్రజారోగ్యంతో ఆటలాడొద్దని, ఈ విషయంలో ఎట్టి పరిస్థితుల్లోనూ రాజీపడే ప్రసక్తే లేదని తేల్చి చెప్పింది.‘3 ఎస్ అండ్ అవర్ హెల్త్ సొసైటీ’ దాఖలు చేసిన పిటిషన్పై జస్టిస్ జేబీ పార్దివాలా, జస్టిస్ కేవీ విశ్వనాథన్ బెంచ్ విచారించింది.
పిటిషనర్ తరపు న్యాయవాది వాదిస్తూ.. ప్యాకెట్లపై చక్కెర, సోడియం, కొవ్వుల మోతాదు గురించి బోల్డ్ అక్షరాలతో హెచ్చరికలు ఉంటేనే ప్రజలు అప్రమత్తం అవుతారని అన్నారు. ఈ అంశంపై ఎఫ్ఎస్ఎస్ఏఐ దాఖలు చేసిన అఫిడవిట్పై ధర్మాసనం తీవ్ర అసహనం వ్యక్తం చేసింది. పిటిషనర్ వాదనలతో ఏకీభవిస్తూ ... చర్చలు, సమావేశాలతో కాలక్షేపం చేయొద్దని ఎఫ్ఎస్ఎస్ఏని హెచ్చరించింది.
ఈ అంశానికి సంబంధించి నాలుగు వారాల్లో సమగ్ర నివేదికతో రావాలని ఆదేశించింది. అలాగే ఆహారంలోని అధిక చక్కెర, ఉప్పు, సాచ్యురేటెడ్ ఫ్యాట్ కు సంబంధించి వినియోగదారుడికి అర్థమయ్యేలా ప్యాక్ ముందు భాగంలోనే స్పష్టమైన హెచ్చరికల లేబుల్స్ తప్పనిసరి చేయాలని స్పష్టం చేసింది.
